Pelaareegerak 8 - Ala Wone Peenok Peebi Mbanak

Obeelom eerogo piige kenok, “Wa,” yogo logorak, wone

¹ Yorage nagagerik, ambi yorage logonet, “At Aliku ALA nen, Nggween wokkiraagin o, yinuk, kumbuk mbanogo kinombomini yoragagim o nogome ari nogo logomonggotik, unde a'nuk, kineenik obeelom aret wonogwe, kineebe ambik wigannarit nogwe, eeko logobagip nduk, wone, Yogop ee'nu ndogop ee'nu, yereegerak nogo o yogondak an mamunggirage yi, liirogon aret eerit nogo logonu o.

² At Aliku kinogoba Ala nen tu karume wokkiren wage logonet, It aakumi yi, Yogop ee'nu ndogop ee'nu, an yorage nogo liirogon porogo wonogwe iyaamun ilik, lek a? yinuk, kinikime nano wonage nogo eenu arikit nduk, kinabut mbangge, kiniki tebenak logomunggup nduk eeppinagage, eeke kagak, tahun 40 aret eereegerak nogo kiniki abe'nip o.

³ It aakumi mbi mban nunggwi iinok, ineenik logogun lek o. Ata, at Aliku ALA nen yi wone ndi wone ari nogo waganggwi iinok, mondok ineenik aret logorak nogo liippugwi, kiniki tebeppatinuk wonogwe, eeko logobagip nduk, mbi abu eerogo pinagage, ti'nuk, kit inom, kinombomini inom, kineenggo'lek mendek mbi mana wokkirage, eereegerak nogo o.

⁴ Kit tahun 40 paga wogwe kiigak, kineebe paga kinayum yirik ambi nibik yagak, kiniyok ambi piikkinakak, eerulik o.

⁵ Aap nen inapuri wone lunirogo mengga kwak, at Aliku kinogoba Ala nen wone lunggiragagerak nogo liippinip o.

⁶ Togop aret me, at Aliku kinogoba Ala kinagabiti mba'nuk, at eeriyak mbake nogo mugurok nogo logonet, wone, Yogop ee'nu ndogop ee'nu, yokkirage nogo, liippunuk, eerit nogo logomunggup o.

⁷ Yi awi ndi awi abe lombok nenaarak ti paga niyo o kobappaga nen wungge, puut-puut paga nen wundi wage, eeke logonet, niyo yenggenogo pege, eneeri wungge, niyo nggwok wage, eeke menggim inom,

⁸ pinagi namenggim time gandum wonage, waabuk negen jelai wonage, eyo anggur wonage, eyo wuli wonage, eyo delima wonage, eyo tayitun wonage, nggiin amburu wonage, apit aret wonage menggim inom, at Aliku kinogoba Ala nen wokkiren pinagi namenggerak

⁹ wonogwe kiigak, mbi noogelo ambi kinoba age, kinamendek ambi lek age, eerigin lek o. O time yugum nogo ti, mbuti mendek mban kunik wonage, ndi, puut-puut time mbuti tembaga mban wonage me, nggween kabunogo wonet nogwe, eeko logomunggup o.

¹⁰ Yi mendek ndi mendek ndonggorogon nonggo logomonggotik, kinaanoma'le ndeenggo logonet, At Aliku ninogoba Ala nen ninanggween abe wo'niragagerak me, Wa, yinuk, alut eeko logomunggup o,” yoragagerak.

ALA oba mari eerogo pugwi iyo, yoragagerak wone

¹¹ Yorage nagagerik, ambi yorage logonet, “Ala nen, Yogop ee'nu ndogop ee'nu, yereegerak wone inom, eeko logorak wone yugu inom, wone lengganak inom, an yogondak yokkirage yi, ambi taganogo punuk, at Aliku kinogoba Ala oba mari eerogo mbo pugwi kiyo, liippogo logonu o.

¹² Kinambi ndonggorogon nonggo logomonggotik, kinaanoma'le ndeenggwi, kinawi obeelom lombok wurogo patinuk wonogwe,

¹³ kinaanggumi lembu-tapi inom, kambin-ndomba inom, ambik yagabit age, kinamindik-kinamendek mbuti perak-emas ambik lombok age, eeke kenok,

¹⁴ kit o Metit inayeloman eeppinaganuk wonogwe me, wokkiren wundi wagagerak at Aliku kinogoba Ala nogo oba mari eerogo mbo punuk, kiniki tiyappatinuk logokwak, kiniki liippogo logonu o.

¹⁵ Kit kinogoba Ala nen karume iya paga waalo eyak ambik muuru inom, nggitamuru inom, ambik lombok wonage kagak wokkiren wage, nggween mbuk paga niyo ero lek aret kwe, kit nen ndonggorogon nabagip nduk, yugum enoona nen niyo eneeri warak eerogo wumbi wage, eerit tu nikkiren wage logonet,

¹⁶ peebi obeelom mban logobagip nduk, kinabut mbangge, kiniki tebeppatiyak nduk eeppinagage, eerit karume wundi wage logonet, kinombomini ineenggo'lek mendek mbi mana nabagip nduk, wokkiragagerak nogo o.

¹⁷ Kit kinikime nen mbako logonet, Nit ninobaalombok nineenggi omaawi paga nen eekkologoorak paga nineenggi warak agaarak o, yinuk, yuurak kiigirak kwe,

¹⁸ kineenggi warak logomunggup nduk, at Aliku kinogoba Ala nen eerogo pinagage nogo paga kinombomini inom wone abuk nggaruk togon kumbuk mbanogo yoragagerak nogo aberak mban logonet, omaawi eerogo puwak nduk, yogondak yi paga eeppinagage ndak-ndak aret eeppinagagin me, at Aliku kinogoba Ala paga mban aberak logomunggup o.

¹⁹ Togop aret me, at Aliku kinogoba Ala oba mari eerogo mbo pogo logomonggotik, at obaane'me kugi inalut eekwi, inayuk wukwi, eerit nogwe kiinok, kineebe abu lek aret arumunggup o, yinuk, yogondak yi paga an nen abet aret yokkiragi o.

²⁰ At Aliku kinogoba Ala oone yokkirage nogo koneniyak kineebi mbarumonggotak paga at Aliku ALA nen kit kinenggaanom paga aakumi inooreegerak togop nogo aret kineebe lek eerogo pinagagin o,” yinuk, yoragagerak.