Ndawi 95 - Ala Wone Peenok Peebi Mbanak

Ala ayuk wuko logonet, oone konenggo logorak wone

¹ At Aliku ALA aruk konenuwak nduk, Niniki ale'nggen nen ndawi wakwi, Yugum lunik kwak ninagap ndaka liippinanuwak nduk, kuum-keek yogwe,

² At owagam nanuk, “Wa!” yogwi, Ninale'nggen paga ndawi wako logonet at alut eekwi, Eeko logowok o.

³ Aliku ti, mondok nggwok Ala aret wonage, Aakumi inagugi abok aret inirimbaga at endagembogut abu tiyanak aret wonage,

⁴ Nggween kiiniki paga wonogwe nogo eenggime wonage, Puut kirin paga wonogwe nogo at mban unde wonage,

⁵ Niyo nggwok yenggenak laut nogo ti, At aret wakkagagerak me, at aret unde wonage, Ndi, nggween kunduk, at eenggi paga ogobakkigirogo pereegerak me, at nen koonogo pege, Eeke menggerak o.

^6-7 Ninogoba Ala at aret o. Ndi, nit ti, aakumi at mendek aret me, At nen ndegenninake kagak wonogwe, Ndomba wogoren nogo mengga kwak, Wo'niren nege kagak wonogwe, Eeko monggoorak me, Ninendobanggun yindumbunuk at alut eekwi, Ogobakkigirogo pinaneegerak at Aliku ALA abu'me tebe yi unggwogwe, Eeruwok o.

^8-9 Kinombomini karume wogo logonet, Ala nen eerit wage inigen kogo nogogwaarak kwe, Inogogumbuk a'nuk, O Meriba inom, Mata inom, wonogo logonet, “Ala anini wungge kaamun ilik, lek a?” yinuk, Inoone liirit-laarit yogo nogogwa kwak O yogondak Ala nen wone yokkirage konembunuk, “Nineebi o,” yinuk, kinogogumbuk arugup o.

^10-11 It ti eyom ndarak nogo anini nen mberirage kagak Tahun 40 aret eereegwaarak. Mberirage logonet, “An yokkirage eeka'lek logonet, Kiniki mondok worokot-linik monggotak yi, Neebi a! yinuk, An yonggonggolage minggim Kit ninom yonggonggola ungguurak abu lek o, yinuk, Nanini nen nowak mbanogo wone ti abu aret yagi o,” Yinuk, yereegerak o.