Oteya 9 - Ala Wone Peenok Peebi Mbanak

Mbo piya namenggaarak logonet inale'nggen lek logorak wone

¹ Kit Iterali yi wae. Kwe ogonggelo mbo punuk, aap alik muguren nage menggi kwak Kinogoba Ala mbo punuk, at oone liirogon wagangga'lek logonet, Gandum agabolo mbelanggo menggam nen kwe ya wukak paga onggo kologwe kwak eekwi nogo kinikilom mbakwi me, Kit Iterali yi, kiniki ale'nggen mbakwi, Yi aakumi ndi aakumi inale'nggen nen kwirabik-kwirabok yogo mengga kwak yogwe, Eerugup o.

² It gandum agabolo mbelanogo anggen woppunuk, kit aakumi ndak nunggwi, Anggur anggen aambiranogo amburu toologo ndak nunggwi, Eerumunggup lek aret o. Ndi, anggur amburu ngget toolak ti kunduk, lek age kaamunggup o.

³ Aliku ALA nen kit Eparayim nggween wokkiragagim nogome wonogo logomunggup lek kiniyokan o Metit nogwe, Ndi, o Atiyut time nen mbi ogole warak mendek nunggwi, Eeko logomunggup o.

⁴ Kit o time logonet, Aliku ALA ake anggur amburu kilirogo pumunggup lek o. Ndi, at ake warogo wogogwi nogo kunduk, ale'nggen nen waagin lek mban. Ake warogo wogorumunggup ti, aakumi kanggwi iinok, inabugo laago larogo nonggo mengga kwak aret me, Nunggwi kiinok, maluk eerogo patumunggup o. Kit at ake pi wogwe nogo, at waagin lek kit kinalik kinake aret me, Aliku ALA awi wurik me pi unggugup o.

⁵ Togop me, “Ndi eyom paga laago lariyak o,” yugu nogo paga lakwi, Ndi, Aliku ALA alut eeko logonet, kinale'nggen paga lariyak wone yugu nogo paga lakwi, Eeko logonet Nonggop eeko logomunggup o?

⁶ Kit kineebe lek eerogo pinagagwi me nen kinagap ndakko'nok mbaganumonggotak kwe, It Metit mendek nen kineebe kuwak eerogo pinagagwi, Ndi, it o Membit mendek nen kineebe kinoorogo nggween taambinagagwi, Eerugun me, Kinamendek onggo nggwok mbuti perak yumbunogo pomonggotak nogo paga iri'ngga taanogo pege, Ndi, kinawi wurik me alok yinik-kunik eerogo pege, Eerigin o.

⁷ Aaninggin kinoba kwippinagarak eyom muk panggoni wage, Maluk eekwi onggo ndak-ndak eeppinagarak ne muk panggo yi wage, Eeke me, Kit Iterali kineenu eeppinagagi o. Kit maluk nggwok lombok eerit nugwi, At kineebi lombok ombakwi, Eekwi me, At nen yorage kagak yokkiraga nogo ti, “Wi nen aret ari,” mbakwi, Ndi, it aap iniki warak nen yokkiraga ti, “Iniki mbanak nen aret ari,” yogwe, Eeko ogotik.

⁸ Kit Eparayim kinarum logorak Ala nen mippiyareegerak nogo ti, it aap at yorage kagak yokkiraga nogo aret kwe, It yi tu ndi tu nogwe me abok aret yilunogo piyaawak nduk, keele pit nogwe, It inogoba Ala awi wurik me time yokkirogwe iigak, kineebi lombok inombakwi, Eeko ogotik o.

⁹ O Nggibeya mendek maluk abu iya lombok eeko nogogwa kwak kit maluk iya lombok eekko'net unggwogwe me, Kit maluk eerit nugwi nogo at Ala abeke, Ndi, kinomaluk onggo eeppinagage, Eeke logogin o.

Iterali inomaluk onggo eeppiyareegerak wone

¹⁰ Aliku ALA nen ari logonet, “O karume anggur anggen yugu kogo nagaatik, inale'nggen mbako mengga kwak, It Iterali aa'nduk lombok iige nagagirik, nale'nggen ambik mbake, Eyo wuli anggen aa'nduk yugu nogo kogo nagaatik, inale'nggen mbako mengga kwak, It Iterali inombomini iige nagagirik, nale'nggen mbake, Eereegirak kwe, Puut Peyot paga woraanuk, ogole warak kugi Mba'an ake ineebe nggomoorogo pakwi, Mugurok nogo logonet, ogole warak iniki kunik eereegwaarak nogo, ineebe ndak-ndak inogole warak aret eekkologwe, Eereegwaarak o.

¹¹ It Eparayim inendage tiyanak nogo ti, towe wiganinuk o ambi me lek ari nage menggi kwak lek ari nagin me, Amburu pege logongge, abila age, elege ndake, eeke logogin lek aret o.

¹² It inapuri ndappiinok, tawe aganabemenggaarak kwe, inenggaawak lek eerogo piyaminggirak paga leenggu maako logowak nduk, eerogo piyaagin o. An mbo piinok, mbagangge neenok, it inabuwa o.

¹³ O Tirut kwak o Eparayim ti, iri'ngga yarak enete abu abe kagagirak kwe, Yogondak perak, inapuri aret inooruwak nduk, wogoren wundi wogwe iigi o, yinuk, yegerak me, yokkiragi o,” yoragagirak.

¹⁴ Togop me, Kaliku ALA wae. Kapuri eeppiyoorak an nano nggino yokkiri o. It kumi inaagalogwe mburunogo wumbiigo logowak nduk, eeppiige, Inelak amburu lek logowak nduk, eerogo piige, Eeru o, yinuk, yokkigi o.

Iterali aaninggin inoba kwippiyareegerak wone

¹⁵ Aliku ALA nen ari logonet, “It maluk eekwi wigak yereegerak nogo ti, O Nggilagan lombok nen wigak yereegerak me, Neebi lombok inombarit wundi wage logorak iyaalok lombok nogo ti, time nen aret o. It maluk lombok eekwi ti paga an nawi wurik me nen ineebe mbo wumbiige, Ndi, inoweewi nogo nen an yorage eeriyak ineebi lombok mbako menggaarak me, It an niniki kunik eeginabigin lek mbo piige, Eerigin aret o.

¹⁶ It Eparayim mendek ti, eyo kanenep warak kwak wonogwe me, omanggen mbuk age, anggen yega'lek wonage, Eerak aret agaarik o. It inapuri ndaganabugun kwe, it paga wiganak inapuri iniki kundugu nogo inoorogo piigak mban eeke logogin o, Yinuk, yegerak me.

¹⁷ Ndi, kit nogo ti, Ala wone konembunuk liirogon eekwi lek me, Nogoba Ala nen kit mbo pinagamenggerak yi aakumi ndi aakumi inenggela'me yagak-ndagak nugu logomunggup nduk, Mak eerogo pinagagin o, yinuk, yokkiragi o,” yoragagirak.