Pelaareegerak 18 - Ala Wone Peenok Peebi Mbanak

Ala ake pugu it Ala unde wogorogo logorak wone

¹ Yorage nagagerik, ambi yorage logonet, “It inanebunu Lewi mendek Ala unde menggaarak ti, apit aret it Iterali mendek inom ndak-ndak ineyate kwak nggween mbanak kolaagun lek me, ineyate kwak kologo logorak ti, at Aliku ALA ake kani kunggwi ando inom, alik mendek ake pi wogwe inom, it aret kologo logowak o.

² Ineyate kwak kologo logorak ti, at Aliku ALA nen wone abuk nggaruk togon koonogo yoragagerak nogo ndak-ndak at Aliku ALA eebe unde ti aret me, it inoreewi ineyate nggween kologwe time inom kologo logorak lek o.

^3-5 It inom, inapuri inom, it abok aret at Aliku ALA obaane'me ake mondok-mondok eeko logowak nduk, at Aliku kinogoba Ala nen kinanebunu lombok kiigak, it Lewi mendek mban mippiyareegerak me, it wogorogo logorak ti, aap ambi nen tapi ngguunok ilik, ndomba a, Ala ake warogo wogori wage kenok, obaak kinik inom, ondogowak inom, aanagale inom, ndi, gandum anggen aa'nduk mbanak inom, anggur amburu aa'nduk toolak inom, eyo tayitun amburu aa'nduk toolak inom, ndomba eeruwak iyaalok mbanak inom, apit aret it aap Ala unde inamendek aret me, it aret wogorogo logomunggup o.

⁶ Kit Iterali wonogwe yaga'lelo ambime aap Lewi mendek ambi wonage me, at Aliku ALA nen, O time nak o, yoremenggerak iniki nggaruk togon aret nage logomenggerik,

⁷ at oreewi Ala unde ando o time at Aliku ALA enggaanom paga ake yabu eekwi ti, inom aret at Aliku ogoba Ala obaane'me aret eeke logowak o.

⁸ Ndi, naakit nduk, ogobamini ineyate wogoreegwaarak wu kunemenggerak nogo ko'nok namenggerak kagak kwe, it aap Ala unde ando Ala ake pugu waganggwi ti ndak-ndak aret wogogo logowak o,” yoragagerak.

Ogole warak kenok, eeko logorak mage yoragagerak wone

⁹ Ti'nuk, ambi yorage logonet, “At Aliku kinogoba Ala nen kinanggween wokkirage nogome abu aret unggwi nogo logomonggotik, it yi aakumi ndi aakumi o time menggaarak nen ogole warak maluk lombok eekwi ti mendek kit ndak-ndak mamunggoloorak mondok mage o.

¹⁰ Kit kinenggela'me time it ambi nen inaagalogwe-inapuri wologwe ilik, komologwe a, agugi inake waganogo kani kumbiigwi, ambi nen iniki koombunuk kugi eeka age, ambi nen magagirak inooka age, ambi nen tili pagangga age, ambi nen kuguruwo nibininaka age,

¹¹ ambi nen yogwi inooka age, ambi nen inanggena kwaakka age, ambi nen kambeegwaarak kin aruwak nduk, eeppiiga age, ambi nen kambeegwaarak inogoma inom wone mbangga age, eeko logorak mondok mage o.

¹² Togoti mendek eekwi iinok, at Aliku ALA nen, Ogole warak o, yinuk, eebi mbake menggerak me, o kit logowam time it aakumi ogole warak maluk ti mendek eekwi paga at Aliku kinogoba Ala aa'nduk a'nuk yi aakumi ndi aakumi mugogo wumbiyaagin o.

¹³ Togop aret me, at Aliku kinogoba Ala enggaanom paga kineenik logonet, kinawinde-kinobaande eekkolaga'lek abu obeelom mban aret logomunggup o,” yoragagerak.

Ala nen yoge kagak yoraga ambi nappi woroorak wone

¹⁴ Yorage nagagerik, ambi yorage logonet, “Togop aret kwe, it aakumi inanebunu lombok o kit ari nawam time menggaarak nogo ti, magagirak inom, it aap tili pagangga inom, abet mbako menggaarak kwe, kit perak, at Aliku kinogoba Ala nen, Ti mendek eeriyak abu mage, kinombake menggerak o.

¹⁵ At Aliku kinogoba Ala nen kit kinoreewi lombok inenggela'me nen an Ala wone yokkirage minggi kwak yokkirage logowak nduk, mippege kenok, at oone aret konenggo logomunggup o.

¹⁶ Kit puut Korep paga kuwak eeppunuk, at Aliku kinogoba Ala yogo logonet, Nit kambukwak, at Aliku ninogoba Ala oone ari ninaruk konenggwi, kani omoonuk nggwok wunuk ari yi, ninigen kogwe, eeriyak nineebi o, yinuk, yogo mbareegup,

¹⁷ at Aliku ALA nen an yo'nege logonet, It nen yagaarak ti, op aret me,

¹⁸ kat nen an noone yorage menggendak kokwak, aap ambi it mendek inenggela'me nen aret an yoge neegak yorage logorak ambi leenogo mippege logominggirik, an noone, Yogop yoret o, yinuk, inikime pege neenok, yoriminggirak nogo abok aret mbininogo at owe-awot yorage logogin o.

¹⁹ Ndi, at nen an nendage paga noone yorage nogo it aakumi nen liirogon inaruk konembunuk eeka'lek iinok ti, an nen, Kit nonggop nduk wone ti eeka'lek ogotik o? yinuk, aaninggin inoba kwippiyaagin o.

²⁰ Ndi, wone yoraga ambi an nen, Togop yu o, yoga'lek neegak, agabiti lek an nendage paga we ugun aret agan nage a, an nobaane'me kugi endage kunogo agan nege a, eeke kenok perak, at kambuwak nduk warogo puurak aret o, yo'nege mbareegi, yokkiragagirak nogo ndak-ndak aret aap Ala nen yoge kagak yokkirage logorak ambi wokkiraagin o.

²¹ Togop aret me, kit kinikime nen mbako logonet, Aap Ala wone yo'nirage yi, at Aliku ALA nen yoge kagak yo'nirage ilik, lek a? yinuk, mbarukwak, kineenu ogo logomunggup nduk, yokkira o.

²² Aap ambi nen, An Ala wone yaga o, yinuk, ari logonet, At Aliku ALA endage paga aret yokkirage agarik o, yinuk, yokkiramenggerak nogo, a'me lik ari lek kenok, at Aliku ALA nen yuulik aap ti, iniki mba'nuk agabiti lek aret agan wagaarak, mbako logonet, Wi, yinuk, ayuk wuriyak mage o,” yoragagerak.