Ndawi 87 - Ala Wone Peenok Peebi Mbanak

Ala agota Yerutalem tiyappereegerak wone It aap Kora apuri nen ndawi ambi yi aret pereegwaarak.

¹ At Ala nen puut abu abe alik leenak nogo paga “Nawi alom ti paga logokit o,” yinuk, O nambit-mbit wurogo patit nage,

² Aliku Ala nen it Yakup mendek wonogo menggam inikilom mbake kwe, Kota Tiyon tu unggwogo menggam perak, Iniki kundugu lombok mbake menggerak o.

³ Togop me, Ala Agota yi wae. Kat menggendak mbininggo logonet, “Wi!” yinuk, pi wakkako menggaarak.

⁴ “Ala ti, nit ninogoba aret o,” yinuk, Yogo menggaarak inenggela'me o Metit inom, Mbaben inom, endage kungge, It Pilitin menggam inom, Tirut Kuti imbirak inom, endage kungge, Eeke logonet, “It abok yi, inawi alom o kota Tiyon aret o,” Yinuk, yigin o.

⁵ Ndi, it aakumi nen kunduk yogo logonet, “At yi, o Tiyon nda'nage, At ti kunduk, o Tiyon mban nda'nage, Eereegwaarak o,” yinuk yogwe, Ndi, “At Tiyanak Lombok Menggerak nen O ti nu'lek eerogo pigin o,” yinuk, yogwe, Eeko logogun o.

⁶ At Aliku ALA nen Aakumi inanebunu lombok inendage liiru mbangge logonet, “Aap ti, o Tiyon aret nda'nagagerak o,” yinuk, Endage liiru mbangge,

⁷ Aakumi apit aret kwirabik-kwirabok yogo logonet, “Ninawi alom kota Tiyon aret o,” yinuk, Ndawi paga o ti anep pogo logonet, Yiraakut negen inali-inale yogwe, Eeko logogun o.