Pelaareegerak 5 - Ala Wone Peenok Peebi Mbanak

Ala wone 10 lengganogo pugu nogo pelaarogo yoragagerak wone

¹ Muta nen aakumi Iterali mendek abok aret wiiragagerak kuwak ari wogo mbareegwa, yorage logonet, “Kit nowe-nawot Iterali mendek yi wae. Wone lengganak inom, eeko logorak wone inom, o yogondak kinaruk paga pinagage yi, kit nen liirogon mamunggologwe, kinikime liirogon woppunuk eerit nogwe, eeko logomunggup nduk, yokkirage me, kit kinaruk liirogon aret konenggo logonip o.

² At Aliku ninogoba Ala puut Korep paga nen wone abuk nggaruk togon koonogo yo'niragagerak nogo o.

³ At Aliku ALA nen wone abuk nggaruk togon koonogo pereegerak nogo ti, ninombomini inom wone koonogo puulik o. Ata, nit o yogondak nineenik wonogwe yi, ninom aret koonogo pereegerak.

⁴ Kani wunuk ari enggela'me at Aliku ALA puut paga nen kinom kinengga kunna'nuk wone mbaneegerak nogo o.

⁵ Kit nen kani omoonuk wunuk ari kinagabiti nen puut paga lagi naga'lek wonogwe me, ne ti eyom paga Aliku ALA oone ari nogo kit yokkiroorak nduk, Aliku ALA agigan wonage, ndi, kit ogugan wonogwe, eekwi kiigak, an oolo taati aret mi'ndak wonagagirak nogo o. Wonage neegak, yo'nereegerak yokkiragagirak nogo pelaarogo yokkira o.

⁶ O Metit paga inayeloman eeppinagago wonogwe me, wokkiren wundi wagagirak Naliku kinogoba Ala an aret o.

⁷ An wonage neegak obaane'me kugiwak ambi mippunuk, alut eeko logorak mage o.

⁸ Kit nen yi mendek ndi mendek agi mbogut paga menggerak inom, nggween paga yime menggerak inom, nggween abu'na niyo inikime menggaarak inom, inogut wakkagak ogobakkigirogo patinuk,

⁹ inalut eeko logonet, inabu'me tebe yi unggwogwe, inayuk wukwi, eeko logorak mage o. Naliku kinogoba Ala nalik aret neegak, nobaane'me kugiwak mippunuk, ayuk wukwi kiinok, Naliku an ALA nen, Neebi o, yinuk, nanini mbake minggirak me, yi aap ndi aap inanini nombako logonet, maluk eekwi nogo ti, it ineebe inom, inapuri inom, inombowologwe inom, it paga wiganak inom, an nen aaninggin inoba piige logogin kwe,

¹⁰ it yi aakumi ndi aakumi apit an inabuwa nen, Yogop ee'nu ndogop ee'nu, wone yorage minggirak nogo liirogon konembunuk eekwi iinok perak, inombowologwe wiganak inom apit aret niniki kunik eeginake logogin o, yinuk, yagi o, yereegerak yokkiragagirak nogo aret pelaarogo yokkirage agarik o.

¹¹ At Aliku kinogoba Ala endage we ugun yuurak ti mage o. Aap ambi nen at endage we ugun agan nage kenok, at Aliku ALA nen aap ti mondok maluk eeppigin o.

¹² At Aliku kinogoba Ala nen nogo 6 yippunuk, ko'lu ti, nake leenak aret me, abeko logomunggup o, yokkiragagerak nogo ndak-ndak aret eeko logomunggup o.

¹³ Ne 1 nen nok ne 6 paga ti, kineyabu eekkologwe, yi mendek ndi mendek ambi eeriyak kenok eekwi, eeko logorak op aret kwe,

¹⁴ ko'lu paga ti, at Aliku kinogoba Ala ake leenogo pateegerak me, kinayeloman mini kumi-aap kinom ndak-ndak yonggonggolaamunggup nduk, kit inom, kinapuri kumi-aap inom, kinayeloman kumi-aap inom, kinaanggumi lembu-keledai inom, kinaanggumi alik mendek inom, aap nggiru ambi kiya wogwe iinok inom, abok aret yonggonggologwe puk logomunggup o.

¹⁵ Kit maan o Metit paga inayeloman eeppinagago wonogwe me, at Aliku kinogoba Ala eenggi omaawi paga eeppiige, eenggi titik eeke kenok eeppiige, eerit wokkiren wundi wagagerak abeko logonet, at Aliku kinogoba Ala nen nogo 6 yippunuk, ko'lu paga yonggonggologo logorak lengganogo yokkiragagerak nogo eeko logomunggup o.

