Ndawi 5 - Ala Wone Peenok Peebi Mbanak

O weege paga tamban eereegerak wone Aap Ndawut nen ndawi ambi pereegerak yi aret me, ndawi pugu yi, nggawiwak paga eekwi iigak, tiyanggo logowak nduk, inowe wogoreegwaarak.

¹ Kaliku ALA wae. An noone yokkege yi, karuk konengge, Niniki wakko'net unggwage nogo liippanege, Eeke logot o.

² An tamban eeke logonet, Nowe kendagembogut nogoba Ala nggino yokkege me, Yeenggwa nirenok nduk, noone nggwok yokkege yi, Karuk konenu o.

³ Kaliku ALA wae. Kuubondendok noone yokkege nogo Karuk konengge menggendak o. Kuubondendok nggino yokki'nuk, “Kat ari keyaakit o,” yinuk, Tokkeege minggirak o.

⁴ It aap maluk inikilom mbako mengga kwak kat nogoba Ala togop mbakeelik o. It maluk eeka nogo kinom wonageelik o.

⁵ Iniki wogoppaka nogo pegiyoorak keebi inombake, It maluk eeka abok aret keebi inombake,

⁶ It pilit pugungga nogo lek eerogo piige, Aap inamiya nengga inom, inambokan lagangga inom, Kaliku ALA nen inogole inombake, Eeke menggendak o.

⁷ Togop aret kwe, an perak, Nabuwa lombok nomba'nuk eeppanit wundi wage me, An nen kat kame unggwi nage, Kawi wurik alik leenak me nena na'na'nuk, Kayuk wuke logonet, nendobanggun yindumbunuk kalut eeke, Eerigin o.

⁸ Kaliku ALA wae. Ninom wim mbanak nen nookwi iyo, “Tu ndi paga nawak,” nomba'nuk, koonogo panege, Kat obeelom mban eeke menggendak ti paga wo'neren nage, Eeke logot o.

⁹ It inoone yogwe nogo abe ambi yogwe mbakulik o. Inikime obari maluk mendek mban yagabit aago wonage, Inale'lok ti, aakumi nggween taanak ambe paganak a aago menggi kwak wonogwe, Ndi, inoone pilit mban pugunit nugwi, Eeko menggaarak o.

¹⁰ Ala wae. It maluk eekwi ti, “Aaninggin mondok kinoba pinagagin o,” yinuk, yorage, Inikime kote eeriyak koonggwi paga Melak togon it aret yigeebu wuppatuwak nduk koongge, Ndi, kat koone, “Nineebi o,” yinuk, Maluk eerit nugwi me, mbo piige, Eeru o.

^11-12 “At pinanogo logowak o,” yinuk, Kabu'me ari wogwe nogo inale'nggen mbakwi, Inale'nggen nen ndawi kuli pega'lek mondok wakwi, Eeko logowak o. Kaliku ALA wae. Aap iniki abe koonak nogo kale'nggen inoba piige, Obeelom eerogo piinet nage ti paga Nggeemu kwak mulunogo piige, Eeke menggendak me, It kat kendage yuurak inikilom mbakwi nogo Inale'nggen mbako logowak nduk, Kabu'me piinok logot o.