Ndawi 45 - Ala Wone Peenok Peebi Mbanak

Aap akwe lambumbugwi me, ndawi wareegwaarak wone Aap akwe lambumbugwi me, ndawi wareegwaarak. Aap Kora paga wiganak nen ndawi pereegwaarak yi aret me, ndawi endage, “Waambi Anggen,” yogo nogogwa kwak, yogo logowak nduk, it ndawi tiyangga inowe wogoreegwaarak.

¹ Ndawi pereegirak aap endagembogut ake tiyaniyak eeke neegak, Wone abe mendek yikit nduk, Niniki nen nggaganogo yo'nege, Aap liiru mbaniyak abu eenu me, Wone abe liiru mbangge menggi kwak, Wone abe mban nambe paga panege, Eeke agaarik o.

² Aap ando obeelom negen iigak, Kalik perak, abu obeelom lombok wonage, Koone abu abe yanggorogon mban ari, Eeke menggendak me, Ala ale'nggen koba pagareegerak Mondok-mondok aret wonage agaarik o.

³ Aap wakaa'ngget yi wae. Kawooluwak keenggime li'luk eeppunuk wonage, Kobaanggi-kobaangge li'luk eekko'nok Kayuk warak lombok wundi nage, Eeke logot o.

⁴ Aakumi abet kenok mban yogwe, Iniki tebenak logonet, a'me nggelok mban eerit nogwe, Eeko logowak nduk, Kendage abu tiyanak aakumi, “Wi,” kugwi iigak, Kaguda paga kwi'na'nuk, keegin tiyak yuwak nduk wundi nage, Aakumi inamineeri ne agan nage kagak, keenggi abe omaawi paga eerit nage, Eeke logot o.

⁵ Kendagembogut komaale engget nggabenak paga Kinom wim mbanak iniki polok togon inooke keenok, Yi aakumi ndi aakumi abok aret Kabu'me kaganak paga pirik-perek yi wogo logogun o.

⁶ Nogoba Ala wae. Koone lengganogo yorage menggenom ti, Mondok-mondok aret logogin o. It kabu'me menggaarak inawone mondok koonak mban mbangge menggendak ti, Mbim obate mbanak ti kwak aret me, Kat in wakkagak agan nogo logogun o.

⁷ It obeelom eekwi iinok ti, kinikilom mbake, Ndi, maluk eekwi iinok ti, keebi lombok mbake, Eeke menggendak me, At Ala ti, kat kogoba Ala aret me, Iniki ale'nggen kombake logonet, Amburu kilirogo pagareegerak paga Koreewi tebenak iigak, inirimbaga tiyappagaregerak o.

⁸ Kayum yirike menggendak nogo ti, Eyo yibinggami inom, ni inom, nggoo'nggop inom, Nogo paga obari abu abe eerogo pugu wonage, Kawi o nggwok abe wurik nogo ti, Wam kole gajah eyak paga amuni mbanogo pugu wonage, Eerak kagak, Nggitat paga ndawi wakwi iinok, Kiniki ale'nggen mbake menggendak o.

⁹ It kumi kake eekwi kiniki kunik aganake inenggela'me Aap inendagembogut inapurilogwe inom aret wonogwe, Ndi, keenggi abe'nggan kakwe kwe nggwok nogo Ayum mbuti emas o Opit mendek paga ogobakkigirik yirik mi'ndak wonage, Eeko agaarik o.

^10-11 Togop me, kat kolaga yi wae. Karuk o! Wone an yokkege yi, liippege, karuk konengge, Eeke logot o. Kat abu kigirikwe keenok, aap endagembogut ti, Iniki kat paga perenggerak wonage me, “Nogoba at aret o,” yinuk, Kat mendek inom, kogoba inom menggaarak inom, Mbo piinok, at abu'me tebe yi namunggun o.

¹² Ti eeke keenok, o Tirut Aagalukwe nen kat kake wokkiri wagak eekwi, Aap ineenggi warak mendek nen, “Enegen niyawak o,” yinuk, kat eeppagi wogwe, Eeko logogun o.

¹³ Aap endagembogut ambi apuluk oba mbu'mbap eeppunuk Ko ambi ogoorak me tokkage wonage, Ayum mbuti emas paga yabuk-ndabuk eerak yikkolage, Ee'nuk,

¹⁴ Ayum enete yabenggek-ndabenggek aago yirik kat kendagembogut wonage me, Wonok woroorak nduk eekwi, Oreewi komologwe tawe at ambokan wogwe, Eerit kat kendagembogut kowagam wogo logonet,

¹⁵ Inale'nggen nen noone-koone agan Kawi o nggwok abe wurik me Kowagam unggwi wogo agaarik o.

¹⁶ Nogoba kendagembogut wae. Kapuri ndaganabemenggendak nogo Yi o ndi o abok aret it unde logowak nduk Nagawan eerogo piige keenok, Kombomini inobaane'me aret arugun o.

¹⁷ Kombowologwe nda'narit wundi wogo logonet, Kendage ki eerit wundi wogo logowak nduk eeppiyaagin me, It yi aakumi ndi aakumi abok aret nen Kat mondok-mondok, “Wa!” yokkirit wundi wogo logogun o.