Oteya 7 - Ala Wone Peenok Peebi Mbanak

¹ “It an napuri aa'nduk obeelom wonogogwa kwak obaane'me obeelom eerogo piige, It Iterali mendek andi lek eerogo piige, Eeriyak mbake neegak kwe, It Eparayim maluk eeko menggaarak nogo mban kin age, Ndi, it Tamariya maluk nggwok lombok eeko menggaarak nogo tena'me age, Eeke menggerak o. It nen aakumi inambokan laganggwi, aakumi iname unggunuk yogoot waganggwi, tu paga aakumi inamendek ndinogo waganggwi, Eeko menggaarak o.

² It maluk eerit nugwi abok aret an aberak minggirak nogo it liippanega'lek aret wonogo agaarik o. Inomaluk nogo nen wanggeppiinok wonage, It maluk eekwi ti, an aberak mban wonage, Eeke agaarik,” yegerak o.

Aap endagembogut awi abe nggwok wurik me eeko menggaarak nogo yoragagerak wone

³ “It maluk eerit nugwi paga inowe endagembogut ale'nggen mbake, It pilit agan nugwi paga inoweewi nagawan-nagawan inikilom mbakwi, Eeko menggaarak o.

⁴ Nogo yuwok nduk, nggigani kumbunuk, nogo yogo nagaatik, kani nogo noguk yaga'lek kunik aret wonage me, mbi worako mengga kwak, It aakumi abok aret ti, ti kwak logonet, an mbo paninuk iniki aganggen kerek togon maluk eerit nugu agaarik o.

⁵ Aap ninowe endagembogut ale'nggen agago laago lakwi eyom paga at awuri nagawan-nagawan nogo, anggur amburu nenok kumili kumbunuk ugun-ugun eerit nugwi, At meek mba'nuk eerit nugwi nogo, inom a'nuk aap wi eeko mengga kwak eerit nogwe, Eeko menggaarak o.

⁶ Lako menggam kani wunuk mban ari menggi kwak wonogo logonet, Yogop eeruwok, ndogop eeruwok, iniki aganggen kerek togon koonggo nagaatik, It eeriyak koonggaatak nogo oonikiya paga nabu agan wangge, O kubondendok paga kani wunuk ari menggi kwak aganggen eeginake kenok, eekwi, Eeko menggaarak o.

⁷ Lako menggam kani wunuk mban ari menggi kwak, it ti apit togop aret aago wonogo logonet, Inoweewi inarum waka inambeme yonggorinakwi, Inoweewi inendagembogut nogo ambi warogo pegak eekwi, Eekwi iigak kwe, It ambi nen, Yeenggwa niru o, yinuk, inoone nggwok paga an yo'nega'lek aret agaarik,” yegerak o.

Iterali inom, aakumi inom, eeko nogogwaarak wone

⁸ “It Eparayim mendek nen yi aakumi ndi aakumi inom kunggologwe, Mbi worako logonet, peenok abut lagangga'lek mengga kwak wonogwe, Eeko agaarik o.

⁹ Aakumi inambik nen it Eparayim mendek inomaawi nogo lek eerogo piigwi kwe, Yogop ee'ninaka o, yinuk, mbakwi, Ineeruwak kenen ambik wunggerak wonage kwe, Aakelo ee'ninake o, yinuk, yelok kogwe, Eeka'lek aret agaarik o.

¹⁰ It Iterali iniki wogoppako logonet, eerit nugwi ti nen, Yi eerit nage paga ndogop eekkabigin o, yorage menggerak kwe, Iniyokan inogoba Naliku an Ala mu'neren wogwe, An kwaa'nabit wogwe, Eeka'lek aret menggaarak o.

¹¹ It Metit mendek nen yeenggwa nira woraawak o, yinuk, yora nogwe, Ti'nuk, it Atiyut mendek nen yeenggwa nira woraawak o, yinuk, inowagam nogwe, Eekwi me, It Iterali ti, towe puume iniki lek we negen wi-wi eeppuurak kwak wonogo agaarik o.

¹² Togop eekwi iigak, an nayum towe yilunggaga nogo mbiganogo inoba nappege, Yum mbiganogo pegaatak towe yonggo'nage kenok, nigogo wuppi wogo mengga kwak eerogo piige, Eeke logominggirik, It maluk eerit nogwe nogo aaninggin inoba kwippiigak eeke logogin o.

¹³ It an mbo paninuk nomo agan nogogwaarak me, inabuwa o! An yorage nogo, Eeriyak, ineebi mbareegwaarak me, ineebe lek eerogo piyaagin o. Inagap ndarogo piyaakit lak, ao, mbake kwe, an nenggaanom paga inoone pilit mban yo'nogo menggaarak o.

¹⁴ It nen, Ninogoba yeenggwa niret o, yinuk, iniki abe paga yo'nugwi lek o. Ata, an mbo paninuk, gandum inom, anggur amburu ngget toolak inom, Inambik inagugi nen wo'niraawak o, yinuk, It nogo yogo menggam logonet le yogwe, Ineebe nggawi penek eerogo pakwi, Eeko menggaarak o.

¹⁵ An nen it eeko logorak mamuninake, Ineenggi omaawi logowak nduk eerogo piige, Eereegirak kwe, An maluk eeppaniyak mban koonogo pogo menggaarak.

¹⁶ An Tiyanak Lombok Minggirak nen yeenggwaaraakit nduk, yo'nugwi lek mbo panugwi me, It ti, maale nambukaatak tak mbilak wuk ari menggi kwak wonogo agaarik o. Inoone maluk mendek mban agan nugwi ti paga inoweewi inendage warak nogo wooluwak paga warak wanggo logogun o. Ti eekwi paga o Metit time nen inagi'ndok kanggo logogun o, yinuk, yegerak me, yokkiragi o,” yoragagirak.