Ndawi 52 - Ala Wone Peenok Peebi Mbanak

Aap maluk mendek maluk onggo eeppiyoorak wone Aap Erom mendek endage Ndowek nogo nen Tawun owagam woraanuk, yoge logonet, “At Ndawut nogo aap Abimelek ame nagaarak wonage o,” yoreegerak nogo Ndawut aruk konembunuk, ndawi pereegerak yi aret me, it ndawi tiyangga inowe wogoreegwaarak.

¹ “An aap iya,” mba'nuk nege yi, kat maluk eeke nagandik, Nonggop nduk wogoppatit nege agandik? It aap Ala inabuwa mbake nogo maluk eeppiige nagandik, O kubondendok nen nok kiyoma ari nage kagak, Nonggop nduk wogoppit nege agandik?

² Kat aap pilit pugungga yi wae! Kamili nogo ti, Aap inamboro mbangga engget ambik kwak logonet, Aakumi maluk eeppiyoorak wone mban mbanit nege,

³ Obeelom eeriyak mendek mbo punuk, Maluk eeriyak mendek mban kiniki kunik eekko'net nege, Wone abet mban yukwak pilit wone mban yuurak kiniki kundugu logonet agan nege,

⁴ Kat aap pilit iyagalo aret me, Aakumi iniki wakkolaawak nduk Eeppiyoorak wone mban kinikilom mbake, Eeke menggendak pilit-pilit iyagalo yi, Wi!

⁵ Togop eerit nege menggendak me, Ala nen kat mondok lek eerogo pagage, Kawooliyana nen pippaganuk, nigogo wumbagage, Eyo alom kinogo nappogo mengga kwak, O nggween paga aakumi wonogwe inenggela'me nen Kat togop aret eerogo pagage, Eerigin mbake logot o!

⁶ Ti eekkake nogo It aap iniki abe koonak mendek nen Inigen keego logomenggaarik, Inagabiti mbakwi, kagi'ndok kanggwi, Eeppunuk, yogo logonet,

⁷ “Ala nen narum logowak o, yinuk, abu'me unggwaga'lek Amendek ambik wonage nogo paga iniki panggombege, Aakumi tebenogo piinet nage kenok Endage tiyak yegerak paga iniki panggombunuk wonage, Eekerak paga eeppege aap yi, kaanip o,” Yinuk, yogo logogun o.

⁸ Togop yugun kwe, an perak, Eyo tayitun mili kwit agan lagangge menggi kwak Ala awi wurik me logonet, togop aret agarik o. Ala iniki kunik ee'nabit wundi wage menggerak nogo paga Niniki mondok-mondok panggonak aret logogin o.

⁹ Ala eerit nage paga endage mondok-mondok tiyappege, At endage abu obeelom aret me, Eeppaniyak yegerak nogo an tokkage, Ndi, at apuri ake leenak inenggaanom paga Mondok, “Wa!” lombok yoge, Eeke logogin o.