Ndawi Iya 3 - Ala Wone Peenok Peebi Mbanak

¹ Oonikiya an nogo yege minggim logonet, At an niniki kunik eeke nogo, “Mandenom woramenggi?” yinuk, tokkagarak o. Niniki luunik tokkage wonagarak kwe, nowagam waga'lek aret kagarak o.

² Waga'lek kenok, an nen mbake logonet, “An mi'nage logominggirik, o kota yengget-wangget tu nggwok paga inom, wone mbanggo menggam tinime inom, kwaarit wundi nage, At niniki kunik nogo wonage kero, kwaarit nage, Eerikit o,” Yinuk, mi'na'nuk, kwaari wunggirak kwe, eebe lek aret kagarak o.

³ Kage nagarik, awo kwaarit nage me, it aap o kota arum waka nen tum warit nogo logonet, neego mbaka, an nen it yorage logonet, “At niniki kunik eeke nogo kinigen kogotak ilik?” yoraanuk,

⁴ Logonuk lek aret it mbo piinok, at niniki kunik eeke nogo kwaakkage nagarik, eebe pippunuk, At mbo pega'lek wonok nugwa nagalo ame nanuk, At nda'nake nagagim o ko ogoorak me unggwi nagarak o.

⁵ O Yerutalem aagalogwe komologwe kit yi wae. Kijang inom, rusa kooli penaame mendek inom, aap inoone yogonok lalok yogo mengga kwak eerukwak, “At iniki kunik imbirak inoba tayok yaga'lek iigak, ninoone yoraagun lek o,” yinuk, kumbuk mbaninip o.

Ndawi mbere wappunuk, ambi wareegwaarak wone Kwe nen ari

⁶ Nggami inom, obari eeka aap kunggo menggaarak nen nenggelak-kenggelak eekwi obari abe kaga inom, Oba eerak yugum ka'luk kwit agan lagangge menggi kwak O karume nen eerit wage ti, ta o?

⁷ Lek o. Aap Talomo anggweendo paga wage kagak, it aap Iterali nagawan-nagawan wim eeka wakaa'ngget ineebe 60 nen wonok wogwe ti aret me, pegiyaanip o.

⁸ It abok aret ti, oonikiya inamineeri ne agan naga mendek nen aganake kero, Inalitik-inalitak wim inigen amburu mbanak nen mbuti wooluwak li'luk eeppunuk wogwe, Mbuti wooluwak ineenggime nutik wogwe, Eeko agaarik o.

⁹ Aap endagembogut Talomo nen aret at anggweendo ogobakkigirogo pake, Eyo Libanon mendek paga ogobakkigike, Eeke logonet,

¹⁰ Anggweendo irip-irip mippereegerak nogo ti, Mbuti perak paga ogobakkigirogo pege, Abena ti, mbuti emas paga ogobakkigirogo ndoongge, At kwi'nagak ti, maangga kunik paga nabenogo pege, Eeke mbareegi, O Yerutalem aagalogwe komologwe nogo nen inowe endagembogut iniki kunik me, Nggweendo inikime obaanggi-obaangge li'luk eerogo pereegwaarak nogo aret wage me,

¹¹ O Tiyon aagalogwe komologwe yi wae. Wundi wa'nip o. Wundi wa'nuk, kinowe endagembogut Talomo nogo At akwe lambumbuurak eyom paga, At iniki ale'nggen ariyak eyom paga, At agalo nen enggare-nggare yirippege ti, kinigen pekkaanip o.