Urut 3 - Ala Wone Peenok Peebi Mbanak

Urut Mbowat imbirak jelai anggen menenggo menggam lambuneegwaarak wone

¹ Ti'nuk, ne ambi paga at Urut eenggelo Nawomi nen Urut yoge logonet, “Neenggelo o. Kiniki kwi'ndak ale'nggen logonok nduk, o ambi kwaakkiri ilik?

² It kumi kat kinom at ake yabu eeko nogotak aap Mbowat nogo ti, nit ninayinggelo mendek nogo lek a? Ninayinggelo aret me, oonikiya yi paga waabuk negen jelai anggen menenggo menggam nogome at aret menengge me, nanok nduk,

³ kanggo'mo wakkolage, amburu obari abe mendek eekkolage, kayum abe kigirikwe lombok yirikkolage, eeppunuk, at waabuk negen jelai anggen menengge me, time nage logomenggendik, enegen keege kero, kumaarak keegak, at nen niyo inom, mbi inom, abu nenok,

⁴ ilin nggeeme nogo yege nogo kat mondok liippunuk, at windak wonage me time nage logomenggendik, nogo yum iyok paga lenggenak nogo pilaappunuk, winnage keenok, at nogo nen eeriyak wone nogo yokkege kaamunggun o.”

⁵ Yoge mbareegi, at Urut nen ari logonet, “Yo'negendak nogo abok ndak-ndak aret eerikit o.”

⁶ Yoge nagagerik, eenggelo nen wone lengganogo yoreegerak nogo ndak-ndak aret eerikit nduk, waabuk negen jelai anggen menenggo menggam time aret nagagerak.

⁷ Nagagerak wonage kagak, at Mbowat nogo mbi inom, amburu inom, abu aret nengge nagagerik, ale'nggen eeke mbareegi, waabuk negen jelai anggen menenak logonogo pugume irip me time winnagagerak nogo yege me, kwe Urut nogo mbawok aret owagam nage nagagerik, yum Mbowat iyok paga lenggenak nogo pilaappege nagagerik, winnagagerak.

⁸ Winnage mbareegi, nogo iniki mbere eeke paga at Mbowat nogo ogut nage nagagerik, ena logu yinuk, kwe ambi iyok irip me windak wonage kage nagagerik, yoge logonet,

⁹ “Kat ta o?” Ari mbareegi, at nen, “An kayeloman Urut areto. Kat nen ninawone koonogo nineebe-ninanggween onggo mbanogo pinaniyak nayinggelo kat aret me, kayum yi, mbiganogo ando an lenggenogo panu o.”

¹⁰ Yoge mbareegi, at yoge logonet, “Nayinggeloo. At Aliku ALA nen ale'nggen koba pagage logogin o. Kat nen aap tawe ineenggi warak inom, ineenggi lek inom, kwaarinabit noolik an aret neya wagandak me, aa'nduk neya wagandak nogo ti, nabuwa mbuuluk negen nombakendak kwe, o yogondak yi paga perak, nabuwa nggwok lombok nomba'nuk, wagandak keegi o.

¹¹ Togop aret me, nayinggelo o. Kagabiti mbarugun o. Ninoreewi ninawi kota yime abok aret nen, Kwe yi abu obeelom aret, ineenu wonogwe me, yo'negendak nogo abok aret an ndak-ndak eerigin o.

¹² Kat nen, Ninawone koonogo nineebe-ninanggween onggo puurak nayinggelo kat aret, yo'negendak ti, abet aret kwe, an we tayorogon negen o. Kayinggelo kineebe-kinanggween onggo puurak alom me liirogon lombok ti wonage o.

¹³ Togop me, oonikiya yogondak yi paga yime logot o. Ndi, ko'lu kuubondendok at nen, An nen aret onggo pikit o, ari kenok, at nen puurak op aret me, kineebe-kinanggween onggo puwak o. Ndi, at nen, An puurak neebi, ari kenok perak, An nen aret pikit o, yinuk, Aliku ALA eenik menggerak endage paga yokkege me, o awo wigangga'lek me, nogo ambinom yu o.”

¹⁴ Yoge mbareegi, iyok irip me time aret nogo yege nagagerik, aakumi inete liippiyoorak meek, o awo weerikit nduk eeke kagak, at Mbowat nen yoge logonet, “Kwe ambi waabuk negen jelai anggen menenggo menggam wagaarak ineenu arukwak, aakumi abu yoroobok o.”

¹⁵ Yoge nagagerik, “Kayum kanobak paga perenak ti, ndoonggolet o,” yinuk, yoreegerak ndoonggolage mbareegi, waabuk negen jelai anggen menenak ne 6 paga yonggorege nagagerik, anobak paga punuk, wage kagak, Mbowat nogo ame kota aret wagagerak.

¹⁶ Ndi, kwe Urut nogo eenggelo owagam wage mbareegi, Nawomi nen yoge logonet, “Neenggelo o. Nonggop mban eekendak o?” Ari mbareegi, aap Mbowat imbirak wone mbaneegwaarak nogo apit aret mbininereegerak.

¹⁷ Mbininege nagagerik, ambi yoge logonet, “Mbowat nen, Keenggime lek, we nagun o. Keenggelo nugut-nagut ari kero, yi wamen o, yinuk, waabuk negen jelai anggen ne 6 paga yonggologo wo'negerak yi aret me, kolet o,” yinuk, wogoreegerak.

¹⁸ Wogoge mbareegi, Nawomi nen eenggelo yoge logonet, “Neenggelo o. Kayinggelo ti, kawone koongga'lek puk arigin lek, yogondak mbet-mbet aret koonigin me, wone koonemenggerak yo'niraga'lek kagak, we luulu tokkogo logowok o,” yinuk, yoreegerak.