Oroma 3 - Ala Wone Peenok Peebi Mbanak

It Yakuri liirogon eeppiyoorak kooneegerak wone

¹ Ti kenok, it Yakuri mendek ti, we aret leenogo piyareegerak mbakop? Ndi, inagabolo mbanggwi ti, we aret mbaniyak yoragagerak mbakop?

² Lek o. It eeko logowak nduk leenogo piyareegerak nogo ti, wone ambik wonage me, yokkira o. Ambi ti, at Ala nen, “An noone it porogo logowak,” mba'nuk, unde eeppiyareegerak.

³ Eeppiyareegerak kagak, it ando nen wone ti woppunuk, liirogon eeka'lek kenok ti, nonggop mbakop? Liirogon eeka'lek kenok, at Ala nen it liirogon eeppiyoorak kooneegerak nogo, eeppiyaagin lek mbakop?

⁴ Lek o. Eeppiyaagin aret o! “Eekirak onggo eeppaniyak nogo ti, op aret mbake, Ndi, nowak loonogo punuk, aaninggin noba paniyak mbake nogo ti, a'me nggelok aret eeppanumunggun, kombake, Eeke agarik o,” yinuk, yereegerak liiru mbanak ndak-ndak it aakumi abok pilit wone yogo menggaarak kwe, Ala perak, abet mban ari menggerak o.

⁵ Nit abe koonak eeka'lek maluk eekwi paga nen Ala abe koonak mban eeke menggerak yelok kogwe kenok, nit nonggop yuurak mbakop? “At Ala anini nen maluk ee'ninake ti, at liippinanega'lek logonet, eeppinanege menggerak kogo o,” yinuk, togop yoriyak op mbakop? An yagi ti, aakumi yogo mengga kwak yagi o.

⁶ Togop yoriyak lek me, nit maluk eekwi niigak kwe, onggo maluk ee'ninake lek kenok, at Ala nen nonggop togon yi aakumi ndi aakumi inowak looninaburak mbakop?

⁷ An pilit wone ari minggirak paga nen at Ala abet mban ari menggerak kenom eeppege neenok, aakumi nen at tiyappugwi me, Ala nen, “Kat maluk eeke me, maluk onggo eeppagagin o,” yinuk, nonggop togon an yo'niriyak mbakop?

⁸ “Obeelom mendek kenom aruwak nduk maluk eeruwok, yogo menggaarak o,” yinuk, nit yaga'lek niigak kwe, ninendage maluk eeruwak nduk, yogwe, ndi, “It abet aret togop yogo menggaarak o,” yogwe, eeko menggaarak ndak-ndak, nit nen, “Obeelom mendek kenom aruwak nduk, maluk eeruwok o,” yinuk, agan nugu logorak op mbakop? Nit ninendage maluk aruwak nduk agan nugwi ti, Ala nen maluk onggo eeppiyaagin ti, op aret o.

Yi aap ndi aap maluk mban eeko menggaarak wone

⁹ Togop me, nonggop yuwok o? Nit Yakuri mban iya, ndi, it aakumi endekem konenggulik mendek ti, meek, mbakop? Mondok lek o.

¹⁰ “Aap ambit ambi iniki abe koonak wonage, Ambiriluk ambi iniki abe wonage, abu lek aret o.

¹¹ It ambi iniki warak a'nuk, eerit nugwi, An mu'neren wogwe, eeka'lek aret iige agarik o.

¹² It abok aret tu abe paga naga'lek nomoninuk alik paga nogwe, It abok ndak-ndak we aanom warogo eerit nugwi, It ambi obeelom eeriyak mbakwi, Ambiriluk ambi nen obeelom eeriyak mbake, Eeka'lek aret iige agarik o.

¹³ Inale'lok ti, aakumi nggween taanak ambe paga ari menggi kwak wonogwe, Ndi, inoone ti, pilit mban pugunit nugwi, Waalo muuru eyak inooketak kanggo mengga kwak wone agan nugwi,

¹⁴ Inikime maluk mban yagabit aago logonet, aakumi pulunogo piigwi, Inoone andiigwi mban agan nugwi, Eeko menggaarak o.

¹⁵ Aakumi maluk eerulik kagak, mbet-mbet aret inoorogo piinet nugwi,

¹⁶ Yi awi ndi awi nugu logonet, aakumi lek eerogo piinet nugwi, O yinik-minik eerogo pit nugwi, Eeko menggaarak o.

¹⁷ Aakumi iniki ugun tayenak logowak nduk, eeppiinet nugu logorak wone liippugwi,

¹⁸ Ala inagabiti mbakwi, Eeka'lek aret iige agarik o,” yinuk, yereegerak liiru mbanak ti ndak-ndak, nit Yakuri mendek inom, aakumi endekem konenggulik mendek inom, abok aret maluk eeriyak mban ee'ninake menggerak yokkiragarak nogo yokkiragi o.

