Oroma 14 - Ala Wone Peenok Peebi Mbanak

“Kinoweewi inabok mbaniyak mage,” yoragagerak wone

¹ Aap ambi abet mbake kwe, iniki awo kole aga'lek kinenggela'me unggwi wage kenok, kinom kuwak eeriyak op aret kwe, at iniki mba'nuk nen agan nage nogo perak, ti paga wone wariyak lek mbo pinip o.

² Aap ambi nen iniki abet mba'nuk, “Yi mendek ndi mendek ugun noorak op aret,” mbake nagaatik, nengge menggerak kwe, at ambi nen iniki abet mbake nogo awo kole aga'lek me, “We mbi-mbiingga mban naakit,” mbake nagaatik, nengge menggerak.

³ At yi mendek ndi mendek ugun nengge menggerak nogo nen, at we mbi-mbiingga mban nengge nogo, meek eerogo punuk, abok mbaniyak lek o. Ndi, at mbi-mbiingga mban nengge nogo nen, at ugun nengge menggerak nogo Ala nen, “Aap yi kunduk, an naput aret,” mba'nuk, ari me, abok mbaniyak lek mban o.

⁴ Kat ta me nduk, aap alik ambi ayeloman kagak, “Kat maluk o,” yinuk, yoriyak op mbake agandik? Ayeloman obeelom eeke kenok teppege, ndi, maluk eeke kenok wumbege, eeke nogo ti, at ogoba nen mban aret eeke menggerak kwe, at ninowe yeenggwaage kenok perak, obeelom eeremenggerak me, eeke logogin aret mbaki o.

⁵ It ando nen, “Ne yi paga eeriyak op, ne ti paga eeriyak mage o,” yinuk, yogwe, ndi, it ando nen, “Yi eyom ndi eyom ugun eeko logorak op o,” yinuk, yogwe, eekwi me, kit kinalitak lombok kiniki nen, “An yi aret eeke logokit o,” yinuk, liirogon koombunuk, eeko logonip o.

⁶ It ando nen, “Ne yi paga yi eekak ndi eekak eeriyak mage o,” yinuk, yogwe nogo ti, ninowe endage tiyak yuwak nduk, yogwe me, ti op aret yogwe o. It ando nen, “Yi mendek ndi mendek ugun nonggo logorak,” mbakwi nogo ti, “Ala wa,” yinuk, nunggwi me, ninowe endage tiyappogo logonet, aret nunggwi o. Ndi, it mbi-mbiingga mban nunggwi nogo ti, it kunduk, “Ala wa,” yinuk, nonggo menggaarak me, ninowe endage tiyappogo logonet aret nonggo menggaarak.

⁷ Nit ninake nen nineenik wonogwe, nit ninake nen kanggwi, eekulik o.

⁸ Ata, nineenik logorak kenok ti, ninowe ake aret wonogwe, ndi, kambuurak kenok ti, at ake mban kanggwi, eeko monggoorak me, nineenik wonogwe kenok, kanggwi kenok, ti ninowe ake mban aret o.

⁹ It kambeegwaarak inom, nineenik wonogwe inom, ninowe aret a'nuk abu'me pinanikit nduk, at Keritut kangge nagagerik, eenik mi'nagagerak me, nineenik logorak inom, kambuurak inom, at ake mban aret ogoorik o.

¹⁰ Nit abok ndak-ndak ninowak loongge menggim Ala enggaanom paga mi'narugun me, kit nonggop nduk nabok-kabok yogwe, nonggop nduk kinoreewi miyuk-meya eerogo piigwi, eeko ogotik?

¹¹ Ala nen ari logonet, “It aakumi abok aret nabu'me inendobanggun yindu yi wogwe, It abok an nenggaanom paga eeko nogogwaarak nogo paganggwi, Eeko logogun o, yinuk, An neenik minggirak Ala nen mondok abet aret yokkigi o,” yinuk, yereegerak liiru mbanak wonage me,

¹² nit abok ninalitak lombok eeko logomonggoorak nogo, Ala nen, “Paganogo yo'ninip o,” yinuk, yo'nirage mbaremenggi, paganogo yorugun o.

