Ndawi 94 - Ala Wone Peenok Peebi Mbanak

Aakumi abok inowak loongga ti, Ala aret

¹ Kaliku ALA wae. Maluk eekwi onggo eeppiiga kat Ala aret o. Maluk eekwi onggo eeppiiga Ala wae. Kin paga ari mok o.

² It nggween paga menggaarak inowak loongga yi wae. Pilak yu o. Pilak ari logomenggendik, It aap iniki wogoppako menggaarak nogo Eekwi onggo ndak-ndak eeppiyet o.

³ Kaliku ALA wae. It maluk eeka nogo Onggo eeppiiga'lek keegak ne mande ari nage, It aap maluk mendek nogo Inale'nggen mbakwi iigak, ne mande ari nage, Eerigin o?

⁴ Iniki wogoppako logonet, “Nit mban iya o,” yinuk, agan nugwi, It maluk eeka ti, “Nit eekwi mban iya,” yogwe,

⁵ Kaliku ALA wae. It kapuri nogo piyak-payak eerogo piigwi, Keyate kwak kapuri leenogo piyareegindak nogo tebenogo piigwi, Eeko menggaarak.

^6-7 “Aliku ALA enegen niige, Yakup ogoba Ala nen nit liippinanege, Eeka'lek aret agaarik o,” Yinuk, yogo logonet, Kumi togwe inom, aap nggiru inom wonogwe inom, Inenggaawak lek eerogo piigwi, Elege moono nogo inoorogo piigwi, Eeko menggaarak.

⁸ Kiniki yuundurak aakumi inenggela'me monggotak yi wae. Kit kiniki liippugwi, Kit aap kiniki lek wi negen yi wae. Mandenom nen kiniki warak ogwe, Eerumunggup o?

⁹ At ninaruk ogobakkigirogo pinaneegerak nogo nen Nit yogwe nogo aruk konengga'lek wonage, Nit ninigen ogobakkigirogo pinaneegerak nogo nen Nit eekwi nogo enegen niiga'lek wonage,

¹⁰ At yi aakumi ndi aakumi inaruk wake menggerak nen Maluk onggo eeppiiga'lek wonage, At mamuniraga nogo nen eenggo'lek wonage, Eeke menggerak mba'nuk yogo ogotik ya? Lek o!

¹¹ At Aliku ALA nen Aakumi eeriyak koonggwi nogo eenu age, It koonggwi ti, we aanom warogo aret koonggwi iige, Eeke menggerak o.

¹² Kaliku ALA wae. It aap inaruk wake, Koone yugu liiru mbanak nogo liirogon mamuninake, Eeppiige menggendak nogo Inale'nggen aret mbako menggaarak o.

^13-14 Kaliku ALA nen kapuri mbo piige, Keyate kwak kapuri leenogo piyareegindak nogo Kenegen lambembiinok mbagangge, Eerumunggun lek me, It aap inaruk wake paga inale'nggen mbakwi nogo ti, Yi eyom ndi eyom aaninggin inoba ari wage kagak, Iniki ugun tayenak logowak nduk, Eeppiyamenggendak wonogwe iigak aap maluk mendek Inake nggween kabunogo piyoorak kuli ari nagin o.

¹⁵ Eekaatak a'me nggelok inowak loonggo logorak ena koonogo pemenggendak me, It aap iniki koonak menggaarak nogo nen Wone ti, liirogon aret porogo logogun o.

¹⁶ Ta nen it aap maluk mendek inoone taganogo piinok, an naana'le mbangge, Aap ta nen nimbirak a'nuk, it aap maluk eeka inoone lek eerogo piinok, nawone mbangge, Eerigin mbakop? Lek me,

¹⁷ At Aliku ALA nen an yeenggwa nenetak lek en Aakumi kambunuk inoone lek ogo menggam nanetak o.

¹⁸ An nen ari logonet, “Kaliku ALA wae. An eraabin tuk togon wangge agarik o,” ari neenok, Nabuwa nen pi'nake nagandik, nu'lek eerogo panege,

¹⁹ Niniki piirik-paarik lombok ee'nake kenok, Nale'nggen kaakit nduk, eyak wappanege, Eekendak o.

²⁰ It aap wone yiluk-yiluk lengganogo yoraga nen Eeko logorak lek kagak eeko logowak nduk, Yorogwe paga aakumi iniki aaninggin ogwe nogo Kinom ariyak op mbaken?

²¹ It aap ti, kuwak eeppunuk, Iniki abe koonak nogo inooriyak nduk wone koonggwi, Maluk eeka'lek ugun iigak, “Maluk eekotak o,” yinuk, inoorit nugwi, Eeko menggaarak kwe,

²² Kaliku ALA ti, Nagap ndarak logorak yugum pak wurik kwak wonage, Kat nogoba Ala ti, Neebe op logorak yugum lunik kwak wonage, Eeke menggendak me,

²³ Kat nen it aap ti, inomaluk onggo ndak-ndak eeppiige, It maluk eekwi paga ineebe lek eerogo piige, Kaliku ninogoba Ala nen ineebe pup eerogo piige, Eerumunggun o.