¹⁹ Ti kenok, Ala nen, “Yogop ee'nu, ndogop ee'nu,” yinuk, wone Muta yoreegerak nogo abok aret it woppunuk eeko menggaarak ti, inake aret nineenu me, it yi aap ndi aap o yime menggaarak abok aret inoone lek agago piinok, “Nit abok aret maluk eekwi onggo eeppinanigin kogo o,” yinuk, yelok kaawak nduk, wone Muta yoreegerak kogo ogoorik o.

²⁰ Togop me, Ala nen wone lengganogo Muta yoreegerak eekwi paga Ala nen, “Kat aap obeelom aret o,” yinuk, yigin lek aret. Ata, “An maluk eeke minggirak aret kagi,” yinuk, yelok kogo logowak nduk, lengganogo Muta yoreegerak o.

Iniki abet mbakwi paga obeelom eerogo piyoorak wone

²¹ Ndi, yogondak perak, Ala nen aakumi obeelom agago piige ti, Ala nen lengganogo Muta yoge, ndi, it maan Ala wone yoraga nen yorogwe, eeko nogogwaarak liiru mbanak nogo ndak-ndak kin agagerak me, Muta wone lengganak nogo eekwi paga obeelom eerogo piyoorak lek o.

²² Ata, Yakuri mendek inom, endekem konenggulik mendek inom, ambi iya, ambi meek lek, ndak-ndak aret me, it abok aret iniki Yetut Keritut oba panggombunuk, abet mbakwi paga mban obeelom agago piige menggerak.

²³ Nit abok aret maluk mban eerit nogo logonet, Ala nen nit aap obeelom tiyanak logorak ninombareegerak nogo ndak-ndak aga'lek aret ogoorik o.

²⁴ Ndak-ndak aga'lek aret wonogwe kwe, at Yetut Keritut nen ninonggo mbambunuk piinogo pinaneegerak nogo paga Ala nen, “Aap yi, oba lek o,” yinuk, ninabuwa nen onggo lek we aret obeelom agago pinaneegerak wonogo ogoorik o.

²⁵ Maan aa'nduk it aakumi maluk eekwi iigak, Ala iniki yanggonak logonet, maluk onggo eeppiiga'lek teppiyareegerak kwe, yogondak perak, maluk eekwi niinok, irip kunduk eeke menggerak nineenu aruwak nduk, it Yetut abet mbakwi iinok, at amiya wundemenggerak paga it maluk eekwi nogo, inomaluk lek eerogo piige, Ala iniki yanggo ari, eeruwak nduk, Ala nen, “Yetut waruwak o,” yinuk, punogo pereegerak o.

²⁶ Togop eereegerak paga, at nen o yogondak irip kunduk eeppinanege, ndi, nit aakumi niniki Yetut oba panggombunuk abet mbakwi niinok, “Aap yi, oba lek o,” yinuk, obeelom agago pinanege, eeke kaawok nduk, eereegerak me, yokkiragi o.

²⁷ Togop aret me, alom ngge paga wogoppatiyak mbakop? Lek aret o. Ndi, wone ngge paga panggombunuk, “Wogoppatiyak lek,” yokkirage mbakop? Ala nen Muta yoreegerak wone kit eeko monggotak paga panggombunuk, “Wogoppatiyak lek o,” yinuk, yokkiragarak mbakop? Lek o. Nit abok aret niniki abet mbakwi paga mban Ala nen obeelom eeppinanege me, alom ti paga panggombunuk, “Wogoppatiyak lek o,” yinuk, yokkiragi o.

²⁸ Wone, “Yogop ee'nu, ndogop ee'nu,” Muta yoreegerak waganggo monggoorak paga Ala nen, “Aap yi, oba lek o,” yinuk, obeelom eerogo pinanigin ti, lek o. Ata, abet mbakwi paga mban obeelom eerogo pinanigin abet aret mbako logonet, yogo ogoorik o.

²⁹ At Ala ti, it Yakuri mendek mban inogoba mbakop? It endekem konenggulik mendek inogoba lek me nduk, yogo ogotik? Lek o. At Ala ti, it endekem mendek kunduk inogoba aret o.

³⁰ At Ala ti, ambit aret me, inagabolo mbanak mendek inom, mbanak lek mendek inom, iniki abet mbakwi paga mban, “Aap yi, oba lek o,” yinuk, obeelom agago piyaagin o.

³¹ Ti kenok, nit abet mbakwi ti paga nen wone Muta yoreegerak nogo taganogo pugwi mbakop? Lek o. Wone ti aret omaawi eerogo pogo ogoorik o.