Nekemiya 10 - Ala Wone Peenok Peebi Mbanak

Ineenggi amburu pereegwaarak wone

¹ Wone koonogo pogo nogogwaarik, ineenggi amburu pereegwaarak inendage yi o. An o unde minggirak Kakaliya aput Nekemiya inom, it Ala unde menggaarak Terekiya,

² Teraya, Atariya, Yeremiya,

³ Patikut, Amariya, Malikiya,

⁴ Katut, Tebaniya, Maluk,

⁵ Karim, Meremot, Obaya,

⁶ Ndaniyen, Nggineton, Mbaruk,

⁷ Metulam, Abiya, Miyamin,

⁸ Maatiya, Mbilagayi, Temaya, inom,

⁹ it aap Lewi mendek Ataniya aput Yetuwa, Kenarat apuri ambi Mbinuwi, Karimiyen,

¹⁰ ndi, inoreewi ando Tebaniya, Koriya, Kelita, Pelaya, Kanan,

¹¹ Mika, Erekop, Katabiya,

¹² Takut, Terebiya, Tebaniya,

¹³ Koriya, Mbani, Mbeninu, nogo inom,

¹⁴ it aakumi inarum menggaarak inoweewi Parot, Pakat-Mowap, Elam, Tatu, Mbani,

¹⁵ Mbuni, Atagat, Mbebayi,

¹⁶ Aroniya, Mbigawayi, Arin,

¹⁷ Atet, Kitikiya, Atut,

¹⁸ Koriya, Katum, Mbetayi,

¹⁹ Karip, Anatot, Nebayi,

²⁰ Magapiyat, Metulam, Ketit,

²¹ Metetaben, Tarok, Yaruwa,

²² Pelata, Kanan, Anaya,

²³ Koteya, Kananiya, Katup,

²⁴ Kaloketi, Pilaka, Tobek,

²⁵ Erekum, Katabana, Maateya,

²⁶ Akiya, Kanan, Anan,

²⁷ Maluk, Karim, Mbaana, nogo inom,

²⁸ ndi, it aap ando Ala unde inom, aap Lewi mendek inom, tu unggwogo menggam arum menggaarak inom, ndawi tiyangga inom, Ala awi wurik me eeko menggaarak inom, eeko logorak Ala wone yereegerak liiru mbanak nogo eeko logowak nduk, it aakumi inaagan-ambokan wonogwe nogo inom ogookko'nok ninom ogogurak inakuwi-inogonggelomini inom, inapuri wologwe-komologwe inom, it wone op woorak kenok

²⁹ abok aret inoweewi inengga warak ninom a'nuk, yogo logonet, “Eeko logorak Ala nen ayeloman Muta yoge kagak, yo'niragagerak liiru mbanak nogo mugurok nogwe, ndi, Aliku ninogoba Ala nen, Yogop ee'nu ndogop ee'nu, yereegerak inom, eeko logorak wone yugu inom, wone lengganak inom, abok aret liirogon eerit nogwe, eeko logogun o. Ndi, eeka'lek niinok, pulunogo pinaniyak op aret o,” yinuk, kumbuk mbanuwok nduk, niniki ambit eeppunuk, wone abuk nggaruk togon koonogo pereegurak ninendage nogo ti aret.

³⁰ Ndi, eeko logorak wone koonogo pereegurak eebe nogo yi aret. “Nit ninapurilogwe komologwe ti, it aap inanebunu alik mendek wogorogwe, it inapuri komologwe nen nit ninapuri wologwe kologwe,

³¹ It aakumi alik time wonogwe nogo nen gandum inom, yi mendek ndi mendek inom, kuniyak nduk, nogo 6 yippunuk, ko'lu yonggonggologwe paga inom, Ala alut eeko logorak ne leenak ti paga inom, wonok wogwe iinok, nit kunggologwe, eeko logogun lek o. Tahun 6 eeppunuk, ambi ari wage kenok kunduk, nineyabu eeka'lek puk wonogwe, ndi, ninamendek nomat ambi mbanak wonage kenok, We aret kolaanip o, yorogwe,

