Oteya 6 - Ala Wone Peenok Peebi Mbanak

¹ “It nen yogo logonet, At nen nibik-nobak eerogo pinaneegerak kwe, obeelom eerogo pinanege, At nen yawi ninooreegerak paga ninawin agagerak nogo nggerenogo pinanege, Eerigin me, Ninomaluk mbo punuk, niniyokan at Aliku ALA mugurok nawok o.

² Mugurok nogwe niinok, nogo mbere yippunuk, nineebe andi lek eerogo pinanege, Ndi, nogo mbere yippunuk ko'lu nit ninomaawi eerogo mippinanege, Eeke logomenggerik, Ninarum wonage kagak, eerit nogo logogun o.

³ Togop me, At Aliku ALA ti, nit ninogoba aret o, yinuk, paganggwi, At eeke menggerak nineenu arit unggwogwe, Eeko logowok o. Ti eekwi niinok, oonegen lagi wage logonet, eya pindanogo pege menggi kwak at abet aret niya wage, O mayu wage menggim age kenok, mbogut paga nen mayu wuranet wage menggi kwak ninowagam wage, O kibi wonagaatik, o mayu wage logonet, nggween miin eerogo pege menggi kwak, at nen obeelom eerogo pinanege, Eerigin o, Yinuk, yogo agaarik o.

⁴ It Eparayim mendek ti, an nano eeppiyoorak mbako agaarik? Ndi, it Yekura mendek kunduk, nonggop eerogo piyoorak mbako agaarik o? O wege paga tit nake nagaatik, lek age menggi kwak, Oonikiya konaananggen luurogo pege nagaatik, kubondendok lek age menggi kwak, It iniki kunik ee'nakwi ti, togop aret agaarik o.

⁵ Togop me, it aap an yorage neegak yoraga nen inoone andiigwi yorogo logowak nduk nappiya wage, Noone ari minggirak paga nen inoorogo negen piige, O yabok aakumi inoba pindanogo piige menggi kwak, eekaatak onggo eeppiyoorak koonogo pigirak nogo ti, togop aret inoba kwippiige, Eereegirak o.

⁶ It nen tapi-ndomba nake warogo wo'nugwi ti, an uugwe lek o. Ata, Iniki kunik ee'nako logonet, noone liirogon mugurok nawak lak, ao, mbake, Inaanggumi warogo nake kani kunggwi ti, uugwe lek o. Ata, it nen, Nogoba ti, Ala aret o, yinuk, yuwak lak, ao, mbake, Eeke agarik, yegerak me, yokkiragi o,” yoragagirak.

Eparayim mendek inomaluk mbo puurak ineebi mbareegwaarak wone

⁷ “At Aram noone tagambunuk maluk eereegerak nogo kwak, it ninom wone abu nggaruk togon koonogo pereegirak nogo taganogo mbo pugwi, O time nen liirogon mu'neren waga'lek mbo panugwi, Eereegwaarak o.

⁸ O kota Nggileyat ti, aap maluk eeka mban yagabit aago menggam o! Aakumi inooko menggam aret me, iniyok a'lip ti, inamiya labunik mban aret menggerak o.

⁹ It aap an neebe unde nogo ti, aap a'nggan wogonaka enaarak mengga kwak logonet, Tu Tikem nogo menggam paga aakumi inoorogo piigwi, Eekulik kagak inenggali lek eerit nugwi, Eeko agaarik o.

¹⁰ It Iterali wonogwe inenggela'me time ogole warak mendek eekwi iyareegirak nogo ti, It Eparayim mendek nen kumi ya wuginakak eerit nugu mengga kwak, an mbo paninuk maluk eerit nugwi, Ndi, it Iterali inalik nen aret maluk eerogo pakwi, Eekwi ti aret o.

¹¹ It Yekura mendek kunduk, maluk eekwi onggo inoba kwippiyoorak ne muk punik wonage agaarik,” yegerak me, yokkiragi o.