Ndawi 59 - Ala Wone Peenok Peebi Mbanak

Arum logowak nduk, tamban eereegerak wone Tawun nen Ndawut warikit nduk, awi inigen waganggwi a nawak nen awuri nappiyareegerak kenok, ndawi pereegerak yi aret me, ndawi endage, Pup Eerogo Puurak Mage, yogo nogogwa kwak, yogo logowak nduk, it ndawi tiyangga inowe wogoreegwaarak.

¹ Ala wae. Nawim ineenggime nen nagap ndarogo panege, Nooruwok nduk mi'nagaarak nogo noori worookwak, Pak negen wurogo panege,

² It maluk eeka ineenggime nen ndinogo panege, It aap inamiya nengga nen nookwi iyo nili ari, Eeru o.

³ Kaliku ALA wae. An kat koone tagangge, maluk eeke, Eeka'lek neegak, Maluk eeppanuwok nduk it aap inogogun ambik iniki ambit eeppunuk, wone kote mbanggwi, Neebe lek eerogo panuwok nduk, Ambe nggagambunuk wonogwe, Eekwi yi, iyet o.

⁴ An maluk eeka'lek neegak kwe, It nen mban nooriyak pipuk eerit nugwi me, It maluk eeppaniyak eekwi yi, liippiige, Ndi, pilak yinuk, yeenggo nege, Eeru o.

⁵ Iterali inogoba Kaliku Ala Komaawi Lombok Menggendak kat aret me, Yi aakumi ndi aakumi abok aret Maluk eekwi onggo it inoba piyaanok nduk, pilak yu o. It maluk eeriyak koonggwi nggaganagalo yi kunduk, Inabuwa mba'nuk teppiyoorak mage o.

⁶ O ambe ndonggo agan nage kagak, Iniyokan wogo nagaatik, o kota wanggerit nugu logonet, Nggeewo nggoboologu agan nugu mengga kwak, Agan nugu menggaarak o.

⁷ It nen yogo logonet, “Nit yogwe yi, ta nen koneniyak? Lek me,” yinuk, Wone ugun-ugun kilirogo pit nugwi, Wooluwak paga inooko mengga kwak, Inoone paga nen inoorit nugwi, Eekwi yi, iyet o.

⁸ Togop aret agan nugwi kwe, Kaliku ALA nen inagi'ndok kangge, Yi aakumi ndi aakumi abok ti, meek eerogo piige, Eeke menggendak o.

^9-10 Nomaawi eeppanega yi wae. Kat nogoba Ala nabuwa lombok mbake, Ala wae. Kat nayugum pak wurik kwak wonage, Eeke menggendak me, An kat paga panggonak wonage agarik o. Tu ni'neren nage, It meek eerogo panugwi nogo kat eeppiige nenegen iinok, “Kayik a! Op togon eeppiigi,” yikit nduk eeppiige, Eerumunggun o.

¹¹ Togop eerumunggun kwe, Kat ninanggeemu kwak ninogoba wae! Kat eeke nogo aakumi an mendek inami arukwak, It ineebe inoorogo piyoorak mage o. Ata, it mak aago nugu logowak nduk, Komaawi paga mak eerogo piige, tebenogo piige, Eeru o.

¹² Iniki wogoppako logonet, Inambe paga maluk mban porogo wonogwe, Inoone paga maluk mban agan nugwi, Eekwi nogo paga Keele pugu negen yilunggolaawak nduk eeppiige, Aakumi pulunogo piinet nugwi, Inoone pilit pugunit nugwi, Eekwi paga

¹³ Kanini inoba kwippiige, Inenggaawak kin wonogwe iyo, Kanini nen mondok lek eerogo piige, Eeru o. Ti eeke keenok, kat Ala nen aret it Yakup paga wiganak nogo, Wone lengganogo yorage menggendak o nggween paga irip-irip abok aret ineenu arugun o.

¹⁴ O ambe ndonggo agan nage kagak, Iniyokan wogo nagaatik o kota wanggerit nugu logonet, Nggeewo nggoboologu agan nugu mengga kwak, Agan nugu menggaarak o.

¹⁵ It inambi kwaarit yi awi ndi awi nugwi, Kwaappunuk nenggaatak kwe, inanoma'le aga'lek kenok, Nggeewo ku agan nogo mengga kwak agan nugwi, Eeko menggaarak o.

¹⁶ Togop aret kwe, maluk noba ari wage kenok, Kat keebe paga kumaarogo panege, Pak wurik kwak, keebe aret mulunogo panege, Eeke menggendak me, Komaawi nogo ndawi paga kanep pege, Nabuwa lombok mbake menggendak nogo Kubondendok nen ndaame paga kanep pege, Eerigin o.

¹⁷ Nomaawi eeppanega yi, wae. Kat nogoba Ala nabuwa lombok mbake, Ala wae. Kat nayugum pak wurik kwak wonage, Eeke menggendak me, Kalut eeke logonet, ndawi wake agarik o.