Pelaareegerak 16 - Ala Wone Peenok Peebi Mbanak

Laago endage, Obagambo Nagagerak, lako logorak wone

¹ Yorage nagagerik, ambi yorage logonet, “Tut Abip penenak oonikiya paga Aliku kinogoba Ala o Metit nen wokkiren wundi wagagerak me, tut Abip ti penengge kenok, Aliku kinogoba Ala elaago endage, Obagambo Nagagerak nogo, kinale'nggen nen lako logorak aberak aret logomunggup o.

² Laago ti, lako logonet, kit nen kambin-ndomba inom, lembu-tapi inom, inoorogo piinok, Aliku ALA nen, O yime nen mban nendage ki logowak o, yinuk, o leenogo patemenggim time nen Aliku kinogoba Ala ake laago endage Obagambo Nagagerak ti, lako logomunggup o.

³ Laago ti lako logonet, yi mendek ndi mendek piika ragi nogo inom punuk, worarogo nunggo logorak mage o. Kit aaninggin-paaninggin kinoba wonage kagak, o Metit nen mbet-mbet aret wundi wogogutak nogo, kit kangga'lek kineenik awo wonogo logonet, aberak logomunggup nduk, laago endage Obagambo Nagagerak lako logonet, oroti piika ragi nogo oroti inom pega'lek mendek worarogo nenet nogwe kiigak, ne 1 nen 7 aret ari nawak o.

⁴ Ne 1 nen 7 ari nage kuli ti paga kit kiname abok aret oroti piika ragi porogo wonogwe, ndi, ne 1 kiyoma paga ndomba warak mbanak porogo kiigak, o ko'lu kuubondendok ari nage, eeriyak mage.

⁵ At Aliku kinogoba Ala nen o wokkiraagin at leenogo puulik o ambime nen laago endage Obagambo Nagagerak lariyak ndomba warogo time pogo logorak mage o.

⁶ Ata, kit o Metit nen o kiyoma paga wundi wogogutak me, o kiyoma oonegen kilu yi nage kagak, Aliku kinogoba Ala nen, O yime nen mban nendage ki logowak o, yinuk, leenogo patemenggim nogome nen mban laago endage Obagambo Nagagerak lariyak nduk, kinaanggumi inoorogo piigo logomunggup o.

⁷ Inoorogo piinok, Aliku kinogoba Ala nen o leenogo patemenggim time nen larogo nenok, ko'lu kuubondendok kiniyokan kinawooliyana nogo logomunggup o.

⁸ Nogo logomonggotik, ne 1 nen nok 6 paga ti, oroti piika ragi inom pega'lek logonet, worarak nunggo logomonggotik, ne ambi 7 paga ti, kit yabu eeka'lek kuwak eeppunuk, Aliku kinogoba Ala alut eeko logomunggup o,” yinuk, yoragagerak.

Anggen iyaalok mbanggo logonet, laago lako logorak wone

⁹ Yorage nagagerik, ambi yorage logonet, “Anggen iyaalok mbaniyak nduk, waruk gandum owak paga pugwi eyom nen lingginit tamban 7 eeppunuk,

¹⁰ at Aliku kinogoba Ala ake laago endage Anggen Iyaalok Mbanak nogo kinale'nggen paga lako logonet, Aliku kinogoba Ala nen ale'nggen kinoba pinagage logonet, kinamendek wokkiramenggerak nogo ndak-ndak kiniki nen wonok at ake we aret pi wogo logomunggup o.

¹¹ Pi wogo logomonggotik, kit inom, kinapuri wologwe-komologwe inom, kinayeloman mini kumi-aap inom, aap Lewi mendek kinawi kota kinom logogun nogo inom, aap nggiru inom, elege moono inom, kumi nanu kinom logomunggup nogo inom, abok aret at Aliku kinogoba Ala nen, O yime nen mban nendage ki logowak o, yinuk, leenogo patemenggim at enggaanom paga time nen kinale'nggen paga laago lako logomunggup o.

¹² Kit maan o Metit aakumi inayeloman aago wonogogutak nogo abeko logonet, eeko logorak lengganogo yokkirage yi, mondok liirogon aret eeko logomunggup o,” yinuk, yoragagerak.

