Ndawi 64 - Ala Wone Peenok Peebi Mbanak

It aap maluk mendek onggo eeppiyoorak wone Ndawut nen ndawi ambi pereegerak yi aret me, it ndawi tiyangga inowe wogoreegwaarak.

¹ Ala wae. An eeppanege neebi mbake logonet, Wone yokkege yi, karuk konengge, Nawim nen noori wogwe iinok, Nagabiti lombok mbake me, narum wonage, Eeke logot o.

² It aap inogogun ambik nen Nooriyak iniki ambit eeppunuk wogwe me, kumaarogo panege, It maluk eeka nen noone-koone agan maluk eeppanit wogwe me, nomoppanege, Eeru o.

³ Inamili ti, wooluwak engget nggabunogo pugwi kwak me, It inoone paga nen nooruwak nduk koonogo pugwi, Maale irip paga wi perenak mba'mbak irogo mengga kwak, Inoone andiigwi paga nooruwak nduk li'luk eekwi,

⁴ An maluk eeka'lek ugun nage neegak, Kumaarak logonet maale paga noorogo wumbugwi, An ugun wonage neegak, Inagabiti mbaka'lek yini-panip noorogo wumbanugwi, Eeko agaarik o.

⁵ Maluk eeriyak koonggo logonet piyok ari kero, At ambi nen at ambi omaawi eeppegak eekwi, It nen yogo logonet, “Nit aap yilunogo puurak wone koonggwi yi, Ta nen eenu age mbakop? Lek aret me, Kote eeppiinet nogo logowok o,” yinuk, yogwe,

⁶ Iniki ambit eeppunuk, Aap wi-wi aganaburak koonogo pogo logonet kwe, “Nit wone mondok iya abe lombok eeppiyoorak koonogo pogoorak o,” yinuk, yogwe, Eeko menggaarak. Aap iniki mbakwi inom, inikime lubuk koonogo pugwi inom, Ti mondok iya lombok koonggo menggaarak me, Wi!

⁷ Togop eerit nogwe iigak kwe, Ala omaale paga inoorogo piige, Abera'lek me inawinde-inobaande eerogo piige,

⁸ Aap maluk eeppiyoorak inoone paga koonogo pegaarak nogo, Yungguk togon it aret inoba kwippiige, It aret ineebe lek eerogo patuwak nduk eeppiige, Eeke kenok, Aakumi nen inigen iigo logomenggaarik, “Ia!” yinuk, pi wako logogun o.

⁹ Yi aap ndi aap abok aret Ala nen eeppiyamenggerak iigo logomenggaarik, inagabiti mbakwi, “Ala nen yogop eeppiigerak kogo o,” yinuk, wone wonok aakumi yoranet nogwe, Ala eeke menggerak nogo iniki koonit nugwi, Eeko logogun o.

¹⁰ Togop eeko logogun kwe, It aap iniki obeelom nogo nen Aliku ALA eeke menggerak paga inale'nggen mbakwi, Ineebe op logowok nduk, abu'me kwi'nari unggwogwe, It aap iniki koonak abok aret Ala endage tiyappugwi, Eeko logowak o.