Ndawi Iya 4 - Ala Wone Peenok Peebi Mbanak

Aap nen ari

¹ Nore abu aberogon yi, kat abu kigirikwe me iya o! Kat abet aret kigirikwe lombok wonage, Kenegen yum paga nobarak wonage nogo ti, towe puume enegen waanggo kwak aret wonage, Keeruwak ti, kambin puut Nggileyat paga nen ineeruwak yaganak-taganak eerit wambi wogo mengga kwak wonage,

² Keyak ti, ndomba ineeruwak abu mbambunuk ngguu'mo wappiigaatak lan agan lagi wogo mengga kwak wonage, Ndomba aagaluk kulu'mbere ndarak me, ambit kobak aga'lek imbirak inaani ndegenak kwak wonage,

³ Kambe irip ti, keele maangga kunik kwak abe wonage, Kambe ti, nggawi paga nonggolak negen wonage, Kayum nobarak kagandin ti, eyo delima anggen poorak kwak koolo-koolo aago wonage,

⁴ Kenggaanok ti, wim eeka yi mendek ndi mendek pegak at Ndawut nen o abe nggorek wureegi kwak wonage, O time aap wakaa'ngget inanggeemu seribu tugunik kwak, kayiinggen togop aret yirik wonage,

⁵ Kelak mbere ti, rusa aagalogwe mbere kwak wonage, Kijang aagalogwe kulu'mbere waambi anggen enggela'me iri'ngga nenet nugwi kwak wonage, Eerak menggendak o.

⁶ O wiya kubondendok warit wage logonet, inagalu'mak awo lek eerogo pega'lek kagak, An nen puut eyo nggami ambik wonage menggim lagi nage, Puut obari abe kaga menggim lagi nage, Eerigin o.

⁷ Kat nore abu aberogon yi, Kenete kigirikwe lombok wonage, Keebe paga kawiindi-kawiinde eerak lek abu abe wonage, Eerak menggendak o.

⁸ Nore yi wae. Kat nimbirak lambumbinaniyak aret me, puut Libanon nen omok o. Puut Libanon nen wambi wage, Puut Amana kirin paga nen wambi wage, puut Tenit, Keremon kirin paga nen wambi wage, Yugum ambena singa wonogo menggam nen wambi wage, Mba'ngge kwak macan iname eyonggaame nen wambi wage, Eeru o.

⁹ Niriluk o. Noreeluk o. Niniki abu mbanggen o. Kenegen ne ambit pilak yagandak paga, Kenggaanok me kayiinggen mendaarak ambiriluk pindanggegerak paga, Niniki mbanggendak o.

¹⁰ Niriluk o. Noreeluk o. Kiniki kunik ee'nake me, nale'nggen ambik ee'nake, Anggur amburu noorak ti, ninikilom aret kwe, Kiniki kunik ee'nake ti perak, ninikilom nggwok lombok mbake minggirak o. Obari abe eeka obari ti, ninikime mbuuluk yo agan nage kwe, Obari abe koba aago nogo ti, ninikime mondok yo agan unggwage menggerak o.

¹¹ Kwe noreeluk yi wae. Nggiin ta'mbanak me nen amburu puk wanggak eeke menggi kwak, kambe paga nen koone aberogon ari, Nggiin amburu kwak, elak amburu kwak, kamili abu'me wonage, Puut Libanon obari abe menggi kwak, kayum obari abe wonage, Eeke keegi o.

¹² Niriluk o. Noreeluk o. Kat yabu yarak u narak kwak wonage, Keebe yi eneeri non mbanogo punuk, kugi pugu kwak wonage,

¹³ Kat keyabu yarak ti, anggen mbilanit nage nagaatik, eyo delima mban yabu yarak me wundit nage, Anggen ombat abe mban yit nage, Tuunggen inom, obari abe eeka narwastu inom,

¹⁴ Obari abe narwastu inom, kiinde negen kunyit inom, en inom, eyo nggami inom, obari abe kaga etenggen lombok abok aret inom, yibinggami inom, eyo ni inom, Ombat abe eeka at mendek mban abok wundit nage, Eereegi kwak, Kat keebe togop aret wonage,

¹⁵ Yabu yarak me niyo eneeri abe kilanogo wumbit nage, Puut Libanon paga nen niyo ngganggik-ngganggok wambit wage, eeke menggi kwak wonage, Eerak menggendak o.

Kwe nen ari

¹⁶ O wiya o omarip paga pa'nggwe waka wae. Mi'naru o. O wiya o ame pa'nggwe waka yi wae. Omok o. An neyabu yarak me obari abe wonage nogo wiganinuk nawak nen warit wage logot o. At an niniki kunik eeke yi, eyabu yarak me unggwi wage, Eyo anggen ombat abe yit nage nogo at nengge, Eeke logowak o.