Ooliya wureegwaarak aberogo laago lako logorak wone

¹³ Yorage nagagerik, ambi yorage logonet, “Gandum anggen mbanogo abu aret kuwak eerogo yigiko menggam pugwi, anggur anggen mbanak kuwak eerogo aambiranggo menggam pugwi, eeko logomonggotik, kiniki ale'nggen nen ne 1 nen 7 laago endage Ooliya Wurik nogo aberogo lako logomunggup o.

¹⁴ Lako logonet, kit inom, kinapuri wologwe-komologwe inom, kinayeloman mini kumi-aap inom, aap Lewi mendek inom, aap nggiru inom, elege moono inom, kumi nanu kinawi kota kinom logogun nogo inom, abok aret kiniki ale'nggen paga laago ti lako logomunggup o.

¹⁵ Kit nen yi mendek ndi mendek nano mendek ambi eekwi, anggen mbanogo pugwi, eekwi kiigak, Aliku kinogoba Ala nen ale'nggen kinoba pinagage kenok, kinikime ale'nggen alik negen aret eekkinake kaamunggup me, o at Aliku Ala nen leenogo pemenggim time nen Aliku kinogoba Ala alut eeko logonet, kinale'nggen paga laago ti lakwi kiigak, ne 7 aret ari nawak o.

¹⁶ Kit Iterali kinenggela'me aap mban abok aret tahun ambit eerak ne kenagan, ambi laago Oroti Piika'lek kagak lakwi paga inom, ambi laago Anggen Mbanak Kuwak Eekwi paga inom, ambi laago Ooliya Wureegwaarak aberogo lakwi inom, at Aliku kinogoba Ala leenogo pemenggim enggaanom paga woraawak o. Ndi, wogo logonet, ineenggime lek we wogo logorak mage o.

¹⁷ Ata, at Aliku inogoba Ala ale'nggen inoba piige logonet, inamendek wogoramenggerak ndak-ndak aret inalitak lombok inamendek ambi Ala ake pi wogo logowak o,” yinuk, yoragagerak.

Li'lak inowak loonggo logorak wone

¹⁸ Yorage nagagerik, ambi yorage logonet, “At Aliku kinogoba Ala o wokkiramenggerak kinawi kota alitak lombok logonet, aakumi li'lak inawone amburu mbanggo logowak nduk, aap inowak loongga inom, inanebunu inalitak lombok wone lengganogo yoraga inoweewi inom, mippiyaamunggup o.

¹⁹ Mippiyamonggotak aakumi inowak loonggo logonet, maluk eerak onggo, Ndogop puurak o, yugu kagak, Puurak lek, yoruwak nduk, wu kote wogogwi nogo ti, aap inawone abe mbaniyak kagak inigen mbuk kwak liinggwi yogo logonet, kagaarogo pugwi, ndi, Ninawone op aret mbanugun, mba'nuk, nogwe nogo wi-wi eeginako logonet, Maluk eerulik kagak yogotak o, yinuk, it aap obeelom nogo inenggali wappiigwi, eeko menggaarak me, togop eeruwak nduk, wu wokkirogwe iinok waganggwi, maluk eerak onggo ndak-ndak eeppuurak kagak yiluk-yiluk awone mbanggwi, aap inetenggen pegiigak inowak loonggwi, eeko logobok o.

²⁰ Ata, kit awo kineenik logonet, at Aliku kinogoba Ala nen kinanggween wokkirage nogo unde eeppatinuk logomunggup nduk, wone li'lak abu obeelom mban inowak looninako logomunggup o,” yinuk, yoragagerak.

Ala obaane'me alik ambi mippunuk, alut eeriyak mage yoragagerak wone

^21-22 Yorage nagagerik, ambi yorage logonet, “At Aliku kinogoba Ala ake warogo wogogo menggam eraaninu time inagugi arelen imbirak tabonogo mippugwi, kinagugi yebibit mendek imbirak nabenogo kwippugwi, eekwi iinok, at Aliku kinogoba Ala eebi lombok mbake menggerak me, togop eeriyak mage o,” yoragagerak.