Nggalatiya 5 - Ala Wone Peenok Peebi Mbanak

Keritut nen wondet agago pinaneegerak wone

¹ Nit wondet aago nugu logowok nduk, Keritut nen wondet agago pinaneegerak me, eyo aaninggin tapi inuut paga pogo mengga kwak, aaninggin ambinom kinoba pinagawok nduk, “Yogop ee'nu, ndogop ee'nu,” wone yugu nogo mendek ambi yokkira wogwe iinok, inoone konengga'lek mondok kinogogumbuk logonip o.

² Kit liippatubagip nduk, an Pawulut nen wone ambi yokkira o. Kit kinagabolo mbaniyak mbakwi kenok, Keritut nen eeppinagarak mbake nogo, ambi eeppinagagin mondok lek aret o.

³ Kit kinagabolo mbaniyak mbakwi kenok, wone, “Yogop ee'nu, ndogop ee'nu,” yugu liiru mbanak nogo, ambiriluk ambi eeriyak lek ti lek mondok tigitogon eeko logorak ariyak me, mbo pubagip nduk, muk yokkiragagirak me, ne ambinom yokkiragi o, noreewi.

⁴ Wone Muta yoreegerak nogo, eekwi paga, “Noba lek, neyaawak o,” yinuk, obeelom eekkoloorak mbakwi nogo, Keritut kinom ogookkologwe me, Ala iniki kunik nen eeppinagarak kooneegerak nogo lek eerogo pako ogotik.

⁵ Nit abet mbareegurak nogo paga Aberiniki nen eeppinanege kagak, Ala nen, “Aap yi, iniki abe koonak aret o,” yinuk, obeelom agago pinaniyak nogo, “Mbet-mbet eerogo pinanuwak lak ao,” yinuk, niniki lunik logonet, tokkogo ogoorik o.

⁶ Nit Keritut Yetut ninom kunik logonet, ninagabolo mbanak kenok, mbanak lek kenok, ti iya lek o. Ata, niniki abet mbareegurak paga aakumi inabuwa nen obeelom eeppiinet nogo logorak nogo perak iya o.

⁷ Ala abet aret ari menggerak wone nogo, kit aa'nduk, kiniki aganggen paga op aret mugurok nogwe kiige nagagirak kwe, Ala wone mbo pubagip nduk, ta nen kiniki nggagambunuk nomonggiren nage agaarik o?

⁸ Ala wone mbo punuk, alik eerit nugwi nogo ti, at yonggo pinagareegerak nogo nen yokkiroolik o.

⁹ “Roti piike menggerak mendek mbuuluk roti enggela'me pugwi iinok, roti eebe abok aret piike menggerak,” nogo o.

¹⁰ Nit ninowe ninom ambit kunik me, an mbake minggirak nogo, kit ndak-ndak mbako logonet, eerit nogo logorak abet aret kinomba'nuk yokkiragi o, noreewi. Ndi, at nomonggiren nage nogo perak, Ala nen maluk onggo eeppigin me, agabiti mbake logowak o.

¹¹ Ndi, noreewi o. An perak, alom ngge paga piyak-payak ee'nakwi mbakop? An, “Kinagabolo mbaniyak o,” agan nege logonetak en, piyak-payak agago paninetak lek kwe, Yetut eyo karo-karo paga kambeegerak wone yoranet nage logonet, “Kinagabolo mbaniyak lek o,” yinuk, non mbanogo piinet nage paga, inanini nombako logonet piyak-payak ee'nako agaarik o.

¹² It aap kiniki abut laganit unggwogwe nogo, inagabolo ti mban mbaniyak lek o. Ata, eebe inom aret mbanogo nappako logowak nduk, teppiyaanip o.

¹³ Noreewi o. Kit perak, wondet aago nugu logobagip nduk, Ala nen miikkinabeegerak kwe, “An nanonggwan wondet agago paneegerak me, niniki nengge kenok ugun eerit nage logi o,” yinuk, yuurak ti mage o. Ata, nabuwa-kabuwa mbako logonet, kinoreewi kinom yeenggwa-yeenggwa eeko logonip o.

¹⁴ “Ineebe iniki kunik eekkologo menggaarak ti kwak, aakumi inom menggaarak ti togop aret iniki kunik aganako logowak o,” yinuk, yo'niragagerak nogo ti, wone yugu liiru mbanak eebe tigitogon eekwi ti aret o.

¹⁵ Kit neyak-keyak yogo logonet, at ambi nibinogo nappegak eekwi paga kineebe lek eerogo pakwi kiyo, liippogo logonip o.

Aberiniki nen ari mban mugurok noorak wone

¹⁶ Togop me, Aberiniki nen yokkirage kagak eerit nogwe kiinok, kiniki maan mendek nen maluk eeriyak eekkinake nogo, mugurok noorak eekkinabigin lek o, yinuk, yokkiragi o.

¹⁷ Niniki maan mendek nen Aberiniki warikit mbake, ndi, Aberiniki nogo nen niniki maan mendek warikit mbake, eeko logonet, imbirak wim negen ogoorak togon wonogwe me, kit eeriyak mbarumonggotak nogo, eeriyak meek aret kaamunggup o.

¹⁸ Ndi, Aberiniki nen yokkirage nogo eerit nogwe kiinok perak, wone yugu liiru mbanak nogo abu'me logomunggup lek o.

¹⁹ Iniki maan mendek paga eeko menggaarak nogo yi o. Kumi ugun wurinabit nugwi, iniki kumi paga mban lunik logonet ugun-ugun aganabit nugwi, iniki nengge kenok mugurok nogwe,

²⁰ kugiwak amili kunggwi, magagirak paga aakumi inookwi, iniki ogoorik-ogoorak wonogwe, wone wakwi, nuwa-kuwa yogwe, inanini mbet-mbet wungge, an eeke mban op mbakwi, an iya kat iya yogwe, iniki nen koombunuk pilit pugunogo agan nugwi,

²¹ neebi-keebi yogwe, amburu nenok kumili-kumili agan nugwi, kwaanggen wappunuk inoone amburu paga kumi ugun-ugun eeginabit nugwi, ti mendek abok aret it eerit nugwi iinok, at Ala abu'me piige menggim nogome unggwi nagun mondok lek aret o, yinuk, aa'nduk yokkiragagirak nogo aret yokkiragi o, noreewi.

²² Togop kwe, eyoonggen abe yi'nage menggi kwak, Aberiniki ninikime logonet, eerit nogo monggoorak nogo yi o. Aakumi inabuwa mbakwi, niniki ale'nggen mban mbakwi, niniki ugun tayenak wonogwe, niniki aanaganggenggwi lek kwi'ndak wonogwe, ninobaabut abu obeelom wonogwe, aakumi obeelom eeppiinet nugwi, liippunuk mban eerit nogwe,

²³ niniki yanggonak wonogwe, eeriyak niniki nengge kenok mbet-mbet tebenogo pugwi, eeko monggoorak ti aret o. Ti eeko monggoorak nogo eeko logorak mage yugu ambi wonage mondok lek o.

²⁴ Nit Keritut Yetut apuri kenok, niniki maan mendek paga nen maluk eeriyak niniki nengge nogo, mondok warogo tebenogo punuk wonogo ogoorik o.

²⁵ Nit Aberiniki nen pi'niren noorak mbakwi kenok, at yo'nirage nogo mban aret eerit nogo logowok o.

²⁶ Kit wogoppako logonet, an iya kat iya yogwe, at ambi eeke paga at ambi iniki warogo pegak eekwi, obeelom eeppugwi iinok, nuwa-kuwa yogwe, eeko logogup o.