Ndawi 56 - Ala Wone Peenok Peebi Mbanak

Iniki aaninggin kenok, Ala oba panggombuurak wone At Ndawut o Nggat wonage me, it aap Pilitin mendek nen pigaganggo mbareegwa, ndawi endage, Towe Kurona Teno Logonak me Wonage, yogo nogogwa kwak, yogo logowak nduk, pereegerak yi aret me, it ndawi tiyangga inowe wogoreegwaarak.

¹ Ala wae. Nawim nen nooruwak nduk, nggobok nirit nugwi, Pi'nabuwok nduk, ko'lu-kii'me Nappanggak-wappanggak nugwi, Eekwi yi, nabuwa mbaru o.

² It miyuk-meya eerogo panugwi nogo nen Kubondendok nen nok, oonikiya ari nage kagak, Mu'neren-ma'neren nugwi, It aap iniki wogoppakwi nogo nen Noorogo panuwok nduk, wakkanet nugwi, Eeko agaarik o.

³ An nagabiti ee'nabit unggwage kenok, Niniki kat koba panggombagage minggirak o.

⁴ Kat Ala koone yo'nege menggendak nogo tiyappege, Kat Ala niniki koba panggombagage, Niniki koba panggonak wonage me, nagabiti mbarigin lek niniki kwi'ndak wonage, Eeke minggirak me, It aakumi nggween paga mendek nen An nano eeppaniyak mbaken? Lek aret o.

⁵ Kubondendok nen nok oonikiya ari nage kagak An ari minggirak kagak alik agan nugwi, Maluk eeppanuwok nduk kuwak eeppunuk, Kote wone mban mbanggwi, Eeko menggaarak.

⁶ Nenggaawak mbet-mbet lek eerogo panuwok nduk, Wone kote koonogo pugwi, “Nonggop ari kaamun?” yinuk, molok nirit nugwi, An nage neegak, inigen wo'neren nogwe, Eeko menggaarak.

⁷ Togop eeko menggaarak me, Ala wae. It aap ti, maluk eerit nugwi paga Inagap ndakkoloorak op mbaken? Lek me, kanini paga it yi aakumi ndi aakumi inenggaawak lek eerogo piyet o.

⁸ An mbaganit o ambime agak nege neegak Kat keenggi linggingge, Nale amburu wangge nogo kayiwa'na toologo pege, Eekendak nogo abok aret Liiru mbanogo pegendak nogo lek a? Liiru mbanak aret wonage me,

⁹ Noone paga, “Yeenggwa niru o,” yokkege neenok, Nawim nogo kole mbaganit nogwe paga Kat Ala nimbirak wonage neenu arigin o.

¹⁰ An koone tiyappege minggirak kat Ala paga, An kat ari tiyappege minggirak Kaliku ALA paga, Niniki panggombigirak wonage o.

¹¹ Niniki kat Ala koba panggonak wonage paga An nagabiti mbarigin lek niniki kwi'ndak wonage me, It aakumi nggween paga mendek nen an nano eeppaniyak mbaken? Lek aret o!

^12-13 Ala wae. Kenegen keegak aakumi ineenik wonogo menggam an eerit nage logokit nduk, Noorukwak nagap ndarogo panege, Niyogobit mbannege kero pi'nake, Eeke keenok, “Ndogop wokkirigin o,” yinuk, Kumbuk mbaneegirak nogo muk eekendak me, Kumbuk mbaneegirak nogo ndak-ndak aruwak nduk, “Wa,” yokkege logonet, kake warogo wokkirigin o.