Oroma 12 - Ala Wone Peenok Peebi Mbanak

Ala abu'me logonet, ake eerit nogo logorak wone

¹ Ti kenok, nowe-nawot o. At ninogoba Ala ninabuwa mba'nuk, nggwok togon eeppinanege menggerak me, Ala ake warogo pogo mengga kwak, kit nen, “Nineenik logonet, Ala ake mban eerit nugu logowok nduk, nineebe apit aret Ala ake leenogo pogo o,” yinuk, “Ineebe apit aret Ala wogo'nuk logowak lak, an ao,” mbake logonet, yokkirage agarik o. Ti eerumonggotak paga Ala nen, “It yi abet aret nalut ee'nakwi iigi,” yinuk, ale'nggen kinombake logogin o.

² It aakumi nggween paga mendek nen iniki mba'nuk eerit nogo mengga kwak, kit togop eerit nogo logogup o. Ata, kit alik ngget mendek eerit nogo logobagip nduk, “Niniki ngget alik ogobakkigi'ninake logot o,” yinuk, Ala yogo logonip o. Ti yorumonggotak eekkinake kenok, at Ala eeriyak mbake nogo ti, obeelom aret kogwe, eerit nogwe kiinok, Ala iniki ale'nggen ninombake kogwe, ndi, “Abu obeelom lombok koonggerak me, ambi kooniyak lek aret,” mbakwi, eeko logorak kineenu arumunggup o.

³ Ala nen, “At yi, an noone yoranet nege logowak o,” yinuk, iniki kunik en onggo lek we aret unde eeppaneegerak nogo paga kit abok aret wone ambi yokkira o. Kit obeelom wone abet mbako mbareegup, Ala eyabu eeko logobagip nduk, kinalitak lombok unde eeppinagareegerak nogo, liippunuk, “An yi aret unde eeppanegerak kagi,” yinuk, ndak-ndak eerit nogo logonet, kat mbuuluk unde eeppagareegerak kagak, “An iya lombok unde eeppanegerak kagi,” yinuk, wogoppako logogup o. Ata, “An yi aret wo'negerak me,” yinuk, kiniki tebenak logonet, eerit nogo logonip o.

⁴ Nineebe ambit aret kwe, nineenggi-niniyok yeregerak-peregerak abok aret alitik-alitak eeke menggerak ti kokwak, nit nineebe togon alitik-alitak wonogwe kwe,

⁵ nineenggi-niniyok yeregerak-peregerak abok aret nineebe ambit paga kunik menggi kwak, Keritut eebe paga kunogo pinaneegerak me, nineebe ambit aret wonogo ogoorik o.

⁶ Togop me, Ala iniki kunik nen obeelom eeppinanege logonet, nit eeko logowok nduk, ninalitik-ninalitak unde eeppinaneegerak ti ndak-ndak aret liirogon eerit nogo logowok o. At Ala wone yorogo logorak unde eeppinagareegerak kenok, kiniki Ala oba panggombunuk logonet, yorogwe,

⁷ yeenggwaarogo logorak unde eeppinagareegerak kenok, yeenggwaarogwe, mamunirogo logorak unde eeppinagareegerak kenok, mamunirogwe,

⁸ iniki eyak wappiigak yogo logorak unde eeppinagareegerak kenok, iniki eyak wappiigwi, aakumi inamendek lek wogorogo logorak unde eeppinagareegerak kenok, “Onggo wo'niruwak,” mbaka'lek we aret wogorogwe, aakumi inowe logorak mippinagareegerak kenok, kineebi mbaka'lek nggwiirit-nggwaarit eekwi, ndi, aakumi inabuwa mba'nuk eeppiyoorak kenok, kiniki ale'nggen paga aret eeppiigwi, eeko logonip o.

⁹ Kiniki laakot logonet, kiniki kunik aganako logogup o. Ata, inabuwa nen kiniki kunik aganako logonip o. Yi maluk ndi maluk eekwi ti, kineebi mbako logonet, obeelom eeriyak kenok mban kinikilom mbako logonip o.

¹⁰ Kinowe-kinawot kiniki kunik eeginako monggotak kwak, kinoreewi kinom niniki-kiniki kunik eeko logonip o. Nabu'me-kabu'me logonet, at ambi tiyappegak eeko logonip o.

¹¹ Ala eyabu eerit nogo logonet, kineebi mbakak eeko logogup o. Ata, kiniki aganggen kerek togon aret eerit nogo logonip o.

¹² Kiniki muk ambi lunik wonogwe me, ale'nggen mbakwi, aaninggin-paaninggin kinoba age kagak kinogogumbuk logonet waganggwi, tamban eeriyak mbo pega'lek kulinik-kalinik eekwi, eeko logonip o.

¹³ It Ala apuri inamendek lek kenok wogorogwe, ndi, aap nggiru kiya wogwe iinok wogonakwi, eeko logonip o.

¹⁴ Piyak-payak eekkinakwi iinok, kugi pulunogo piyoorak lek o. Ata, kinale'nggen aret inoba piigo logonip o.

¹⁵ Ale'nggen yogwe iinok, kinom ale'nggen yogwe, it le yogwe iinok, kinom aret le yogwe, eeko logonip o.

¹⁶ Kinoreewi kinom kiniki ambit eeppunuk, eerit nogo logonip o. “An iya,” yinuk, “It aap inendage lek ninom eeriyak nineebi o,” yuurak mage o. Ata, kinom aret eerit nogo logonip o. “An abu neenu me, an iya,” mbako logogup o.

¹⁷ Maluk onggo-onggo eeko logogup o. Ata, aakumi nen obeelom eeriyak mbakwi nogo mban eeko logonip o.

¹⁸ Wone ambi agaarak kat kobaalombok koonogo piyoorak wonage kenok, kinoreewi kinom kiniki ambit lambunik logonet, eerit nogo logorak wakkagak eeko logonip o.

¹⁹ Noreewi o. Nit ninogoba nen ari logonet, “Aap inane'me wakwi inom, maluk onggo eeppiigwi inom, an nen aret eeppiyaagin o,” yinuk, yereegerak liiru mbanak wonage me, maluk eeppinagagwi onggo eeppiigo logogup o. Ata, Ala anini nen it onggo eeppiyaagin me, mbo piigo logonip o.

²⁰ Ala yoge kagak aap ambi nen ari logonet, “Kinawim nogo mbi abu kenok, mbi nawak nduk, wogogwi, Niyo abu, ari kenok, niyo nawak nduk, wogogwi, Eeko logonip o. Ti eekwi kiinok, mo kik-kik negen kaawak nduk, eeppumunggup o,” yinuk, yereegerak liiru mbanak nogo ndak-ndak aret eerit nogo logonip o.

²¹ Maluk pilak ari logonet, kit tebenogo pinagage kero, puk logogup o. Ata, mi'nogo logomonggotik, obeelom eerit nugwi paga maluk nogo tebenogo pogo logonip o.