Ndawi 51 - Ala Wone Peenok Peebi Mbanak

Omaluk lek eerogo puwak nduk, tamban eereegerak wone At Ndawut nen kwe Mbatiyeba maluk eeppereegerak paga Ala yoge kagak yoraga Natan nogo nen enggali wari wage mbareegi, Ndawut iniki wakkolage logonet, ndawi yi aret pereegerak o.

¹ Nogoba Ala wae. Aakumi inabuwa lombok mbarit wundi wage menggendak ndak-ndak an nabuwa mbake, Aakumi kiniki kunik aganake menggendak me, Wone yugu taganogo punuk maluk eekirak yi, Lek eerogo panege,

² Nomaluk abok aret koorogo panege, Maluk noba lenggennagaarak yi, mbeenogo panege, Eeru o.

³ Koone taganogo punuk maluk eekirak nogo liippake, An nomaluk nogo aberak mban wonage, Eeke agarik o.

⁴ Kat aret maluk eeppagage, Aap alik lek kat lombok maluk eeppagage, Maluk eeriyak keebi mbake menggendak nogo kagak aret eeke, Eekirak me, Eekirak onggo eeppaniyak nogo ti op aret mbake, Ndi, nowak loonogo punuk, Aaninggin noba paniyak mbake nogo ti, a'me nggelok aret eeppanumunggun kombake, Eeke agarik o.

⁵ Nagalo inikime logonnage logonet maluk lenggenak wonage, Maluk alom ninikime kagak aret nda'nage, Eereegirak kagi o.

⁶ Aap iniki ambit mban wonogwe iinok, Kat kinikilom mbake menggendak me, Niniki warak lombok logokit nduk, Liirogon mamunnege logot o.

⁷ Wumukot amburu paga noba koorogo panege keenok, Niniki abu koorak aret age, Ndi, yi paga koorogo panege keenok, Ndugu-ndugu kwak niniki yanggwi lombok age, Eeruwak nduk, eeppanu o.

⁸ Niniki ale'nggen ee'nake, keyage wake, Eerikit nduk koone ari naruk konengge, Nowak yigirogo panggendak nogo Omaawi eerogo punuk, an ndawi lubuk ari, Eerikit nduk, eeppanu o.

⁹ Nomaluk pekkagak eeke ti mage o. Ata, maluk eekirak abok aret lek eerogo panu o.

¹⁰ Ala wae. Niniki kikak naka'lek eerogo panege, Niniki nu'lek logokit nduk, Niniki ngget mendek eerogo panege, Eeru o.

¹¹ Pekkoorak neebi o, yinuk, an mbo panege, Aberiniki wo'nereegindak nimbirak wonage nogo ndinggolage, Eeriyak mage o.

¹² Nagap ndarogo paneegindak paga Nale'nggen mbake lek agaarak nogo obaane'me eeppanege, Kat eeriyak mbake nogo Niniki nen, Eerikit, mba'nuk, eerit nage logokit nduk, eeppanege, Eeru o.

¹³ Ti eeke keenok, kat eeriyak mbake nogo It kat koone taganggwi mamunirage neenok, It maluk eeko menggaarak nogo mbo punuk, yungguninuk kowagam woraagun o.

¹⁴ Ala wae. Kat nogoba Ala nagap ndaka aret me, Aap amiya neenggi paga wonage nogo Lek eerogo panu o. Lek eerogo panege keenok, Kat obeelom eeke menggendak wone nogo Nale'nggen paga yoranet nege logogin o.

¹⁵ Nogoba wae. Noone yuurak meek agaarak nogo teeluk eerogo panu o. Teeluk eerogo panege keenok, Kendage tiyanak nogo paganogo yoranet nege logogin o.

¹⁶ Ndomba warogo wo'niriyak Uugwe mbake keenok wokkege, Kake warogo kani kuniyak kinikilom mbake keenok, Warogo kake kani kungge, Eeriyak kwe, lek me meek o.

¹⁷ Kake warogo wokkugwi kwak nogo ti, Aap ambi nen, “An maluk aret eeki o,” yinuk, Iniki wakkolage ti aret o. Aap ambi iniki wakkolage logonet tebeppake nogo ti, Kat Ala nen, “Aap yi, we aret eeke o,” yinuk, Yumunggun lek o.

¹⁸ Eeriyak op mbake keenok, o Tiyon obeelom eerogo pege, Kota Yerutalem yugum pak wurogo pit nage, Eeru o.

¹⁹ Ti eeke keenok, Aakumi iniki abe paga warogo wokkugwi, Kat kake warogo kani kunggwi, Kake punuk, apit aret kani kunggwi, Eekwi iinok, Kinikilom mbarumunggun o. Ndi, kinikilom mbake keenok, Aakumi nen tapi ngguunok warogo punuk, Kake kani kunggo menggam nogome Kani kunggwi tit logogun o.