Nggalatiya 6 - Ala Wone Peenok Peebi Mbanak

Yeenggwa-yeenggwa eeko logorak wone

¹ Noreewi o. Kinore ambi perak togon yigeebu wangge kenok, kit aap Aberiniki kinom kunik monggotak nogo nen, “Noreeluk iniki nggagangge mbaki, yigeebu wanggerak nogo kokwak, an togop wangge neyo nagabiti o,” yinuk, kinoone yanggorogon awone mbanggo logonip o.

² Aaninggin kinoba age kenok, yeenggwa-yeenggwa eerumonggotak paga Keritut nen, “Ndogop eeko logonip o.” yo'niragagerak wone yugu nogo ndak-ndak aret eeko logomunggup o.

³ Kit aap iya lek kwe, “Nit iya o,” mbakwi kiinok, kit aret kinambokan laganggologo ogotik o.

⁴ Kit ambi nen at ambi eeke wakkagak eeko logogup o. Ata, kinalitak lombok eeko monggotak nogo wakkaanuk, op kenok kiniki ale'nggen mbakwi, ndi, maluk kenok mbo pugwi, eeko logonip o.

⁵ Nit ninalitak ninobaalombok koonggologo logowok o.

⁶ Nit Ala wone konenggo monggoorak nogo nen, ninamendek obeelom nogo mogonogo ninogobamini mamunnirogo menggaarak nogo wogorogo logorak ti op aret o.

⁷ Ala ambokan laganggulik kagak, ambokan laganggwi kiinok, kit aret kinambokan laganggologwe me, liippako logonip o. Aap ambi awi yaremenggerak nogo ti, anggen ti mendek aret mbanggolage menggerak me,

⁸ kit kiniki maan mendek nen eeriyak eekkinake nogo, eerit nugwi kiinok, anggen yugu maluk mendek mbanggologwe nogo kokwak, kineebe aret kambumunggup o. Ndi, Aberiniki nen yokkirage nogo mban mugurok nogwe kiinok perak, anggen yugu abe mendek mbanggologwe ti pogom, mondok-mondok kineenik aret logomunggup o.

⁹ Togop me, nit yi obeelom ndi obeelom eerit nogo logonet, anggon-panggon ee'ninake kagak, mbo pega'lek mondok aret eerit nogwe niinok, anggen yugu obeelom mbanggologwe nogo kokwak, nit onggo wo'niroorak nineenu me, ta'liila ee'ninake kenok mbo puurak mage o. Kagak aret eerit nogo logowok o.

¹⁰ It yi aakumi ndi aakumi abok aret obeelom eeppiyoorak, “Nanonggwan aga o,” yinuk, obeelom eeppiinet nogo logonet kwe, it ninom ndak-ndak abet mbakwi kenok perak, logorogon obeelom eeppiyoorak mondok aberak aret logonip o.

Oba aberak logowak nduk, irip paga yoragagerak wone

¹¹ An neenggi lombok paga liiru yo'nggok lombok mbanggiragi yi kaanip o.

¹² It aakumi nen, “Ia!” ninombaruwak nduk, wogoppatit nugwi nogo ti, Keritut eyo karo-karo paga kambeegerak wone yoranet nugwi paga piyak-payak eeginaburak inagabiti mbako logonet, “Kinagabolo mbaninip o,” yinuk, inoone omaawi paga yokkirogo menggaarak.

¹³ It inagabolo mbanak nogo nen wone Muta yoreegerak nogo ndak-ndak eeka'lek logonet kwe, kit mban eeko logobagip nduk, yokkirogwe nogo ti, “Nit ninapuri ambik aga o,” yinuk, wogoppatuwok nduk, yokkirogo menggaarak.

¹⁴ Ndi, an perak, ninowe Yetut Keritut eyo karo-karo paga kambeegerak wone nogo abet mba'nuk, waganeegirak ti paga, it nggween paga mendek nen eeko menggaarak ti, aap kanggaatak inoone yogolik nogo pogom me, it eekwi nogo an ambi eeke logokit nduk, yo'niriyak meek aret o. Ndi, an kunduk kambeegirak negen aret me, it nen an yo'nugwi nogo kunduk, koneniyak meek me, an eeke minggirak paga wogoppatiyak lek o. Ata, ninowe Yetut Keritut eyo karo-karo paga kambeegerak wone nogo mban tiyappege agarik o.

¹⁵ Inagabolo mbanak kenok, mbanak lek kenok, ti imbirak iya lek o. Ata, niniki ngget ogobakkigirogo pinanege logonet, ninobaabut koonogo pinanege ti perak, iya o.

¹⁶ It wone ti paga panggombunuk, eerit nugwi nogo inom, ndi, Iterali mendek kwe, it abet mbakwi paga Ala apuri ogwe nogo inom, yi aakumi ndi aakumi abok aret Ala nen inabuwa mbake logonet, inomaluk mbo nappunuk iniki ugun tayenak ale'nggen logowak nduk, eeppiige logogin o.

¹⁷ An Yetut wone yoranet nage paga ee'nabit nogo nogogwaarak nawin oban noba kunik yogobi wonage me, an mbo panubagip nduk, it kiniki nggagani wogwe nogo, inawone ambinom mbaniyak neebi me, mondok mbo piyaanip o.

¹⁸ Ninowe Yetut Keritut iniki kunik en eeppinagage logonet, kinarum aret logogin o. Wone ti abu aret yokkiragi o. Noreewi wa.