Titut 1 - Ala Wone Peenok Peebi Mbanak

TITUT

PAWULUT NEN APUT TITUT AKE LIIRU MBANEEGERAK WONE

^1-4 Naput Titut wae. Nit abok wone abet mbakwi nogo paga naput abe kat aret me, it aakumi Ala nen miirinabeegerak iniki abet mbakwi wone nogo wigangge, ndi, Ala ari menggerak wone nogo liippunuk, Ala apuri nen eeko mengga kwak eekwi, eeruwak nduk, an Pawulut Ala ayeloman Yetut Keritut ayonggo nappiigak mendek agago paneegerak nogo nen aret yokkiri o. At pilit ariilik abet mban ari menggerak Ala nogo nen, “Mondok-mondok ineenik logogun o,” yinuk, o yi wakkaga'lek kagak, koonogo pereegerak nogo, ee'ninabuwak nduk, niniki lunik wonogwe nogo ti, nit abet mbakwi, Ala ari menggerak nineenu ogwe, eekwi nogo paga panggonak wonage agaarik o. Niniki lunik wone ti, maan togon koonogo pereegerak kwe, “Ndiyom paga kin arigin,” mbareegerak nogo ninagap ndaka Ala nen, “At yorage logowak o,” yinuk, an yogondak abe wone yorage logokit nduk, unde eeppaneegerak nogo aret yorage neegak, nineenik ee'ninaburak wone ti inom yorage paga kenom aga o. Ninogoba Ala ninagap ndaka Keritut Yetut imbirak iniki kunik nen wokkugwi, kiniki ugun tayenak ale'nggen logonok nduk, eeppagagwi, eeko logogun o.

Titut o Kereta logonet, eeke logorak yoreegerak wone

⁵ An eeka'lek kagak wagagirak nogo eeke, ndi, o kota lombok Ala apuri unde logowak nduk, “Aap ti mendek mippiyoorak,” yokkereegirak nogo mippiige, eeke logonok nduk, kat o Kereta time keegak, an wagagirak nogo o.

⁶ Ala apuri unde logowak nduk mippiyoorak nogo ti, aakumi inoone inoba piigulik kenok, inakuwi ambit wogo kenok, “Inapurilogwe nen ugun-ugun eerit nugu logonet, inagalomini-inogobamini inoone taganogo piigwi kwe, inaruk waka'lek kiraap!” yogolik Ala wone abet mba'nuk eeko menggaarak inogobamini kenok, it ti mendek mban mippiyoorak op o.

⁷ It aap aakumi inarum logorak nogo ti, Ala eyabu eeka me, maluk eeke kenok aakumi inoone inoba piyookwak, obeelom mban eerit nugu logowak o. It koonggwi mban eeriyak mbakwi, inanini mbet-mbet wungge, amburu kumili aganake mendek ndonggorogon nunggwi, ndugwi pugwi, aakumi inawu kolaawok nduk, wi-wi aganakwi, eeko menggaarak kenok, aap ti mendek mippiyoorak lek o.

⁸ Ata, aap inanoniya laka kenok, obeelom eeriyak inikilom mbaka kenok, iniki warak kenok, a'me nggelok eeka kenok, Ala wone liippunuk eeka kenok, eeriyak eeke kagak kwe, iniki yungguppunuk, puk aga kenok, aap ti mendek mban mippiyoorak op o.

⁹ Wone kole wone ti, it konenggo menggaarak nen abet mbaruwak nduk, lengganogo yorogwe, abe wone woorak ineebi mbakwi nogo waawak nduk, wone kenaarogo yorogwe, eeko logowak nduk, abe wone nogo paga niniki panggombunuk, waganeegurak wone nogo, it ndak-ndak iniki panggombunuk, nggirik-nggerok porogo wonogwe iinok mban mippiyoorak op aret o.

¹⁰ Wone, “E o,” yinuk, konengga'lek logonet, inoone amburu puk-puk agan nugwi, aakumi inambokan laganggwi, eeko menggaarak ti, it ineebe apit aret kwe, it inagabolo mbanak abet mbareegwaarak nogo perak, abe iyagalo it nen aret agan nugu menggaarak.

¹¹ It aap ti, inenggali ariyak kagak, yi mendek ndi mendek kolaawok nduk, wone mamuniyak lek mendek mamunirogo logonet, aap ambi aaganapuri apit inom iniki abut lagak-mbagak aganabit nogo menggaarak me, inoone mondok lek eerogo piige logot o.

¹² It aap wone ti mendek yorogo menggaarak ambi nen ari logonet, “It aap o Kereta mendek ti, mondok pilit pugungga aret menggaarak o. Nggwiya nen yiwi-yawi ari logonet nibingge menggerak pogom it togop aret logonet, Ineenggi lebenak inalom mban koleewak menggaarak o,” yinuk,

^13-14 yereegerak nogo ti, abet aret yereegerak o. Togop me, it aap ti, wone abet mbareegwaarak nogo mondok nu'lek porogo logowak nduk, aakumi Yakuri inawoneelom mbininggo menggaarak wone inom, it aap Ala ari menggerak wone mbo punuk, iniki ugun koombunuk, “Yogop ee'nu, ndogop ee'nu,” agan nugu menggaarak wone nogo inom, “Liippuurak mage o,” yinuk, koone omaawi paga mondok inaruk wake logot o.

¹⁵ It aakumi iniki obeelom menggaarak kenok, it inigen me yi mendek ndi mendek obeelom mban aret kogo menggaarak. Ndi, it aakumi abet mbaka'lek maluk mban eeko menggaarak kenok ti, eeriyak inikime abe'nage inom, koonggwi inom, ti maluk mban aret me, it inigen me yi mendek ndi mendek maluk mban aret kogo menggaarak.

¹⁶ It aap ti nen yogo logonet, “Ala nineenu o,” yogo menggaarak kwe, it eerit nugwi paga nen perak, “Ala nineebi,” mbako logonet, yogwe yelok iigo monggoorak. Ala wone konengga'lek taganogo pit nogo logonet, obeelom ambi eekulik maluk mban eekwi me, inogole warak aret iigo monggoorak o.