“Kinoreewi inaru non mbambiyoorak mage,” wone

¹³ Togop me, nit-nit aret nabok-kabok yogo logorak mage o. Ata, nit ambi eerumonggoorak paga ninoreewi iniyogobit lik togon yigeebu wuppiigwi, inaru non mbanogo piigwi, eekwi niyo, liippogo logowok o.

¹⁴ Yi mendek ndi mendek aburen mage ageelik o. Aakumi nen, “Yi mage o,” yinuk, iniki aberak wonogwe iinok ti, “Mage mendek aret age menggerak o,” yinuk, an nen yokkirage lek o. Ata, ninowe Yetut nimbirak ambit a'nuk yo'nege kenok, “Abet aret kagi,” yinuk, yokkirage agarik o.

¹⁵ Kinoreewi nen, “Noorak lek,” mbakwi iigak, kit nunggwi paga iniki andi eerogo piigwi kiinok, “Inoreewi inabuwa mbaka'lek nunggwi iigo,” kinombarugun o. Togop me, kinoreewi nogo ti, Keritut it togon inake kambeegerak aret me, kit nunggwi paga maluk eerogo piyoorak ti mage o.

^16-17 Nit we yi mendek ndi mendek nunggwi paga Ala nen liippinaninuk abu'me pinanegeelik o. Ata, Aberiniki ninom kunik logonet, Ala wone yugu ndak-ndak eeppiinet nugwi, Ala ninom lambumbinaneegerak me, niniki ugun tayenak logonet, eerit nugwi, ndi, niniki ale'nggen logonet eerit nugwi, eeko logowok nduk, abu'me pinanege menggerak me, kit nen, “Yi op eeriyak,” mba'nuk eerit nugwi kiigak, aakumi nen, “Ti maluk eeko agaarik o,” yinuk, yogwe iinok, inoone konenugup o.

¹⁸ Keritut ake eerit nage logonet, wone ti, liirogon eekwi kiinok, Ala nen ale'nggen kinombake, ndi, it aakumi nen togon, “Op aret eekwi,” kinombakwi, eeko logogun o.

¹⁹ Ti kenok, aakumi iniki ambit lambunik logowak nduk, eerogo piinet nugwi, ndi, aakumi iniki eyak wat-wat yogo logowak nduk, koonogo piinet nugwi, eeriyak wone ti mendek kenok mban liirogon eerit nogo logowok o.

²⁰ Yi mendek ndi mendek nunggwi paga at Ala nen eeginabit nage nogo ale-pale eerogo puurak mage o. Yi mendek ndi mendek noorak ti, maluk lek noorak op mban aret kwe, nonggo monggotak ti paga kinoreewi iniyogobit lik togon yigeebu wuppiigwi kiinok, ti maluk aret me, noorak mage o.

²¹ Kinoreewi iniyogobit lik togon yigeebu wuppiyookwak, kit wam nunggwi, anggur amburu nunggwi, yi mendek ndi mendek eeko monggotak abok aret eekwi, eeka'lek puk logorak op aret o.

²² Wone yokkiragarak ti, kit eeko logorak op mbakwi kenok, “Aakumi inenggaanom paga lek o. Ala enggaanom paga mban eeko logowok,” mba'nuk, eeko logorak op aret o. Ndi, “Eeko logorak op,” mba'nuk eekwi kenok, “Maluk eekirak kagi,” mba'nuk, kiniki wakkoloorak mage o. Ata, kiniki ale'nggen logonet aret eeko logorak op kwe,

²³ “Nit abet mbakoorak paga noorak op aret,” mbaka'lek kiniki mbere logonet, nunggwi kiinok perak, Ala nen, “Kit maluk aret eekotak,” kinombarigin o. Yi eekak ndi eekak eerit nogo monggotak nogo abok aret abet mbaka'lek logonet, eerit nugwi kiinok ti, maluk aret mbako logonip o.