Ndawi 84 - Ala Wone Peenok Peebi Mbanak

Ala awi wurik me logorak, “Ao,” mbareegerak wone Aap Kora apuri nen ndawi ambi pereegwaarak yi aret me, it ndawi tiyangga inowe wogoreegwaarak.

¹ Komaawi Lombok Menggendak Kaliku ALA wae. Kat wonage menggenom yi, Mondok iya abu kigirikwe agaarik o.

² Kaliku ALA kawoore'nggam logokit lak, “Ao,” mbake, Niniki mondok nenet unggwage, Ineenik aganaka kat Ala aret me, Nimbirak lambunikit nduk, Niniki inom, neebe inom, uugwe lombok mbarit unggwage, Eeke agarik o.

³ Nowe kendagembogut Komaawi Lombok Menggendak Kaliku nogoba Ala wae. Towe yiluwe nen, “An yime aret logokit o,” yinuk, Kawi wurik me awi mbambunuk wonage, Ndi, kake warogo wokkogo menggam eraanu towe wuni'nuk inaagalogwe ndarogo piyoorak awi mbambunuk wonage, Eekwi iinok, An kunduk togop aret logokit lak, “Ao,” mbake agarik o.

⁴ It aap ko'lu-kii'me kawi wurik me mban wonogwe, Ko'lu-kii'me kendage alut eekwi, Eekwi nogo Inale'nggen aret menggaarak o.

⁵ “Ala nen aret ninomaawi eeppinanege logowak o,” Yinuk, iniki kat paga panggonak wonogwe, O abe alik leenak menggim nogome noorak iniki lunik lombok wonogwe, Eekwi iinok, Inale'nggen aret menggaarak o.

⁶ Ndi, o kibi wonagaatik mayu iyaalok wage paga Iri'ngga-kale'ngga ki eerogo pit nage menggim endage, Le Yogo Menggam Kobappaga, nogo logomenggaarik, O time niyo eneeri warak eerogo pit nugwi,

⁷ Nogo logonet, inomaawi arit-arit O Tiyon kat Ala kenggaanom paga ari unggwogwe, Eeko menggaarak o.

⁸ Komaawi Lombok Menggendak Kaliku Ala wae. An tamban eeke yi, karuk konengge, Yakup ogoba Ala wae. Noone yokkege yi, liirogon aret konengge,

⁹ Ala wae. Nit ninanggeemu kwak kat aret me, Aap kat amburu kilirogo mippereegindak nogo abuwa nen pekkage, Eeru o.

¹⁰ An name ne seribu paga logorak ti, ninikilom aret kwe, Kawi wurik me ne ambit paga logorak ti perak, Niniki kundugu lombok aret o. It aap maluk eeka iname logonet, Neebe obeelom logorak ti, op aret kwe, Kat nogoba kawi wurik me Tungga'nggi paga arum logorak ti perak, Iya lombok me, an time logorak mbake agarik o.

¹¹ Oonegen kwak obeelom eerogo pinanege, Nggeemu kwak mulunogo pinanege, Eeke menggendak Kaliku Ala aret o. Kaliku ALA ninabuwa nen obeelom eerogo pinanege, Ninendage tiyappinanege, Eeke menggendak me, Aap inoba maluk lenggenak lek abe mban eekwi iinok, Yi mendek ndi mendek obeelom eeppiige nogo Ambi ili ari lek nggwik togon eeppiige menggendak o.

¹² Togop aret me, Komaawi Lombok Menggendak Kaliku ALA wae. It aap iniki koba panggombunuk menggaarak nogo inale'nggen aret wonogo logogun o.