Ndawi 82 - Ala Wone Peenok Peebi Mbanak

Endagembogut abu tiyanak nogo ti, Ala aret Aap Atap nen ndawi ambi yi aret pereegerak.

¹ O mbogut paga Ala awuri inom eeka nogo, Aakumi inanebunu lombok inagugi inom kuwak eeppunuk wonogwe me, Wone mbanikit nduk, Ala inenggela'me mi'nage, Inawone amburu mbanogo inowak loongge, Eerikit nduk, Yorage logonet,

² “Aakumi yiluk-yiluk inowak loonggwi iigak, Inaana'le mbanggwi, It maluk eeka inom ari nanuk, inom wone koonggwi, Eekwi kiigak, Ne mande ari nagin o.

³ It aap eekkoloorak meek inom, elege moono inom, Inawone liirogon koonogo pugwi, It aap tebenak wonogwe inom, ineenggi lek inom, Eeppiyoorak op aret me, eeppiigwi,

⁴ It aap inomaawi lek lebenak mendek inom, ineenggi lek inom, wondet eerogo piigwi, It aap maluk eeka ineenggime nen ndininakwi, Eeko logonip o.

⁵ Yi wone ndi wone liippega'lek kineenggo'lek wonogwe, Kit o apit paga nugwi, Obeelom eeriyak koongga'lek O yi naalop-kaalop eerogo piinet nogwe, Eeko ogotik o.

⁶ An nen yokkirage logonet, Kit an Ala pogom wonogwe, kit abok ti, An Tiyanak Lombok Minggirak napuri aret wonogwe, Eeko ogotik o, Yinuk, yokkiragarak kwe,

⁷ Aakumi nggween paga kanggo mengga kwak aret kanggwi, Aap nggwok inendage lek ogo mengga kwak, Kit kinendage lek ogwe, Eekkolaawok nduk eeko ogotik o,” Yinuk, yoragagerak.

⁸ Togop me, Ala wae. Yi aakumi ndi aakumi abok aret Keyate kwak kat mban unde menggendak me, Pilak ari logomenggendik, It aakumi nggween paga wonogwe yi, Inawone liirogon mbanogo inowak loonu o.