Ndawi 50 - Ala Wone Peenok Peebi Mbanak

Iniki ambit eeppunuk, Ala alut eeko logorak wone Aap Atap nen ndawi yi aret pereegerak o.

¹ At Omaawi Lombok Menggerak Aliku Ala oone ari, Oonegen lagi wage menggim nen nok, o kilu yi nage menggim kuli It nggween paga yime menggaarak nogo wiirage,

² Puut Tiyon abu kigirikwe lombok paga nen Ala abinak pindanogo nappit wage, Eeke agaarik o.

³ Ninogoba Ala woraagin me, we woraagin lek o. Wage kagak, kani aa'nduk a'nuk, Yi mendek ndi mendek nenet wage, At enaagan-ambokan o wiya nabuninuk wage, Eerigin o.

⁴ Wage logomenggerik, Mbogut paga nggween paga wonogwe nogo inigen iigak, Aakumi at apuri inowak loonikit nduk, Mbogut nggween nogo yorage logonet,

⁵ “An ninom wone abuk nggaruk togon koonogo pereegurak mondok aberak logowok nduk, Nake warogo wo'nireegwaarak Napuri leenogo piyareegirak nogo, wogoren piya wogo logonip o,” yinuk,

⁶ Yorage mbaremenggi, Mbogut nen oone nggwok paga ari logonet, “Aakumi inowak loongga ti, Ala lombok aret me, Apuri a'me nggelok mban inowak loonigin o,” Yinuk, kuum eerogo nappit nage agaarik o.

⁷ At Ala nen ari logonet, “Kit an napuri yi wae. An Ala aret me, Wone yokkirage yi, kinaruk koneninip o. Kit Iterali yi wae. An kinogoba Ala aret me, Kinaruk konenggwi kiigak Kit eekwi kiigirak nogo yokkiraagin o.

⁸ Kinaanggo warogo wo'nugwi, Nenggaanom paga nake warogo kani kunggwi, Eekak mban eekwi paga mbekkirage lek o.

^9-10 Ndiimbu-nggwiya eyonggaame wonogwe inom, Kinaanggumi lembu-tapi yi puut ndi puut paga iri'ngga nenet nugwi inom, Ti an mban unde minggirak me, Kinerapi ngguunok inanggenogona piigwi inom, Kinagambin ineyagat wurik me piigwi inom, An uugwe nen waagin lek o.

¹¹ Towe eyonggaame menggaarak abok aret iige, Karume nugu menggaarak kunduk neenggime wonogwe, Eeke minggirak o.

¹² O nggween inom, Yi mendek ndi mendek ogobakkigirik nggween paga wonage abok aret inom, Ti an unde aret me, An mbi abu nen nggino yokkiroorak lek aret o.

¹³ Tapi ngguunok enggaanggum nengge, Kambin ngguunok amiya toologo nengge, Eeke minggirak mbakop? Lek aret me,

¹⁴ Wa! yo'nogo logonet nake warogo wo'nugwi, An yogop eeke logogin o, yinuk, Kumbuk mbanogo an Mondok Tiyanak Minggirak yo'nogo monggotak nogo, A'me lik togon eekwi, Ti mban eeko logonip o.

¹⁵ Eekwi me, maluk eeppinagarak eyom panggoni wage kenok, Ninagap ndaru o, yinuk, nggino yo'nugwi kiinok, An nen kinagap ndake neenok, Kit an nendage tiyappanggo logomunggup o,” Yinuk, yoraagin o. Ti yorage kagak kwe, aap maluk mendek nogo yorage logonet,

¹⁶ “Kit maluk eeka yi, eeko logorak wone yugu mbininggwi, Wone abuk nggaruk togon koonogo pereegirak nogo We kinambe paga mban yogwe, Eeko monggotak nogo ti, Nonggop eeriyak nduk eeko ogotik?

¹⁷ An nen kinaruk wake nogo kineebi mbakwi, Wone yokkirage nogo taganogo pugwi, Eeko monggotak o.

¹⁸ Aap kiraakwi kinigen iinok, kinom eerit nugwi, Kumi ugun wurinaka kinom kunggologwe,

¹⁹ Kit kinambe arum waka'lek Wone maluk mendek mban agan nugwi, Kinamili nggeroppega'lek pilit wone agan nugwi,

²⁰ Kinoreewi kinom wonogo logonet, kinoreeluk abok mbanggwi, Kinagalo ambiret nen ndakkinabeegerak kwe, Kinawuri meek eerogo piigwi,

²¹ Kit ti eerit nugwi kiigak, An onggo eeppinagaga'lek puk aret wonage neegak, At ninom ndak-ndak aret, nombako monggotak kwe, Eerit nogwe nogo paga an nen mbekkirage, Yi aret eekotak o, yinuk, lok togon yokkirage, Eerigin o.

²² Togop aret me, Kit noba mari eerogo panugo monggotak yi, It ambi nen kinagap ndaka'lek kagak, An nen nibinik-ndelenak eerogo pinagage neyo, Wone kiniki liippogo logorak nogo yi o.

²³ It aap an, Wa, yo'nogo logonet, Warogo wo'nugwi paga nendage tiyappanugo logogun o. Ndi, it inaru koonogo pakwi iinok ti, Inagap ndariyak wone nogo An nen ineenu eeppiige logogin o,” yinuk, yorage logogin o.