Oroma 2 - Ala Wone Peenok Peebi Mbanak

It aakumi abok maluk eeppiyoorak wone

¹ Togop me, noreewi o. It ando kenok mban maluk agago piigo ogotik? Kit togon maluk eekulik ti lek o. Eeko monggotak aret me, kit ambi nen it eekwi togop eeko logonet aret kwe, it mban maluk agago piigwi kenok ti, kit aret maluk eekkologo ogotik o.

² At Ala ti, aakumi maluk togop eekwi iinok, liirogombo aret maluk onggo eeppiige menggerak nineenu aret o.

³ Nineenu aret me, wologwe! Kit togon togop aret eeko logonet kwe, it ambi eekwi iinok mban maluk agago piigwi kiinok ti, kit kunduk, Ala nen onggo maluk eekkinabigin lek nduk yogo ogotik ya?

⁴ At Ala nen onggo mbet-mbet maluk eeppinagaga'lek kinabuwa nen iniki yanggoppunuk, puk aret wonage me, “At oone ti meek aret,” mbako ogotik? Kit maluk eekwi kiniki koombunuk, mbo pubagip nduk, kinabuwa nen tokkiige yi, kaga'lek me, yogo ogotik?

⁵ Ala iniki togop mbake kwe, kiniki omaawi kinogogumbuk wonogwe kiinok, Ala anini nen onggo maluk liirogombo eeppiige ti eyom paga abunuk nggwok togon eekkinaburak nduk eekkolagak mban eekwi kiigi o.

⁶ At Ala nen eeremenggaarak ndak-ndak aret onggo eeppiige logogin o.

⁷ It aakumi ando nen mbako logonet, “Ala nen tiyappinanege logonet, ninayuk warak agago nabelan-kabelan wo'niraagin o,” yinuk, iniki mondok kwippunuk, puk aga'lek obeelom mban eerit nogwe iinok ti, Ala nen ineenik mondok logorak mendek wogoraagin o.

⁸ Ndi, it ando inobaalombok mban eekkoloorak koombunuk eerit nogo logonet, Ala yereegerak nogo mugurok naga'lek, maluk mban eekwi iinok perak, Ala nen, “Aap yi, abu maluk aret o,” yinuk, anini nen maluk eeppiyaagin o.

⁹ It yi aap ndi aap maluk eeko menggaarak abok aret andi-pandi aganake, aaninggin-paaninggin agago piige, eerigin nogo ti, it Yakuri mendek eeppiige logonet, aakumi endekem konenggulik mendek inom ndak-ndak eeppiyaagin kwe,

¹⁰ it aakumi obeelom eeko menggaarak kenok perak, Ala nen tiyappiige logonet, inayuk warak agago iniki ugun obeelom logowak nduk, it Yakuri mendek eeppiige logonet, aakumi endekem konenggulik mendek inom abok aret ndak-ndak eeppiyaagin o.

¹¹ At Ala ti, aakumi ineebe obeelom kero mban maleninakeelik me, togop aret eeppiyaagin o.

¹² It aakumi endekem konenggulik mendek ti, at Ala nen Muta wone lengganogo yoreegerak ineenggo'lek logonet, maluk eeko logomenggaarak paga onggo eeppiyaagin kwe, Muta wone yoreegerak mugurok maluk onggo eeppiyaagin lek o. It Yakuri mendek perak, at Muta yoreegerak wone ineenu logonet kwe, maluk eeko logomenggaarak me, at Ala nen Muta wone yoreegerak ti paga panggombunuk iniki kwaake logomenggerik, owak looninabigin.

¹³ At Ala nen Muta yoreegerak wone nogo ti, we inaruk mban konenggwi paga lek o. Ata, inikime nen liirogon woppunuk eebe aret eerit nogwe paga Ala nen, “Aap ti obeelom aret kagi o,” yinuk, yoge menggerak.

¹⁴ It aakumi endekem konenggulik mendek nogo nen at Muta, “Yogop ee'nu, ndogop ee'nu,” yoreegerak wone nogo kobak logonet kwe, it iniki nen, “Yogop ee'nu, ndogop ee'nu,” yoreegerak wone nogo ndak-ndak aret eekwi kenok ti, kobak logonet kwe, at Muta yoreegerak nogo aret eekwi me,

¹⁵ Muta, “Yogop ee'nu, ndogop ee'nu,” yoreegerak wone ti, muk inikime wonage negen logonet eekwi iigo ogoorik o. It eekwi ti, inikime abe'nage logonet, ambi, “Maluk eekirak kagi,” ndi, ambi, “Obeelom eekirak kagi,” yinuk, inikime abe'nage ti paga Ala nen wone lengganogo yoroolik aret kwe, inikime abet aret wonage negen kogo ogoorik o.

