Oteya 13 - Ala Wone Peenok Peebi Mbanak

Ala anini it Eparayim inoba kwippiyoorak wone

¹ Aa'nduk it Eparayim mendek nen wone yogwe iinok, aakumi nen, “Yi yogwe yi, iya!” yinuk, inaganak wake, Iterali inenggela'me it Eparayim mendek inendage tiyak ari, Eeke nagagerak kwe, It nen kugi Mba'an ayuk wurit nogo nogogwaarak paga inenggaawak lek eerogo patit nogogwaarak.

² Yogondak kunduk, maluk ambi eekak eerit wundi wogwe, Inambuti perak paga inagugi ogut eeppunuk alut eekwi, Inayuk wuko logowak nduk, inagugi inogut abu abe lombok ineenggi amburu paga ogobakkigirogo pugwi, Eeko nagaatik, “Kugi ogut eekoorak yi, ake warogo wogogwi, Lembu aagalogwe inogut eerak ti, kineyak mbaninakwi, Ee'nip o,” Yinuk, yorogo menggaarak o.

³ Togop aret me, o wege paga tit nake nagaatik, lek age, Oonikiya konaananggen luurogo pege nagaatik, kubondendok lek age, Yi mendek ndi mendek menenggwi iigak, o wiya nen ameneno kabe'nuk nggarek ari, Kani kunggaatak ka'luk yarugu-parugu lagangge, Eeke menggi kwak, It togop aret arugun o.

⁴ At Aliku ALA nen ari logonet, “O Metit nen wogoren wundi wagagirak inogoba Naliku Ala an aret me, Nit alut eekwi ninogoba alik ambi lek Ala alik aret o, yinuk, yogwe, Ndi, ninagap ndaka alik ambi lek Ala alik aret, yogwe, Eeko logowak o.

⁵ O karume iri'ngga abu lek nggween mbuk aago kagak an aret wogoren wage logonet, inarum wonagagirak o.

⁶ Mbi wogoragagirak nogo, ndonggorogon nunggwi, Ndonggorogon nenok, iniki wogoppakwi, Eeko logonet, An inomari eerogo mbo paneegwaarak o.

⁷ Togop eekwi me, an singa kwak worak togon inoba kwi'nage, Nggeewo anini ambik kwak, tu paga enaappunuk wonage,

⁸ Nggwiya kwak beruang nogo aagalogwe kobak ogwe iinok, ngguk agan aakumi nibininake menggi kwak, An nen it Eparayim mendek inoba kwi'na'nuk, ineebe nibik-nobak eerogo piige, An singa kwak a'nuk kok tebenogo piinok, ineebe nengge, Ndi, nggwiya kwak neyak nibinik-ndelenak eerogo piige, Eerigin o.

⁹ It Iterali mendek yeenggwaaraga an nen aret ineebe lek eerogo piige me, aap ta nen it yeenggwaaraagin o?

¹⁰ It yeenggwaaroorak inowe endagembogut nggeeme wonage? It nen, Ninarum logorak ninowe endagembogut inom, ninoweewi nagawan-nagawan inom, mippinaniyak o, yinuk, Nggino yo'nereegwaarak nogo, yeenggwaaroorak ineebe nggeeme wonogwe?

¹¹ An nanini mbake logonet, inowe endagembogut mippege, Ti'nuk, niniki aagi inoba piige logonet, at eebe tebenogo pege, Eereegirak o.

¹² It Eparayim maluk eeko menggaarak nogo, an aberak wonage, Inomaluk nogo an liiru liirogon mbanogo pereegirak wonage, Eerak aret agaarik o.

¹³ Kwe elege ndarikit nduk yagan warogo ndake menggi kwak, at Eparayim nogo nda'nage logonet, andi kage kwe, Wulaga ti, iniki lek yuundurak aret me, at nda'nariyak eyom panggoni wagaarak kwe, Wundi wogo menggam ambe paga ari waga'lek aret agaarik o.

¹⁴ Aakumi kambunuk nogo menggam omaawi pippiinok wonage me nen inagap ndarogo wumbiige, Ndi, it kanggwi iyo, an nen inili eerogo piige, Eeriyak ya? It aakumi ti, an nen inabuwa mba'nuk ambinom pegiyaagin me, Kanggo menggam ti nen kugilingga inoba nappi wage, Aakumi kambunuk nogo menggam ti nen aakumi ineebe inoorogo piyoorak omaawi nappi wage, Eeruwak o.

¹⁵ It inowe-inawot inenggela'me logonet ineebe aberogon wonogwe kwe, Naliku ALA nen o wiya aganggen mendek oonegen lagi wage menggim pa'nggwe nen nappi woraminggirak karume time nen wage kenok, Inaniyo eneeri poro-poro nage, It inaniyo nggween kabunik me, amburu lek age, Eerigin o. Ndi, inamindik-inamendek onggo iya pogo menggam wonage nogo abok aret aakumi nen wonok ndi yugun o.