Pelaareegerak 10 - Ala Wone Peenok Peebi Mbanak

Yugum tabak liiru mbanak peebi Muta waganeegerak nogo pelaarogo yoragagerak wone

¹ Yorage nagagerak, ambi yorage logonet, “Ne ti eyom paga at Aliku ALA nen an yo'nege logonet, Yugum tabak mbere'ndak aa'nduk eereegindak togo'nogo ambi ogobakkigike, yugum ti, yonggolak logorak eyo paga aloobut mbangge, eeke logomenggendik, yugum tabak mbere nogo wonok an wonage me puut paga yime lagi mok o.

² Wonok lagi wage keenok, an noone yugu yugum aa'nduk liiru mbanak telenogo pegendak nogo ndak-ndak aret yugum tabak mbere paga an nen liiru mbanogo wokkege neenok, naloobut mbanemenggenom nogome yonggologo punu o.

³ Yo'nege mbareegi, an nen eyo liibu paga yonggokak aloobut mbangge, pulu paga yugum aa'nduk ogobakkigireegirak togo'nogo mbere loongge, eeke nagagirik, yugum tabak mbere nogo neenggime wonok puut paga laganeegirak.

⁴ Lagangge mbareegi, at Aliku ALA nogo eebe kani omoonuk wunuk ari enggela'me nen wone, Yogop ee'nu ndogop ee'nu, yinuk, eeko logorak wone 10 yugu nogo kit abok aret puut abu'me kuwak eerak wonogwe me, yokkirage nagagerik, aa'nduk liiru mbanogo wo'nereegerak nogo ndak-ndak yugum tabak mbere nogo paga liiru mbanogo an wo'nege mbareegi,

⁵ puut paga nen niyokan wambi wage nagagirik, at Aliku ALA nen yo'nereegerak nogo ndak-ndak aret yugum tabak mbere'ndak nogo eyo paga aloobut mbaneegim nogome mambereegirak wonage nogo aret o.

⁶ Ti'nuk, nit aakumi Iterali nogo it Yaakan mendek inaniyo ambik nggween kabunik me nogome nen o Motera ari wogo nogogurik, aap Karun nogo taati aret kangge mbareegi, o time aret nggween taambunuk, obaane'me aput Eleyatat nogo Aliku ALA unde logowak nduk, mippereegurak nogo o.

⁷ Mippogo nogogurik, o time nen o Nggurogot ari woraanuk, time nen nok, o Yotabata niyo ambik wonage me nogome aret unggwi wogogurak.

⁸ Wogo nogogurik, inanebunu Lewi mendek nen at Aliku ALA aloobut mbanak me wone yugu yonggolak wonok wogwe, enggaanom paga at ake eekwi, at endage paga inale'nggen aakumi inoba piigwi, eeko logowak nduk, at Aliku ALA nen ne ti eyom paga leenogo mippiyareegerak nogo o yogondak wonogwe yi aret o.

⁹ Togop aret me, it inanebunu Lewi mendek ti, inoreewi ando nggween unde arugun nogo kokwak, it inanggween yate kwak ambi unde arugun mondok lek aret o. At Aliku kinogoba Ala nen yoragagerak nogo ndak-ndak ineyate koloorak nogo ti, at eebe unde ti aret o.

¹⁰ Ndi, an aa'nduk puut paga wonage logonet, nogo 40 yereegirak togo'nogo aret peebi puut paga logonet, an nen wone Aliku ALA yoge nogo, at aruk konengge nagagerik, E o, yinuk, kinoorulik teppinagareegerak nogo o.

¹¹ Teppinagage nagagerik, Aliku ALA nen an yo'nege logonet, It aakumi ti, inombomini nggween, Wokkiraagin o, yinuk, an ninom wone abuk nggaruk togon kumbuk mbanogo yoragagirak nogome unggwi nogo logomenggaarik, unde a'nuk logowak nduk, Wogoren nak o, yo'nereegerak nogo o,” yoragagerak.

ALA nen yorage nogo eeko logorak yoragagerak wone

¹² Yorage nagagerik, ambi yorage logonet, “Togop aret me, kit nowe-nawot Iterali mendek yi wae. At Aliku kinogoba Ala nen kit eeko logorak kinombake nogo ti, at Aliku kinogoba Ala kinagabiti ombako logonet, Eeriyak, kinombake nogo mugurok nogwe, at kiniki kunik eekwi, kiniki inom, kineebe inom, abok aret at Aliku kinogoba Ala mban wogo'nuk, ake eekwi,

¹³ ndi, kit wone ambi kinoba aga'lek obeelom mban logomunggup nduk, Yogop ee'nu ndogop ee'nu, yinuk, at Aliku ALA nen yereegerak wone inom, wone lengganak inom, yogondak an yokkirage yi, liippunuk, mugurok nogwe, eeko logonip o.

¹⁴ Mbogut inom, mbogut irimbaga inom, nggween inom, yi mendek ndi mendek nggween paga wonage inom, abok aret at Aliku kinogoba Ala alik unde wonage o.

¹⁵ Togop aret kwe, at Aliku ALA nen kit kinombomini nogo inabuwa nggwok lombok mba'nuk iniki kunik aganake nagagerik, aakumi inanebunu andorogon wonogwe iigak, inombowologwe kit mban miirogo pinagareegerak yogondak wonogwe kit yi aret o.

¹⁶ Togop aret me, o yogondak yi paga nen kit kiniki omaawi a'nuk kinanobak yugum pogom kunggak eeriyak mage o. Ata, kinagabolo mbanggo monggotak kwak, kiniki omaawi wonage nogo lek eerogo mbo pogo logonip o.

¹⁷ Ndi, at Aliku kinogoba Ala ti, yi kugi ndi kugi at obaane'me punuk, alut eekwi nogo abok aret at abu'me iigak, at Ala alik aret irimbaga wonage o. Ndi, yi aap ndi aap yo'nggok tebenak iigak, at Aliku ALA alik tiyanak aret wonage o. At mondok tiyanak omaawi ambik mondok iya lombok me, at ambi iya, ambi meek mbake, ndi, at ambi eeppinanuwak nduk, wu wogogwi iinok wagangge, eekeelik o.

¹⁸ At nen elege moono inom, kumi togwe inom, inawone liirogon koonogo piige, aap nggiru inabuwa nen inambi noorak inom, inayum yikkoloorak inom, wogorage, eeke menggerak me,

¹⁹ kit lombok maan o Metit logonet, aap nggiru negen aret wonogogutak me, yogondak aap nggiru kinenggela'me wonogwe nogo inabuwa mbako logonip o.

²⁰ At Aliku kinogoba Ala kinagabiti mbakwi, kiniki at paga mban panggonak logonet mugurok nogwe, ndi, at endage kunogo kumbuk mbanggwi, eeko logonip o.

²¹ Tam warak inagabiti warak mendek mondok iya tit eerit nage kinigen abe nen kogogutak nogo ti, kinogoba Ala aret me, at mban wogoppogo logonip o.

²² O maan kit kinombomini ineebe we 70 iluk aret o Metit nogogwaarak kwe, yogondak perak, at Aliku kinogoba Ala nen kineebe laaluguragan mbogut paga wonage ti kokwak agago pinagagerak wonage o,” yinuk, yoragagerak.