Ndawi 47 - Ala Wone Peenok Peebi Mbanak

Ala alik aret tiyanak menggerak wone Aap Kora paga wiganak nen ndawi pereegwaarak yi aret me, it ndawi tiyangga inowe wogoreegwaarak.

¹ Kit yi aakumi ndi aakumi wae. Kiniki ale'nggen nen kineenggi telak eekwi, “Ala iya o,” yinuk, kinale'nggen nen keekok yogwe, Eeko logonip o.

² It aakumi nggween paga mendek abok aret Inowe endagembogut abu nggwok Tiyanak Lombok Menggerak Aliku ALA ti, mondok iya me, Aakumi abok aret, “Ia!” yinuk, Inagabolo ne agan nage menggerak o.

³ Yi aakumi ndi aakumi ninabu'me piya wage, Aakumi nggween paga nit ninoone mban konenggo logowak nduk, eerogo piige, Eereegerak o.

⁴ Ala iniki kunik eereegerak aap Yakup nen Nggween nineyate kwak kologogurak iya mbareegerak nogo ti, At Ala nen aret nit ninake leenogo pereegerak o.

⁵ Inale'nggen nen keekok yogwe, Oone nggwok eeka trompet nogo oone pu eekwi, Eekwi iigak, Wone lengganogo yorage menggim Aliku ALA kwi'nari laganeegerak o.

⁶ Togop me, ndawi waruwok o. Ala ake ndawi waruwok o. Ndawi tiyanuwok o. Ninowe endagembogut ake ndawi tiyanuwok o.

⁷ Ala ti, it aakumi o nggween paga wonogwe abok aret Inowe endagembogut at aret wonage me, At anep pugu ndawi waruwok o.

⁸ At Ala wone lengganogo yorage menggim alik leenak nogo paga kwi'ndak logonet, Yi aakumi ndi aakumi wone lengganogo yorage agaarik o.

⁹ Aap nggween paga inoweewi inendagembogut abok aret Inowe endagembogut at aret me, Aap Abarakam ogoba Ala apuri kuwak eeri wogwe iigak, It yi o ndi o unde menggaarak Nagawan-nagawan inom abok aret Kuwak eeppunuk, At mban endage mondok iya tiyappogo agaarik o.