¹⁶ At Aliku kinogoba Ala nen kinanggween wokkiraawam time logonet, yi wone ndi wone kinoba aga'lek kineebe obeelom li a'nuk kanggo logomunggup nduk, at Aliku kinogoba Ala nen yokkiragagerak ndak-ndak kinagalo-kinogoba inayuk wuko logonet, inoone liirogon aret konenggo logomunggup o.

¹⁷ Aap wariyak mage o.

¹⁸ Kumi ugun wurinaburak mage o.

¹⁹ Yi mendek ndi mendek yogoot kiraariyak mage o.

²⁰ Kit kinore ambi eeremenggerak kinigen liirogon koolik kagak aap owak loongga pilit wone inom nabenogo yoroorak mage o.

²¹ Aap ambi akweeluk a, awi wurik a, eyabu yarak a, ayeloman kumi-aap a, aanggumi lembu-keledai a, amindik-amendek abok aret kiniki nen uugwe-uugwe mbako logorak mage o.

²² Ndi, kit wonogwe abok aret puut abu'me wonogwe kiigak, kani wunuk ari, ndugwi kwak ka'luk kwit agan lagangge, o apit age, eeke enggela'me at Aliku ALA oone nggwok paga, Yogop ee'nu ndogop ee'nu, yinuk, wone yokkiragagerak koneneegutak nogo ti aret o. Alik ambi inom wonage abu lek o. Wone ti abu aret yokkirage nagagerik, yugum tabak mbere paga liiru mbanogo an wo'nereegerak nogo o.

Iterali inagabiti mbareegwaarak pelaarogo yoragagerak wone

²³ Ti'nuk, puut ti paga kani omoonuk wunuk ari kagak, o apit aago enggela'me nen oone ari konembunuk, aap kinanebunu loguk unde menggaarak nogo inom, aap kinoweewi wone koongga nogo inom, it apit aret an nowagam wogo nogogwaarik,

²⁴ yo'nogo logonet, At Aliku ninogoba Ala abu nggwok endage mondok tiyanak kenok, Wi, ugwi nogo ninigen abet nen aret kogwe, kani omoonuk wunuk ari enggela'me nen oone ari ninaruk konenggwi, eekoorak me, ne yogondak yi paga aret Ala aakumi inom wone mbanggwi iinok, aakumi kangga'lek ineenik logorak aret iigo o.

²⁵ Togop aret kwe, o yogondak yi paga kani omoonuk nggwok lombok wunuk ari yi paga yoguk togon eerogo pinaniyak kagak, nonggop nduk, at Aliku ninogoba Ala oone ari ninaruk konenggwi niigak, nggorek lombok age me, nit kambugun aret kogo o.

²⁶ At eenik menggerak Ala nogo kani wunuk ari enggela'me nen oone ari nit konenggwi kwe, kangga'lek nineenik wonogwe yi kwak, aap kanggo menggaarak mendek ambi ta nen togop konembunuk, kangga'lek wonage mbakop?

²⁷ Lek aret me, kat Muta mban at Aliku ninogoba Ala oone ari abok aret konengge logomenggendik, yokkege nogo nit yo'nirage kenok, nit konenggwi, eebe aret eekwi, eerugun me, kat kalik aret at owagam nage logot o, yinuk, an yo'nereegutak nogo o.

²⁸ Yo'nereegutak nogo, at Aliku ALA aruk konengge nagagerik, an yo'nege logonet, It aakumi wone kat yokkugwi ti, an muk konenggirak me, it wone yagaarak ti abok op aret o.

²⁹ It ineebe inom, inapuri inom, yi wone ndi wone inoba aga'lek ineebe mondok obeelom logowak nduk, inagabiti nombakwi, Yogop ee'nu ndogop ee'nu, wone yugu apit aret liirogon porogo wonogwe, eeko logowak lak, ai, mbake agarik o.

^30-31 Togop me, o an wogorage it unde a'nuk logowam time logonet, Yogop ee'nu ndogop ee'nu, wone yugu inom, wone lengganak inom, eeko logorak wone inom, eerit nogo logowak nduk, mamunirage logorak wokkirikit nen it aakumi inawooliya lombok iniyokan nawak nduk, yora nage logomenggendik, kiyokan woraamunggun o, yinuk, yo'nege mbareegi, yokkiragagirak nogo o.

³² Togop me, at Aliku kinogoba Ala nen wone lengganogo yokkiragagerak ti, mugurok nogo logonet kina agigan ogwe, ogugan ogwe, eeka'lek wone ti abok aret liirogon eeko logomunggup o.

³³ O kit unde a'nuk logowam time logonet, yi wone ndi wone ambi kinoba aga'lek kineebe kineenik ambinom logomonggotik, li a'nuk kanggo logomunggup nduk, at Aliku kinogoba Ala nen wone lengganogo yokkiragagerak ti, abok aret mugurok nogo logomunggup o,” yinuk, yoragagerak.