Urut 4 - Ala Wone Peenok Peebi Mbanak

Aap Mbowat nogo nen kwe Urut kolagagerak wone

¹ At Mbowat nogo wage nagagerik, o kota tu unggwogo menggam nogome aret kwi'nari wagagerak. Kwi'ndak taati wonage me, at Urut awone koonogo onggo mbaniyak yereegerak nogo aret wage enegen kage nagagerik, “Wulaga yi wae. Yime kwi'nari mok o.” Yoge mbareegi, wage nagagerik, imbirak aret kwi'nagagerak.

² Kwi'nage mbareegi, at Mbowat nen it aap o kota time mendek aap inoweewi 10, “Woraanip o,” yorage nagagerik, “Kit yime kwi'nari woraanip o,” yorage mbareegi, time aret kwi'nari wogogwaarak.

³ Kwi'nari wogo mbareegwa, at Mbowat nogo nen aap kwe Urut awone koonogo onggo mbaniyak nogo yoge logonet, “Kwe Nawomi nogo aap Mowap wonogwe me nen wage nagaarik, nit ninoweeluk aap Elimelek anggween nogo onggo kunggolaakit ari me,

⁴ aakumi kwi'ndak wonogwe yi inom, aakumi nit mendek inoweewi yi inom, inenggaanom paga kat kunggoloorak mbake ilik, lek a? ari keyaakit nduk, Mok, yokkigirak me, kunggoloorak mbake kenok, aret kunggolet o. Ndi, kunggoloorak keebi mbake keenok perak, an neenu arikit nduk, yo'niru o. It aakumi inambik kunggoloorak lek oweeluk alom me liirogon kat aret kuniyak koba wonage me, kunu o. Ndi, kat kunggoloorak meek mbake keenok, an aret kuniyak noba aruwak o.” Yoge mbareegi, “An aret kunggolaakit o,” yoreegerak.

⁵ Yoge mbareegi, at Mbowat nen ari logonet, “Kwe Nawomi nggween kungge nogo ti, kwe Mowap mendek Urut ogonggelo kambeegerak nogo anggween aret kungge me, ogonggelo kambeegerak endage ki logowak nduk, anggween kunggolage logonet, akwe ti inom onggo puurak ariyak me, nonggop eerumunggun o?”

⁶ Yoge mbareegi, aap kwe Urut awone koonogo onggo mbaniyak kin wokkage nogo nen ari logonet, “Togop kenok, an lombok neyate nogo paga wone ambi age kero, an kuniyak meek me, kat aret kunu o,” yoreegerak.

⁷ O maan aakumi Iterali inanggween it-it kunggologo logonet, “Abu aret onggo punuk, inanggween ti kunggolagaarak,” abet mbaruwak nduk, aap anggween unde nogo nen iyok ogut nggoorogo aap nggween kunggolage nogo wogorogo nogogwaarak me,

⁸ aap Urut awone koonogo onggo mbaniyak kin wokkage nogo nen, “Kat aret kunggolet o,” yoge nagagerik, iyok ogut nggoorogo Mbowat wogoreegerak.

⁹ Wogoge mbareegi, at Mbowat nen it aap inoweewi nogo inom, aakumi time wonogwe nogo inom, yorage logonet, “Kit apit kinenggaanom paga aret aap Elimelek inom, aap Kiliyon Makolon imbirak inom, inamendek abok aret kwe Nawomi eenggime nen an kunggolage logonet,

¹⁰ owe-awot nen aap Makolon endage kobak ogwe, ndi, o kota inendage mbanak menggaarak nogome at endage mbanak lek age, eerukwak, endage ki logowak nduk, akwe togwe pereegerak kwe Mowap mendek endage Urut nogo, An nakwe me, yinuk, inom aret kolage me, kit abok kineenu a'nip o.”

¹¹ Ari mbareegi, aakumi ambik tu unggwogo menggam wonogogwaarak nogo inom, aap inoweewi nogo inom, nen yogo logonet, “Nit apit ninenggaanom paga aret yagandak me, kwe Leya kunduk, kwe Araken kunduk, nen aakumi Iterali ineebe wiganogo piyareegwaarak nogo ndak-ndak, at Aliku ALA nen kwe kame woraagin ti, togop aret eeppuwak o. Eeppege kenok, it aakumi o Eparata mendek nen, Aap nagawan indo yi, Wi, yogwe, ndi, o Mbe'lekem mendek nen kendage nggwok aret wiganit nogwe, eeko logowak o.

¹² Kwe Tamat nen aap Yekura obaane'me Peret ndareegerak paga nen ineebe nggwok wigak yereegwaarak nogo ndak-ndak, at Aliku ALA nen kwe tawe yi paga nen kapuri togop aret wokkiruwak o,” yinuk, yoreegwaarak.

¹³ Ti'nuk, aap Mbowat nen kwe Urut nogo kolage nagagerik, akwe aret age mbareegi, at Aliku ALA nen obeelom eeppege kagak, abila age nagagerik, aagaluk aap aret ndareegerak.

¹⁴ Ndake mbareegi, it kumi nen Nawomi yogo logonet, “Aliku ALA nen mbo pagulik aap ambi kawone koonogo keenggelo kimbirak kineebe-kinanggween onggo mbaniyak nduk, koonggerak paga kowooluk ndakerak me, o yogondak Aliku ALA endage tiyappuwok o. Aakumi Iterali inenggela'me nen wulaga ti, endage nggwok aret logowak o.

¹⁵ Kaagalogwe 7 ndarak wonage nen iya mbariyak kwe, meek o. Keenggelo kabuwa mbake logonet, iniki kunik eekkake nogo nen kowooluk ambi ndakerak me, yogondak ale'nggen eeppagage, ndi, kwe kanggok age keegak, ndegenggake, eeke logogin me, iya o.”

¹⁶ Yogo mbareegwa, kwe Nawomi nogo nen wulaga nogo wagangge nagagerik, ogome porogo wonage, ndegengge, eeke nagagerak.

¹⁷ Ndi, it kumi time mendek nen, “Nawomi owooluk aap aret ndakerak o,” yinuk, endage Obet aret tooneegwaarak. At Obet nogo nen apuluk Itayi ndareegerak. Ndi, Itayi nen Ndawut aret ndareegerak.

Ndawut ombomini nda'narit wogogwaarak inendage mbanak wone

¹⁸ Aap Peret apuri wiganak inendage nogo yi aret o. Peret nen Ketoron ndake,

¹⁹ Ketoron nen Aram ndake, Aram nen Aminarap ndake,

²⁰ Aminarap nen Nakaton ndake, Nakaton nen Talomon ndake,

²¹ Talomon nen Mbowat ndake, Mbowat nen Obet ndake,

²² Obet nen Itayi ndake, ndi, Itayi nen Ndawut aret ndake, eerit wundi wogogwaarak. 14