¹⁶ An wone obeelom wone yorage minggirak ndak-ndak at Ala nen it aakumi inikime kote koonggwi nogo Yetut Keritut nen owak looninaburak nduk mippereegerak nogo owak looninake eyom paga, “Ti obeelom eekirak kagi, ti maluk eekirak kagi,” yinuk, inikime nen abe'nage kaagun o.

Wone lengganak eekwi paga inagap ndakkolaagun lek wone

¹⁷ Kit Yakuri mendek perak, nonggop mbako ogotik? “Nit Yakuri mendek aret o,” yinuk, yikkologwe yi, wone Muta yoreegerak nogo paga, kiniki panggombunuk, “Ala ti, nit mban ninogoba aret o,” yinuk, wogoppakwi,

¹⁸ “Ala iniki mbake menggerak nogo nineenu o,” yinuk, yogwe, wone Muta yoreegerak wone nogo paga, “Yi obeelom o. Yi maluk o,” yinuk, yelok kogwe,

¹⁹ “Aakumi inigen mbuk mendek tu pigiren nogwe, o apit paga nogwe nogo eya paga nawak nduk eya aganakwi, eeko monggoorak, nit yi aret,” mbakwi,

²⁰ “Nineenu ariyak wone inom, Ala ndogop menggerak wone inom, wone lengganogo Muta yoreegerak ti paga mban wonage nogo nit aret porogo wonogwe me, nit mban nineenu,” mba'nuk, “Aakumi kobak mendek nogo mamunirogwe, iniki kole aga'lek nogo, iniki kole eerogo piigwi, eeko monggoorak nit aret o,” yinuk, yogwe, eeko monggotak o.

²¹ Ti eeko logonet kwe, kit mamunggolaga'lek logonet inambik kenok mban mamunirogwe ti, nonggop nduk eeko monggotak? “Yogoot waganggwi ti mage o,” yinuk, mamunirogo logonet kwe, kit nen aret yogoot waganggo monggotak.

²² Kit nen aret, “Mbabi eeriyak mage o,” yorogo logonet kwe, nonggop nduk kit aret mbabi eeko monggotak? “Kugiwak ogole o,” yogo monggotak kwe, kit aret kugi awi wurik me unggunuk, kugiwak nogo aret kiraakko'nok wunggo monggotak nogo lek a?

²³ “Wone at Muta yoreegerak nogo, unde nit aret o,” yinuk, wogoppako logonet kwe, wone ti, taganogo punuk, Ala meek eerogo pugwi ti, nonggop nduk eeko monggotak?

²⁴ “Kit eekwi paga it endekem konenggulik mendek nen Ala endage miyuk-meya eerogo pogo agaarik o,” yinuk, liiru mbanak wonage nogo kit Yakuri nen aret eekwi kiigi o.

²⁵ Kinagabolo mbanggwi ti, at Muta yoreegerak wone waganggo logonet, mbanogo nappuurak op aret kwe, wone yugu nogo taganogo mbo punuk, kinagabolo mbanggwi kenok perak, aanom warogo aret mbanggwi me, kinagabolo mbanak wonage kwe, mbanak lek negen eerogo pakwi kiigi o.

²⁶ Ndi, it inagabolo mbanggulik mendek nogo nen, “Yogop ee'nu, ndogop ee'nu,” Muta yoreegerak wone nogo waganggo nagaatik, ndak-ndak eerit nogo menggaarak kenok, Ala nen, “It aap yi, inagabolo mbanak lek aret kwe, mbanak negen aret wonogwe o,” yinuk, wogonabigin lek mbakop?

²⁷ Togop me, kit Yakuri ti, Muta yoreegerak wone liiru mbanak unde logonet, kinagabolo mbanggo monggotak kwe, eebe eeka'lek taganggo monggotak me, it inagabolo mbangga'lek menggaarak nogo nen wone eebe aret eekwi me, it nen aret kinenggali wappinagagun lek mbakop?

²⁸ It aakumi abe Yakuri ti, taani o? Ineebe ndarak we inagabolo mbanak ti paga mban, “Yakuri mendek aret o,” yinuk, yuurak meek o.

²⁹ “It Yakuri mendek aret o,” yogwe nogo ti, Muta yoreegerak wone waganggwi paga lek o. Ata, inagabolo mbanggo mengga kwak, at Ala nen Aberiniki paga iniki yanggonogo pege ti perak, abe Yakuri mendek ti aret o. It aakumi iniki togop Ala nen yanggonogo pege ti, it aakumi nen wogoppiyoorak lek o. Ala nen mban aret wogoppiyaagin o.