Pelaareegerak 30 - Ala Wone Peenok Peebi Mbanak

Inomaluk mbo punuk, yungguninuk wogwe iinok, obeelom eeppiige logorak wone

¹ Yorage nagagerik, ambi yorage logonet, “At Aliku kinogoba Ala nen kit mak eerogo yi aakumi ndi aakumi inenggela'me nappinagamenggerak time wonogo logonet, Ala ale'nggen nen obeelom eerogo pinagarak wone inom, pulunogo pinagarak wone inom, yogondak an nen yokkirage yi, abu aret kinoba age kenok, Nit ndogop eekoorak paga ee'ninake kogo o, yinuk, mbako logomunggup o.

² Ndi, kit inom, kinapuri inom, Eeko logorak, an nen o yogondak yokkirage yi ndak-ndak, at Aliku ALA oone ari nogo kinaruk konenggo logomonggotik, kineebe kiniki abok aret at mban wogo'nuk, yungguninuk Ala mugurok wogwe kiinok,

³ at Aliku kinogoba Ala nen kinabuwa mba'nuk, kit aakumi inenggela'me mak eerogo pinagamenggerak nogo kuwak eerogo wokkiren kiniyokan pinagi wage logomenggerik, aa'nduk wonogogutak togop nogo aret obeelom eerogo pinagagin o.

⁴ Ndi, kit ando nggween irip me mak eerogo pinagamenggerak nogo kunduk, ne ambit ti paga mban kuwak eerogo wokkiren,

⁵ at Aliku kinogoba Ala nen kit kinombomini inanggween wogoramenggerak unde eeppatinuk logomenggaarak nogome, kit unde eeppatinuk logomunggup nduk, pinagi wage logomenggerik, kinombomini ineebe mbereeluk logomenggaarak kwe, kit perak, kineebe ambik lombok arumunggup nduk, obeelom eerogo pinagage logogin o.

⁶ Eerogo pinagage kenok, kit kineenik wonogo logonet, kiniki kineebe abok aret at Aliku kinogoba Ala kiniki kunik logomunggup nduk, at Aliku ALA nen kit inom, kinapuri-kinombowologwe inom, aakumi inagabolo mbanggo mengga kwak kiniki omaawi wonage nogo lek eerogo mbo pege,

⁷ at Aliku kinogoba Ala nen it ineebi kinomba'nuk, piyak-payak eerogo pinagagwi kinawim nogo pulunogo piige, eeke logogin o.

⁸ Kit nen yungguninuk Aliku ALA owagam woraanuk, Yogop ee'nu ndogop ee'nu, yinuk, wone yugu an o yogondak yokkirage yi, liirogon konembunuk, eekwi kiinok,

⁹ at Aliku kinogoba Ala nen kit yi mendek ndi mendek eekwi inom, elege ndaganako menggam inom, kinaanggumi nda'nogwe inom, kinanggween paga yi awi ndi awi yarumonggotak inom, ambik lombok aruwak nduk, kinombomini inikilom paga eeppiige nagagerak nogo ndak-ndak inikilom kinombake logonet, obeelom eerogo pinagage logogin o.

¹⁰ Kit nen kiniki inom, kineebe inom, abok aret at Aliku kinogoba Ala wogo'nuk, yungguninuk, Yogop ee'nu ndogop ee'nu, wone inom, wone lengganak inom, eeko logorak wone yugu liiru mbanak wonage yi, liirogon kinaruk konembunuk, eerit nugwi kiinok, at Aliku kinogoba Ala nen obeelom eerogo pinagage logogin o,” yoragagerak.

“Kineenik logorak a, kambuurak a?” yoragagerak wone

¹¹ Yorage nagagerik, ambi yorage logonet, “Wone lengganogo an nen yogondak yokkirage yi nogo ti, kit nen eeriyak aaninggin negen, kobak ariyak negen, yokkirage lek o.

¹² Wone an yokkirage yi, kit nen, Agi mbogut paga wonage, mba'nuk, yogo logonet, Wone ti, nit liirogon konembunuk, eeruwok lak, ta nen agi mbogut paga time lagi nanuk, wonok wura wage logomenggerik, yo'nira wage,

¹³ ndi, Niyo nggwok yenggenak ene pagan wonage, mba'nuk, Wone ti, liirogon konembunuk eeruwok lak, ta nen niyo nggwok yenggenak laut nggaruk pegak time wa nage logomenggerik, yo'nira wage, eerigin mbakop? yogwe kiigirak kwe,

¹⁴ lek o! Wone nogo ti, kinikime inom, kinambe paga inom, koorok aret wonage me, liirogon konembunuk, eeko logorak mban aret o.

^15-18 Kit nen at Aliku kinogoba Ala kiniki kunik eeko logonet, at eeriyak mbake nogo mugurok nogwe, wone, Yogop ee'nu ndogop ee'nu, yugu inom, wone lengganak inom, eeko logorak wone inom, nggirik-nggerok porogo wonogwe, Eeko logonip o, yinuk, an o yogondak yokkirage yi, eekwi kiinok, kit o unde a'nuk logowam time ari unggunuk wonogwe me, at Aliku kinogoba Ala ale'nggen nen eeppinagage kagak, mbet-mbet kangga'lek kineenik logonet, kineebe ambik wiganggo logomunggup o. Togop kwe, kit nen kinogoba Ala wone liirogon konembunuk eeka'lek, mbo punuk, melak togon Ala alut eekwi obaane'me kugi ayuk wuko logonet, eekwi kiinok perak, kit niyo Yoraran enebaga wunda nogo logomonggotik, o kit unde a'nuk logowam time ari nanuk wonogwe kiigak, kit li a'nuk kambumunggup lek, kineebe mbet-mbet aret pup eerogo pinagarak an yogondak mondok kin paga yokkirage me, o yogondak yi paga aret kit nen obeelom eeppinagage kagak kineenik logorak inom, maluk eeppinagage kagak, kambuurak inom, kinoba kwippinagage me, liippogo logonip o.

¹⁹ An o yogondak mbogut inom, nggween inom, wiiraminggirak inenggaanom paga kit miikkologwe kiyaawak nduk, Ala ale'nggen nen obeelom eeppinagage kagak kineenik logorak inom, pulunogo pinagage kagak kambuurak inom, kinoba kwippinagage me, kit inom, kinapuri-kinombowologwe inom, kineenik logomunggup nduk, kineenik logorak nogo miikkolaanip o.

²⁰ Miikkologo logomonggotik, at Aliku kinogoba Ala kiniki kunik eekwi, oone ari nogo kinaruk konenggwi, at paga mban kiniki panggonak wonogwe, eerumonggotak paga at Aliku ALA nen kit kinombomini Abarakam, Itak, Yakup, inom wone abuk nggaruk togon kumbuk mbanogo, Kinanggween wokkiraagin o, yinuk, yoragagim nogome wonogo logonet, kineenik mondok li a'nuk kanggo logomunggup o,” yinuk, yoragagerak.