Ndawi 67 - Ala Wone Peenok Peebi Mbanak

Wogorage paga Ala, “Wa,” yoreegerak wone Ndawi pugu yi, nggitat eekugak ndawi wako logowak nduk, it tiyangga inowe wogoreegwaarak.

^1-2 Aakumi yi o ndi o wonogwe nogo kat Ala eerit nage menggendak nogo ineenu ogwe, Aakumi inagap ndake menggendak nogo, yi aakumi ndi aakumi abok aret liippugwi, Eeruwak nduk, Kat ninabuwa nen obeelom eeppinanege, Kale'nggen ninoba pinanege, Kenete eya lombok logonet, pe'niige, Eeke logot o.

³ Ala wae. Yi aakumi ndi aakumi nen, “Wa!” lombok yokkugwi, Aakumi inanebunu lombok abok nen kalut eekwi, Eeko logowak o.

⁴ Aakumi inanebunu lombok wone lengganogo yorage, A'me nggelok mban eeppiige, Aakumi nggween paga wonogwe nogo abok aret Liirogon ndegeninake, Eeke menggendak ti paga Yi aakumi ndi aakumi abok aret inale'nggen mbakwi, Iniki ale'nggen nen ndawi wakwi, Eeko logowak o.

⁵ Ala wae. Nit yi aakumi ndi aakumi nen, “Wa!” lombok yokkugwi, Aakumi ninanebunu lombok abok nen kat tiyappagagwi, Eeko logowok o.

⁶ Ti eekwi niinok, Ninanggween paga yi mendek ndi mendek yarumonggoorak Anggen abe yigogo pinanege, Ndi, kat Ala ti, nit ninogoba Ala aret me, Kat kale'nggen ninoba pinanege, Eeke logomunggun o.

⁷ Kale'nggen ninoba pinanege keenok, aakumi o nggween irip-irip wonogwe abok aret kayuk wuko logogun o.