Ndawi 88 - Ala Wone Peenok Peebi Mbanak

Andi iya kenok, tamban eereegerak wone Aap Etaraki mendek endage Keman nen ndawi yi nggagangge kagak it aap Kora apuri engga pereegwaarak nogo yi aret me, it aap ndawi tiyangga inowe wogoreegwaarak.

¹ Nagap ndaka Kaliku ALA yi wae. Yeenggwa nirenok nduk, liingge-oonikiya kulinik aret noone nggwok paga yokkege agarik o.

^2-3 An niniki aaninggin ndugu aago wonage, Neebe kambunuk nogo menggam ambe paga ari nage, Eeke me, An tamban eeke yi, karuk me ari unggwage kagak, Noone nggwok paga yokkege yi, liirogon konengge logot o.

⁴ Aakumi mbuun ambena wanggwi nogo, “Ninom wangge,” nombakwi, “An namiya lek agaarak kambuurak aret,” nombakwi,

⁵ “It kambeegwaarak ninom wonage,” nombakwi, Eeko agaarik o. Aap inoorak kambak nggween taanak wonogwe kwak, Aakumi inoba abeka'lek mbo piige menggendak kwak, Aap kat kinom kunik lek me, eenggi mbanak wonogwe kwak, An togop aret wonage agarik o.

⁶ Kat nen an neebe waganogo Mbuun ambe kiiniki paga lombok mbo wuppanege, Nggween kiiniki paga o apit aago lombok me wuppanege,

⁷ Mo andi kwak kanini lombok noba kwippanege, Niyo kilaarak-mogonik eerogo Lebeninake menggi kwak, eerogo panege,

⁸ Aap an ninom kunik nogo ogoo'naruwak nduk eeppiige, An nogole nombako logowak nduk, eeppiige, Eerogo panggendak wonage agarik o. An keele maarak negen wonage me, Wundi noorak meek aret logonet,

⁹ Andi-pandi nen le ari paga Nenegen agap piirik wonage agaarik o. Togop aret me, Kaliku ALA wae. O kubondendok nen o kiyoma ari nage kagak, Noone nggwok paga yokkege, Neenggi kat Ala wonage me nippunuk wonage, Eeke agarik o.

¹⁰ It kambeegwaarak inigen kaawak nduk, Eerubok mendek eeke menggendak ya? It kambeegwaarak ineenik a'nuk, “Wa!” yokkogo menggaarak ya?

¹¹ Aakumi kambunuk nogo menggam nogome nen Kat aakumi inabuwa mbake menggendak nogo mbininggwi, Aakumi lek eerogo piigo menggam nen Yoraga'ndak li'luk eeppiige menggendak nogo yogwe,

¹² O apit aago nogome Kat eerubok mendek eeke nogo ineenu ogwe, O kobak ogo menggam nogome Abe koonak mban eeke menggendak nogo ineenu ogwe, Eeko menggaarak mbaken? Lek aret o!

¹³ Togop ti kwe, Kaliku ALA wae. Yeenggwa nirenok nduk, noone nggwok paga yokkege, O kubondendok tamban paga karuk paga pege, Eeke minggirak kwe,

¹⁴ Kaliku ALA wae. Nonggop nduk an mbo panege, Nonggop nduk an neenok, Kat kenggaawak kumaappatinuk wonage, Eeke agandik?

¹⁵ An ti, wulaga mbuuluk paga nen Aaninggin-paaninggin noba age, An kambuurak mban ee'nake, Eerit wagagerak o. Namineeri ne agan nawak nduk eeppanege nogo kage, An niniki abu lek ee'nake, Eerit wundi wagagerak o.

¹⁶ Kanini kani eyak negen noba kwi'nage, Namineeri ne agan nawak nduk, Kat eeppanege paga neebe lek eerogo negen panege,

¹⁷ Niyo wurik nage menggi kwak, Kanini nenaagan-nambokan wanggerak wonage kagak, Kubondendok nen nok oonikiya ari nage, Nagabiti aruwak nduk eeppanege nogo, enaarak lombok wonage, Eekak eeke agaarik o.

¹⁸ An noreewi inom, ninom niniki kunik lombok inom, Tayorogon piya nage keegak, O apit nogo nore negen nimbirak kunik aret agaarik o.