Ndawi 60 - Ala Wone Peenok Peebi Mbanak

Eegin tiyak yuwak nduk, tamban eereegerak wone Ndawut nen it aap Aram-Metopotamiya mendek inom, Aram-Toba mendek inom, inom wim eeke, ndi, at Yowap nogo ame woraakit nduk eeke logonet, o Mayu Ogop Kobappaga time aap Erom mendek ineebe dua belas ribu inoorogo piige, eereegwaarak nogo ndawi paga inanep pereegerak yi aret me, it ndawi tiyangga inowe wogoreegwaarak.

¹ Ala wae. Keebi ninomba'nuk mbo pinanege, Ninobak wurik ndengganogo pege, Kanini ninoba pinanege, Eekendak kwe, Aa'nduk obeelom wonogogu kwak Yogondak togop aret eeppinanu o.

² O nggween yi ndipuk eeke, nggaganogo pit nage, Eekendak paga Nggween nuk-nuk ari me, Nggween nggaganak yi, kagaarogo pit nage logot o.

³ Nit kat kapuri nogo Aaninggin mondok iya lombok kaawok nduk eeppinanege, Anggur amburu omaawi mendek neenok, Inambuluk piige menggi kwak, Nit togop aret eerogo pinanege, Eekendak o.

⁴ Togop eekendak kwe, maale namburemenggaarak paga Inagabiti kombako menggaarak nogo ma'nogwe iinok, Kuwak eeri woraawak nduk, Ndiimbu walok eeka negen wogoragandak o.

⁵ Nit aap kiniki kunik ee'ninake menggendak nogo Ninagap ndarak logowok nduk, “Yeenggwa niret,” yokkugwi yi, karuk konembunuk, Kat keenggi abe'nggan paga ninagap ndaru o.

⁶ Kat Ala kawi alik leenak menggenom nen ari logonet, “Nale'nggen paga nggween Tikem ogoorogo tumbukkirage, O Tukot Kobappaga time kuli wakkagak mbanogo wokkirage, Eerigin o.

⁷ O Nggileyat inom, Manate inom, ti an unde aret o. Nabetagi mbuti negen ti, it Eparayim mendek aret. Nambim obate mbanak negen ti, it Yekura mendek aret.

⁸ O Mowap ti, an niyok kookak aret age, O Erom at unde eekkoligi, mbaruwak nduk, Niyogogut nggoorogo nappege, It Pilitin wonogo menggam tebenogo punuk, Neegin tiyak yigi o, yinuk, kuum-keek ari, Eeke agarik o,” Yinuk, yereegindak o.

⁹ Aap ta nen an wo'neren o Erom pani nage, Ta nen wo'neren o kota pak wurik me mambani nage, Eerigin o?

¹⁰ Kat Ala nen aret eeriyak kwe, mbo pinanege, Nawuri wim eeka ninom wundi nogwe me, kat ninom wundi naga'lek puk age, Eeke menggendak nogo o!

¹¹ Togop aret me, Aakumi nen ninagap ndariyak ti, meek aret me, Ninom wim eeriyak nogo kat ninom aret eeko logowok o.

¹² Kat Ala ninom aret eekwi kenok, Ninomaawi mondok iya lombok tiyak ari kagak, Ninawim ti, kalik nen aret kiyogobit namunggun o.