Ndawi Iya 1 - Ala Wone Peenok Peebi Mbanak

NDAWI IYA WONE

¹ Ndawi abok tebenak kagak, aap Talomo nen ndawi ambi abu tiyanak lombok pereegerak yi aret.

Ndawi aa'nduk wareegwaarak wone Kwe nen ari

² Anggur amburu noorak inikilom mbakwi ti, iya negen kwe, kiniki kunik ee'nakak eeke ti, iya lombok me, An nagandin keyak mbannakak eeke logot o.

³ Obari kagabolo paga aago ti, abu aberogon aret o. Kendage ti, obari abe eeka kilirik kwak aret wonage me, Komologwe tawe abok aret iniki kunik eekkako agaarik o.

⁴ Togop me, nit mbet-mbet nawok nduk, an kat kambokan woraakit nen, “Omok o,” yo'niru o. Nowe kendagembogut yi wae. An wo'neren kago ogoorak me pani wagandak wonage agarik o. Kat keenok, ninale'nggen nggwok lombok mbakwi, Kat eeke keenok, niniki ale'nggen alik negen kogwe, Anggur amburu noorak ninikilom mbuuluk mbakwi kwe, kat ninoreeluk abuwa nen kiniki kunik eekendak paga kat tiyappagagwi, Eeko ogoorik o. It komologwe kat tiyappagarak ti abu obeelom aret o.

Kwe orewologwe nen aap nogo yogwi Kwe nen ari

⁵ O Yerutalem aagalogwe komologwe yi wae. An ti, neebe mili aret kwe, kigirikwe aret agarik o. Aap Kerat mendek inawooliya wurik mili kwak, Aap Talomo awi yum pugagi ambe mbanak me tugunik menggi kwak, An togop aret wonage agarik o.

⁶ An neebe mili me, ndi, Mo eyak nen neebe mili eerogo panegerak me, Kinigen malik-malok ee'nakwi ti mage o. An nawurilogwe-nowewologwe nen an mbe'nugu logonet, Anggur awi yarak me arum logokit nduk nappanegaarak kagak, Arum logonet, an neyabu anggur yarak me arum wonaga'lek eraangge mbo pigirak o.

⁷ Kat an niniki kunik lombok eekkake nore yi wae. Kaanggumi ndomba wogoren nege menggenom nggeeme wonage? O liingge kaanggumi ndomba wimbiinok menggenom nggeeme wonage? Eeke nogo an yo'niru o. Kat koreewi inaanggumi wogoren nugwi iigak, kat inenggela'me wonage keyo, kwe mbabilu kwak an nen ya pekkeegak nda pekkeegak nege logorak op mbaken?

Aap nen ari

⁸ Kumi inenggela'me kolaga abu kigirikwe lombok kat yi, Kat keenggo'lek kenok, ndomba iniyok pit nogwe nogo muguren nage, Ndomba ndegeninaka inawooliya wurik me koorok time kaanggumi kambin inaagalogwe nogo ndegeninabit nage, Eeke logot o.

⁹ Kat nore aberogon yi wae. Wakkagak ambi yokkiri o. At aap o Metit mendek endagembogut anggweendo wim eeka nen kuda kooli nikkenok nawak nduk, imbirak keele pugunik kwak kat aret agandik o.

¹⁰ Kagandin paga abu kigirikwe lombok kobaanggi-kobaangge eerak wonage, Kenggaanok me kayiinggin-kayiinggen ngginuk aago wonage, Eerak me,

¹¹ Nit nen mbuti emas paga karuk ayo eerogo pagago logonet, Irip me mbuti perak anep yarogo pogo logogun o.

Kwe nen ari

¹² Kat nogoba kendagembogut kageyo ndoonak paga kwi'ndak keegak, Obari eeka noba aago nogo obari wiganinuk naga o.

¹³ Nelak aru-ogwe kagak oolo nggami ninikinggup me pugunik obari abe eeka kwak kat niniki kunik yi, togop aret wonage,

¹⁴ O En-Nggeri anggur yarak me tuunggen mendaarak kwak kat niniki kundugu yi, togop aret wonage, Eeke agandik o.

Aap nen ari

¹⁵ Kat nore aberogon yi, abu kigirikwe lombok wonage, Kat keebe abu abet aret kigirikwe wonage, Ndi, kenegen ti, towe puume enegen waanggo kwak wonage, Eerak agandik o.

Kwe nen ari

¹⁶ Kat niniki kunik yi, keebe puluk lombok tawe wonage, Koone yanggik-yanggok yo'nege, Eeke menggendak me, Nimbirak iri'ngga mili abe ndoonak paga ninoba nabuk-nabak winnogo logogun o.

Aap nen ari

¹⁷ Nit ninawi ti, eyo nggabina arelen paga wurabak wurik wonage, Ninawi pelan nogo ti, eyo ndiindi paga warak wonage, Eerak menggerak o.