Oteya 2 - Ala Wone Peenok Peebi Mbanak

¹ Togop me, kat nen, Kit Ala apuri o, yinuk, koreewi yorage, ndi, Ala kinabuwa mbaka o, yinuk, kiriwi yorage, eerumunggun o,” yinuk, yoreegerak.

Iterali aa'nduk wonogogwa kwak eerogo piyoorak wone

² At Aliku ALA nen ari logonet, “It inagalo ti, an nakwe lek o. Ndi, an kunduk at ogonggelo lek mban me, Inoone nabek togon yogwi, nabek togon yogwi, Eeko logowak o. Kwe ya wukak enete kumbunuk eerit nege nogo mbo pege, Terak wu'naka logokit, mbake nogo tayoppege, Eeruwak o.

³ At togop aret eerit nege kenok, an nen at agabolo kin eerogo pege, At nda'nage logonet, agabolo kin nda'nagagi kwak togop eerogo pege, At karume kwak eerogo pege, Nggween ka'let-nggaganak kwak eerogo pege, Eerigin me, At niyo abu nen kambuwak nduk mbo pigin o.

⁴ At aagalogwe kunduk, terak eeginaka aret wonogwe me, an nen it inabuwa mbarigin mondok lek aret o.

⁵ It inagalo ti, kwe terak wuka nege logonet, aagalogwe ndaganabeegerak me, Aagalogwe ti, inenggali mbakak nugu agaarik o. At nen, It aap iniki kunik ee'nako logonet, nambi inom, Naniyo inom, nayum yuurak ndomba eeruwak inom, ligi abe yawenak inom, nagabolo paga eekak amburu inom, anggur amburu an noorak toolak inom, Wo'nogo menggaarak nogo aret muguren nage logogin o, yinuk, yereegerak me,

⁶ an nen at aru nage menggim non mbanogo alok mban mik-kwit eerogo pege, At wundi noorak tu yelok kage kero, yugum pak yendok-wandok wurogo pege, Eerigin o.

⁷ It at iniki kunik eekwi nogo muguren namenggerak kwe, inom lambungge, Kwaaganabit namenggerak kwe, ambit iluk ambi kwaakkage, Eerigin lek o. Togop me, at nen, Nore aa'nduk nimbirak logonet op aret wonagagirak o. Ndi, neebe yogondak wonage yi, nale'nggen lek aret wonage me, niyokan nogonggelo aa'nduk wogo nogo ka naakit o, yinuk, yigin o.

⁸ Gandum inom, anggur amburu ngget toolak inom, tayitun amburu toolak inom, wogoge nagagirak nogo ti, At Ala nen aret wo'nege kagi, yinuk, ari, Ndi, inagugi Mba'an ayuk wuko logonet ake pogo nogogwaarak mbuti perak inom, mbuti emas inom, kalo logonogo wogoge nagagirak nogo ti, Ala nen aret wo'nereegerak kagak, eereegirak kagi, yinuk, ari, Eeka'lek aret agaarik o.

⁹ Togop me, anggen mbaniyak eyom age paga nambi gandum nogo ndinogo kolage, Anggur amburu eerogo piminggirak it tookkoloorak eyom age paga an aret wagangge, Ndi, ndomba eeruwak inom, ligi yawenak inom, nogo paga at amendek nobakkolaawak o, mba'nuk pipuk eerogo piminggirak nogo aret wagangge, Eerigin o.

¹⁰ Eeke logominggirik, at iniki kunik eeko menggaarak nogo inigen iigak, At amendek kin eerogo pege neenok, Aap ambi nen, Eekulik mendek togop eerogo puurak mage o, yinuk, an yo'nirugun lek aret o.

¹¹ Ti eeke logonet, iniki ale'nggen nen tahun ambi eekak paga lake inom, Tut ngget penengge paga lake inom, Nogo 6 yippunuk, ko'lu yonggonggologo logorak yugu paga eeke nogo inom, Ale'nggen nen laago nggwok lake logorak yugu abok aret an lek eerogo pigin o.

¹² Ndi, It iniki kunik nen ee'nakwi onggo eyo yi aret wo'nireegwaarak o, Yinuk, yereegerak ageyo anggur yarak inom, ageyo wuli yarak inom, abok aret maluk eerogo punuk, Eyoongga negen eerogo piminggirak me, it ndiimbu-nggwiya nen lek eerogo nonggo logogun o.