^32-33 Nit nen tahun ambi eekak paga ninogoba Ala awi wurik me Ala alut eeko logonet, oroti Ala awi wurik me eyo ndoonak paga pugwi, ake gandum yigirik pogo menggaarak nogo pugwi, Ala ake warogo kani kunggak eekwi, nogo 6 yippunuk, ko'lu yonggonggologwe ti paga pugwi, tut ngget penengge kenok, ale'nggen paga laago lakwi, Ne ndi paga lako logorak, wone yugu nogo ndak-ndak lakwi, Ala ake alik leenak mendek pugwi, nit Iterali Ala ninom lambunik logowok nduk, ninomaluk lek eerogo pinanegak nogo ake pugwi, eeko logorak ake kuniyak ti, Nit ninobaalombok aret o, yinuk, ninalitak lombok wu mbuti perak 4 gram aret pugwi, eeko logogun aret o.

³⁴ Nit aap Ala unde inom, aap Lewi mendek inom, aakumi ugun mendek inom, abok aret nen eeko logorak wone yugu liiru mbanak wonage nogo ndak-ndak, tahun ambi eekak paga, Ne ndi paga it aap inanebunu ndi mendek nen ninogoba awi wurik me ake warogo kani kunggak yuurak ake kani wonok pi wogo logorak nogo, yugum paga wakkagak eekwi,

³⁵ Tahun ambi eekak paga yi mendek ndi mendek yappunuk, anggen iyaalok yugu inom, yi eyo ndi eyo anggen iyaalok mbanak inom, ti wonok Aliku ALA awi wurik me pi wogwe, eeko logogun aret o.

³⁶ Eeko logorak wone yugu liiru mbanak ndak-ndak ninapuri manggu nda'nogwe, ninaanggumi lembu-tapi inom, kambin-ndomba inom, inaagalogwe aa'nduk nda'nogwe, eekwi iinok, wonok aap Ala unde ninogoba Ala awi wurik me eeko menggaarak nogo wogora wogwe,

³⁷ Gandum anggen iyaalok yigirik inom, yi mendek ndi mendek alik, Yi Ala ake o, yinuk, iyaalok pugu inom, yi eyo ndi eyo yarak anggen iyaalok mbanak inom, anggur amburu iyaalok toolak inom, tayitun amburu iyaalok toolak inom, wonok ninogoba Ala awi wurik me pogo menggam pogo logowok nduk, it aap Ala unde nogo wogora wogwe, ninawi kota-kota nineyabu eeko monggom abok aret anggen yugu 10 wonage kenok, ambi yendenogo pugwi nogo ti, it aap Lewi nen kuwak eeko menggaarak me, nineyabu yarak anggen yugu 10 wonage kenok, ambi yendenogo it aap Lewi wogora wogwe, eeko logogun aret o.

³⁸ It Lewi mendek nen Ala ake pugu nogo waganggo logomenggaarik, 10 wonage kenok, ambi yendenogo punuk, ninogoba Ala awi wurik me pogo menggam nogome pi wogwe iigak, aap Ala unde Karun paga wiganak ambi nen enegen wogonake,

³⁹ Ndi, it aakumi Iterali mendek inom, Lewi mendek inom, nen gandum anggen inom, anggur amburu iyaalok toolak inom, tayitun amburu toolak inom, wonok Ala awi wurik ake yi mendek ndi mendek pogo menggam it Ala awi wurik me eeko menggaarak Ala unde inom, tu unggwogo menggam arum menggaarak inom, ndawi tiyangga inom, wonogo menggam nogome pi wogwe, eeko logogun aret o. Ninogoba Ala awi wurik eraangge mbo pugun mondok lek o,” yinuk, wone koonogo punuk, kumbuk mbanggo nogogurik, nineenggi amburu pereegurak nogo ti aret.