Ndawi 54 - Ala Wone Peenok Peebi Mbanak

Awim nen wakwi iyo, tamban eereegerak wone It aap Tipi mendek wogo nogogwaarik, “At Ndawut nogo niname kumaarak agaarik o,” yinuk, Tawun yoreegwaarak Ndawut konengge nagagerik, ndawi pereegerak yi aret me, nggitat eekwi iigak, ndawi wako logowak nduk, it ndawi tiyangga inowe wogoreegwaarak.

¹ Ala wae. Kendage tiyanak menggendak me, nagap ndake, Komaawi lombok menggendak me, naana'le mbanogo panege, Eeru o.

² Ala wae. An tamban eeke yi, karuk konengge, Noone lombok yokkege yi, liippege, Eeru o.

³ Aap inambik nen pilak yogo logonet, nookwi, Aap kayuk wuka'lek inogogun worokot nen nenggaawak lek eerogo paniyak nduk eekwi, Eekwi me,

⁴ An yeenggwa nega ti, kat Ala aret o. An ti, nogoba kat panggok aret o.

⁵ Togop aret me, it maluk eeppaniyak koonggwi nogo Melak togon inoba kwippiige, Kat abe li'lak mban eeke menggendak me, It ineebe lek eerogo piige, Eeru o.

^6-7 Aaninggin-paaninggin noba wonage nogo abok aret noba tayenogo nappit nage, Nawim tebenak wonogwe iyaakit nduk eeppiige, Eekendak me, Nale'nggen paga we aret kake ambi warogo wokkege, Kaliku ALA kendage abu obeelom aret me, keyage wakkake, Eerigin o.