¹³ At nen obari abe kaga it kugi Mba'an inake kani kungge, Obaanggi-obaangge eeke logonet, iinggen enggaanok me yikkolage, aruk ayo eekkolage, Eeke nagaatik, It at iniki kunik eeko menggaarak nogo muguren nage logonet, ami eerogo mbo paneegerak me, An nen aaninggin at oba kwippigin o,” yinuk, at Aliku ALA nen aret yereegerak o.

Ala apuri iniki kunik eeginaburak wone

¹⁴ At Aliku ALA nen ari logonet, “An togop aret eerigin kwe, ti'nuk, O karume time nimbirak nawok o, yinuk, Noone yanggik-yanggok yo'nuk, wonok wundi nage logominggirik, O karume time nen at abuwa mbake logonet, noone yanggorogon yoge logogin o.

¹⁵ Time nen eyabu anggur yarak waganeegirak nogo obaane'me wogoge, O Aaninggin Eeppiiga Kobappaga nogo ti, obeelom eerogo piiga iniki lunik logowak nduk eerogo pege, Eerigin o. Ti eeke neenok, time nen at tawe logonet, Eo, yinuk, iniki kunik ee'nake, At o Metit nen wundi wage logonet iniki kunik nen noone liirogon konengge, Eeke nagagi kwak Togop aret eeke logogin o,” yinuk, yereegerak o.

¹⁶ At Aliku ALA nen ari logonet, “Ne ti eyom paga at nen, Nombo agugi o, yinuk, an yo'nirigin lek o. Ata, Kat nogonggelo aret, yo'nirigin o.

¹⁷ At ambe paga kugi Mba'an inendage ari menggerak nogo an lek eerogo pigin me, At kugi Mba'an inendage kungge logogin lek o.

¹⁸ Ne ti eyom paga ndiimbu-nggwiya o karume nugu menggaarak inom, Yi towe ndi towe wiga agan nugu menggaarak inom, Yi mendek ndi mendek inaanogum nggween mbaanggagak nugu menggaarak inom, nen At ineyak mbanggwi iyo, it ninom wone mbanigin o. Yigin inom, wooluwak inom, wim eekak inom, o time nen abok aret lek eerogo pigin me, It abok aret iniki ugun tayenak logonet nogo yogo logogun o.

¹⁹ At ti, nakwe aret eerogo piminggirak me, lek arigin lek nakwe aret mondok-mondok wonage logogin o. Nakwe kat aret o, yinuk, wagangge logominggirik, At koonak mban eeppege, at eeke nogo a'me nggelok eeppege, Niniki kunik eeke, abuwa lombok mbake, Eeke logogin o.

²⁰ An nakwe aret me, niniki at paga mban aberak wonage neenok, At nen, Nogoba Aliku ALA aret o, yinuk, ari logogin o,” yinuk, yereegerak o.

²¹ Aliku ALA nen ari logonet, “Ne ti eyom paga at oone yo'nege kenok, naruk konengge, Naruk konembunuk, o mayu wuppi woroorak mbogut yoge, Yoge neenok, mbogut nen mayu wuppi wage,

²² Mayu wuppi wage neenok, nggween miin eerogo pege, Nggween miin eerak paga gandum yarak anggen kole eerogo pege, Anggur yarak amburu ngget tooluwak nduk eerogo pege, Tayitun amburu tooluwak nduk, eyo amburu eerogo pege, Eerigin me, Yi mendek ndi mendek yarak abok aret, Ala nen aret yakerak me, Yiteren yi aret o, yinuk, inale'nggen kogo logogun o.

²³ Eerit nage paga nale'nggen kaakit nduk, an napuluk ti, Anggween paga time aret logowak nduk eerogo pege logominggirik, Aa'nduk endage, Abuwa lek, tooneegirak nogo, abuwa nen niniki kunik eeke, Ndi, aa'nduk endage, Napuri Lek, tooninabeegirak nogo, Napuri aret, yorage, Eeke neenok, It nen, Kat ninogoba Ala aret, yo'nogo logogun o,” yinuk, yereegerak o.