Ndawi 4 - Ala Wone Peenok Peebi Mbanak

Oonikiya tamban eereegerak wone Ndawut nen ndawi ambi pereegerak yi aret me, ndawi pugu yi, nggitat eekwi iigak, tiyanggo logowak nduk, inowe wogoreegwaarak.

¹ Kat abe koonak mban menggendak nogoba Ala wae. Niniki puru ari logonet, Noone nggwok paga yokkege neenok, onggo yo'nege, Aaninggin noba wonage kenok, teeluk eerogo panege, An tamban eeke nogo nabuwa nen karuk konengge, Eeru o.

² Kit aap yi wae. Nendage tiyanak nogo maluk eerogo panugwi kiigak, Ne mande ari nagin o? Lek ariyak mendek kagak kiniki kunik eekwi, Pilit wone kagak kwaarit nugwi, Eekwi kiigak, Ne mande ari nagin o?

³ It aap Ala mugurok nogwe iinok, Aliku ALA nen leenogo pake menggerak me, Kineenu a'nip o. An nen Aliku ALA yoge neenok, aruk konenigin o.

⁴ Kinanini nen maluk eeriyak mage o. Kit nogo yogo monggo'nom windak logonet, Kinoone lek kinikime mban kwaakkologo logonip o.

⁵ Kiniki Aliku ALA oba panggombunuk logonet, Wone yugu ndak-ndak Ala ake warogo wogogo logonip o.

⁶ Aakumi ambik nen yogo logonet, “Abe eeriyak mendek ta nen kin paga yo'nirage logogin o,” Yogwe kwe, Kaliku nogoba ALA wae. Kat kabinak nogo nit paga eya eeppinanege logot o.

⁷ Gandum anggen inom, anggur amburu ngget toolak inom, Ambik age kenok, inale'nggen mbakwi nogo ti, Mbuuluk aret kwe, nale'nggen kaakit nduk, Kat nen eeppanege ti perak, nggwok lombok aret o.

⁸ Togop aret me, Kaliku ALA wae. Niniki ugun tayenak logokit nduk, Kat nen mban eeppanege menggendak me, Niniki ugun aret winna'nuk nogo yege logogin o.