Ndawi 83 - Ala Wone Peenok Peebi Mbanak

Inawim tebenogo piyaawak nduk, tamban eereegerak wone Aap Atap nen ndawi ambi yi aret pereegerak.

¹ Ala wae. Koone yaga'lek wonage, Ala wae. Keenggi awiirak koone lek puk wonage, Eeriyak ti mage o.

² It kinom wim mbanak nogo noone-koone yogwe, Ineebi kombakwi nen kat ari keenok inuut nimik yogwe,

³ Kapuri inom wim eeriyak wone kote koonogo pit nugwi, Kapuri kiniki kunik menggendak nogo, “Nonggop eeppiyaawok o,” yinuk, wone mbanggwi, Eeko logonet,

⁴ “It aakumi Iterali inendage ki logukwak, lek eerogo piigwi, Iterali mendek inoba aberak logukwak lek eerogo piigwi, Eeruwok o,” yinuk,

^5-6 iniki abu ambit eeppunuk wone koonogo pugwi, Eeko agaarik o. It inawooliya wuppunuk wonaga Erom mendek inom, Itimayen mendek inom, Mowap mendek inom, Kagat paga wiganak mendek inom,

⁷ Nggeban mendek inom, Amon mendek inom Amalek mendek inom, Pilitin mendek inom, It o Tirut menggaarak inom, it abok aret nen, Kat Ala tebembagawok nduk eekwi me,

⁸ It Atiyut mendek kunduk, aakumi Lot mendek ineenggi-iniyok aruwak nduk, it inom a'nuk, Wone koonogo pugwi yi, iyet o.

^9-10 Togop eekwi me, Kat nen it aakumi Miriyan mendek eeppiige, O Endot mendek inooppiinok ineebe nggween lubunuwak nduk, Mbo piyareegwaarak aap Titera Yabin imbirak niyo Kiton paga eerogo piige, Eereegindak kwak, It aap ti togop aret eeppiyet o.

^11-12 Aap Orep Teep imbirak eeppiyareegin kwak, It aap ti inoweewi inengga warak togop aret eeppiige, “Ala andomba ndegeninake menggim Nit unde eeppatinuk logowok o,” yereegwaarak Aap Teba Talumuna imbirak eeppiyareegin kwak, It aap ti, inoweewi nagawan-nagawan nogo togop aret eeppiige, Eeru o.

¹³ Nogoba Ala wae. O wiya nen liirubu wonok nage menggi kwak, Wiiri anggen wiya nen wonok nage menggi kwak, It aap ti, togop aret eerogo piige,

¹⁴ Eyoongga nggwok takkani pup eerogo nengge kwak, Kani omoonuk nage logonet puut-puut paga eyo-kale wunuk nenet nage menggi kwak Togop aret eerogo piige,

¹⁵ Kat kawiya oonebu agan it aap ti muguren nage, Kawiya paga inambuluk yunik-punik eerogo piinet nage, Eeke logot o.

¹⁶ Kaliku ALA wae. It aap ti nen, “Ala ngge o?” Yinuk, kwaakkabit woraawak nduk, inenggali lombok eerogo piyet o.

¹⁷ It inenggali mbakak nugwi, Mondok-mondok inogut nagak mban agan nugwi, Miyuk-meya eerogo piigwi tit iigak kambit nogwe, Eeruwak nduk, teppiyet o.

¹⁸ Kat kendage ti, Kaliku ALA aret ineenu ogwe, Ndi, o nggween paga yime abok aret kat kalik Tiyanak Lombok Menggendak liippagagwi, Eeruwak nduk, eeppiyet o.