Oroma 13 - Ala Wone Peenok Peebi Mbanak

Pemerintah inoone konembunuk eeko logorak wone

¹ It yi aap ndi aap wone lengganogo yorogo menggaarak nogo ti, Ala nen koonogo mippiige lek kenok, mi'ndak wonogolik me, it pemerintah kinarum wonogwe nogo ti, Ala nen aret koonogo mippiyareegerak me, wone lengganogo yokkirogwe iinok, kit abok aret liirogon konenggo logonip o.

² It Ala nen mippiyareegerak nogo inoone taganggwi kiinok ti, Ala oone aret taganggwi me, kinobaalombok nen maluk kinoba pako monggotak.

^3-4 Togop me, it pemerintah mippiyareegerak nogo, it aakumi obeelom eekwi nen inagabiti mbaruwak nduk, mippiyoolik o. Ata, it maluk eekwi nogo, inagabiti mbako logowak nduk, mippiige menggerak me, kinagabiti lek kiniki ugun nugu logorak mbakwi kiinok, obeelom mban eerit nogo logonip o. It pemerintah ti, Ala ayeloman logonet, kit obeelom mban logobagip nduk, eeko menggaarak me, obeelom eerit nugwi kiinok ti, iniki ale'nggen kinoba pinagago logogun o. Ndi, kit maluk eekwi kenok perak, ineegin ti, we wonok nugulik me, kinagabiti mbako logonip o. Aakumi maluk eekwi iinok, Ala anini nen maluk onggo eeppiyoorak mbake nogo, it at Ala ayeloman logonet, eeppiigo logowak nduk, unde eeppiyareegerak me,

⁵ it inoone liirogon aret konenggo logonip o. Ala anini nen kit kinooke kero, kinagabiti nen konenggo logorak ti lek o. Ata, kinikime nen, “Maluk eeriyak mage o,” yokkirage kenok, konembunuk eeko logonip o.

⁶ It Ala nen mippiyareegerak nogo Ala ayeloman logonet, liirogon ninarum wonogwe kenok, ninarum wonogwe onggo wogorogo monggoorak me,

⁷ wone yugu mugurok, “Wo'niraanip o,” yinuk yokkirogwe iinok, wogorogo logonip o. Kinarum wonogwe onggo wogoraga'lek kenok, wogorogwe, yi mendek ndi mendek wonok o yime unggwit woroorak, “Onggo ndogop pinip o,” yokkirogwe iinok, wogorogwe, “Ninayuk wuko logonip o,” yokkirogwe iinok, inayuk wukwi, “Nit kinogobamini aret me, tiyappinanggo logonip o,” yokkirogwe iinok, tiyappiigwi, eerit nogo logonip o.

Niniki-kiniki kunik eeko logorak wone

⁸ Aakumi inamendek nomat woorak mage o. Nomat mbanak teenggo logorak kwak ti, niniki-kiniki kunik aganabit nogo logorak ti aret o. Niniki-kiniki kunik aganakwi kiinok, Ala nen Muta yoreegerak wone nogo, “A'me aret nggelok ari,” mbaruwok o.

⁹ Ala nen, “Kumi ugun wurinaburak mage o. Aap wariyak mage o. Yogoot kiraariyak mage o. Aap inamendek uugwe-uugwe mbariyak mage o,” yinuk, “Yogop ee'nu, ndogop ee'nu,” yereegerak wone liiru mbanak nogo eeko logonet, eeko logorak wone yereegerak alik ambi inom abok aret ti, “Ineebe iniki kunik eekkologo mengga kwak, it inom menggaarak ti, togop aret iniki kunik aganako logowak o,” yinuk, yereegerak wone lambuk togon yi paga mban wonage kenok, yokkirage agarik o.

¹⁰ It kinom wonogwe kiniki kunik aganakwi ti, maluk eerogo piyoorak nduk, eekulik o. Togop aret me, niniki-kiniki kunik eerit nogwe ti paga wone yugu liiru mbanak nogo a'me aret nggelok ari menggerak.

¹¹ “O yogondak eraambe abu alik negen arit wage kagi,” mba'nuk, niniki-kiniki kunik aganako logonip o. Ninagap ndariyak nogo ti, nda negen kagak abet mbareegurak kwe, yogondak perak, abu panggo yi wagaarak me, kit nogo yugwi negen wonogwe yi, kineenik ariyak eyom panggo yi wagaarak me nduk, yokkiragi o.

¹² O apit lek age kagak, o kilim nagaburak abu panggo yi wagaarak me, o apit paga logonet eeko mengga kwak, eerit nugwi nogo mbo punuk, o weeremenggerak eya paga wim namburuwak nduk, ineegin-inarege li'luk aago mengga kwak, kit togop aret eeppunuk logonip o.

¹³ Amburu nonggo nagaatik, kumili-kumili negen agan nugwi, ndem wappunuk, kwaanggen wako logonet, kumi ugun wuginakwi, iniki nen nengge kenok ugun eerit nugwi, ndugwi pit nugwi, “An ambi eerikit lak, at mban eeke yi, neebi a,” yinuk, agan nugwi, eerit nugu logorak mage o. Ata, o liingge paga logonet, eeko mengga kwak, nit togop aret eeko logowok o.

¹⁴ Kiniki maan mendek nen maluk eeriyak eekkinake kenok, “Niniki nengge yi, noba tayok yuwak nduk, nonggop eeri?” yinuk, koonit nugu logogup o. Ata, kineegin-kinarege li'luk aago monggotak kwak, kinowe Yetut Keritut kiniki me liinik logonet, eerit nogo logonip o.