Ndawi 7 - Ala Wone Peenok Peebi Mbanak

Liippiinok inowak loongga ti Ala aret ALA aruk konenuwak nduk, Ndawut nen aap Mbeniyamin mendek endage Kuti ndawi paga anep pereegerak.

¹ Kaliku nogoba Ala wae. Neebe op logokit nduk, kabu'me ari wagi o. It aakumi mu'neren wogwe nogo abok aret ineenggime nen ndinnake, nagap ndake, Eeru o.

² Eeke lek keenok, singa nibininake menggi kwak eeppanugwi, Ndi, it ambi nen nili yogwe lek kenok, nibik-nobak eerogo panugwi, Eerugun o.

³ Kaliku nogoba Ala wae. It yo'nugwi yi, Eekirak paga maluk noba wonage,

⁴ At nimbirak niniki ugun wonogwe nogo maluk eeppege, Alom lek kagak, at tebembaniyak eeke nogo, Amendek ambi kiraakkolage, Ee'netak en,

⁵ It ninom wim mbanak nen mu'neren pi'nabi wogwe, Iniyok konden aan lebe eerogo noorogo panugwi, An nendage tiyanak nogo Liirubu aa'ngga pogom eerogo panugwi, Ee'netak o.

⁶ Kaliku ALA wae. Kanini nen pilak ari, Ninom ogoorak inanini nombakwi nogo, Eeppiyoorak nduk, kena koonogo nagiige, Nawone mbanogo onggo ndak-ndak eeppiyoorak nduk, kat nogoba Ala mbet-mbet koongge, Eeru o.

⁷ Yi aakumi ndi aakumi abok aret Kat wonage me yendok-wandok kuwak ari woraawak o. Kuwak ari woramenggaarak wonogwe iigak, Kat wone lengganogo yorage menggenom tiyarogon nen wone lengganogo yorage,

⁸ Kaliku ALA yi aakumi ndi aakumi inowak loongge, Eeru o. Kaliku ALA wae. Kat mondok tiyanak menggendak me, “At obeelom aret eeke, iniki abe paga mu'neren wage, Eeke menggerak ilik, lek a?” yinuk, An kunduk nowak loonnabu o.

⁹ Kiniki abe koonak Ala wae. Aakumi inabut mbangge, Inikime lombok koonggwi nogo liippiige, Eeke menggendak me, Inanini nen maluk eeko menggaarak nogo lek eerogo piige, Ndi, it obeelom eeko menggaarak nogo iniki nu'lek eerogo piige, Eeru o.

¹⁰ An nanggeemu kwak ti, Ala aret me, It iniki koonak menggaarak nogo Inagap ndake menggerak o.

¹¹ At Ala ti, a'me nggelok inowak loongge, Ko'lu-kii'me anini inoba piige, Eeke menggerak me,

¹² It aakumi nen inomaluk mbo pugwi lek iinok, At nen awooluwak ngget nggabunogo pege, Eegin agale wurogo pege, Eerigin o.

¹³ Aakumi inoorikit nduk awooluwak koonogo pege, Awim kani eyak paga nggeenogo pege, Eekerak o.

¹⁴ It maluk eeriyak koonggo nagaatik, pilit mban pugunit nugu menggaarak nogo ti, Kwe ambi elege logongge nagaatik, abila a'nuk yagan warogo ndake menggi kwak aret o.

¹⁵ Aap ambi nen Aakumi inake nggween kabunogo pemenggerak kwe, Nggween kabunogo patemenggim nogome At aret yobok togon wangge menggerak.

¹⁶ Aakumi maluk eeppiyoorak koonemenggerak nogo yungguk togon at aret oba kwippake, Anini paga eeppiyoorak mbaremenggerak nogo melak togon yugum negen anobak paga kwi'nage, Eeke menggerak o.

¹⁷ Aliku ALA abe koonak mban eeke menggerak me, At, “Wa,” yoge, Aliku Mondok Tiyanak Menggerak ALA endage kunogo Ndawi tiyangge, Eeki o.