Ndawi 38 - Ala Wone Peenok Peebi Mbanak

Aaninggin oba age mbareegi, tamban eereegerak wone Ndawut nen, “Aliku ALA abe'nake logowak o,” yinuk, ake warogo wogoge logonet, ndawi pereegerak yi aret o.

¹ Kaliku ALA wae. Kanini paga mbe'nege, Kiniki aagi mi'nage logonet, Niniki koonnaruwak nduk eeppanege, Eeriyak mage o.

² Komaale paga neebe ndanuk togon nooke, Kat keenggi omaawi paga Aaninggin iya negen noba kwippani wambi wage, Eekendak o.

³ Kanini nombake paga neebe apit andi ee'nake, An neebe obeelom lek Nomaluk paga nowa'na abok aret nenet unggwage, Eeke agarik o.

⁴ “Maluk nonggop eeki?” yinuk, Koonit unggwage paga niniki ndugu agan wangge, Yi mendek ndi mendek aaninggin me, Piyakkoorak meek kogwe nogo kwak ee'nake,

⁵ Aap wi eeko mengga kwak eekirak me, Nawin nanggore'ne wungge paga Nobari ndi wurogo pege minggi kwak eeke,

⁶ Andi nen namborowak yomo agan wangge paga Nena nggween paga wandunik mban nege, Niniki mondok puru aago nege neegak, o kiip ari nage,

⁷ Namborowak andi tele agan unggwage, Neebe abu meek ee'nabit unggwage,

⁸ An neebe abok aret nomaawi lek eerogo panege, Neebe aan lebe eerogo panege, Ninikime yaga'mbit lombo ee'nabit unggwage me, Niniki oone ari, Eeke agarik o.

⁹ Ala wae. Niniki uugwe mbarit unggwage nogo, kat nen kin aret neege, Niniki wakko'net unggwage yi, Kat nen yelok neege, Eeke agandik o.

¹⁰ Niniki ponok-ponok ee'nake, Nomaawi lek ee'nabit unggwage, Nenegen ogut eerogo panege, Eeke agaarik o.

¹¹ Andi-pandi noba kwi'nagaarak paga noreewi inom, ninom minggirak inom, Nogole nen nomo'neegak nugwi, Nowe-nawot togon tayorogon nen pe'neegwi, Eekwi iigak,

¹² It nenggaawak lek eerogo paniyak mbakwi nen Keele pogo mengga kwak ee'nakwi, It maluk eeppaniyak mbakwi nogo nen, “Nonggop eerogo lek eeppuwok o,” yinuk, yogwe, O kubondendok nen nok oonikiya ari wage kagak, Nambokan laganuwok nduk, kote wone koonogo pugwi, Eeko agaarik o.

¹³ Aap aruk logu kwak naruk konengga'lek wonage, Aap iniki apit kwak noone yaga'lek wonage, Eeke agarik o.

¹⁴ An yi nogo, Aap inoone yogwe kwe, konengga'lek wonogwe, Inoone yoragaatak kwe, Onggo ambi yoraga'lek puk wonogwe, Eeko mengga kwak aret agarik o.

^15-16 “An eraabin tuk togon yigeebu wangge neenok, It nogo nen, Kayik a! yinuk, inale'nggen mbakwi, Op togon wanggi, yinuk, wogoppakwi, Eekwi iyo, Non mbanogo piyet o,” yinuk, yokkigirak me, Kaliku ALA wae. An kat paga niniki lunik wonage, Kat nogoba Ala wae. Kat nen onggo yo'nenok nduk tokkeege, Eeke logogin o.

¹⁷ Niyogobit lik togon yigeebu wambuurak ee'nake, Niniki andi negen ee'nake nogo Lek aga'lek kundugu tit wonage, Eeke agarik o.

¹⁸ An nomaluk nogo pagangge, “Maluk nonggop eeki?” yinuk, Niniki koonit unggwage, Eeke agarik o.

¹⁹ It ninom wim mbanak nogo Inamiya wonage me, inomaawi ambik wonogwe, Alom lek kagak ineebi nombakwi nogo, ineebe ambik wonogwe,

²⁰ An obeelom eeppiige onggo maluk mban eeppanugwi, Obeelom eeriyak mugurok nage neenok, Inawim negen eerogo panugwi, Eeko agaarik o.

²¹ Kaliku ALA wae. Kat mbo paninuk nage, Kat nogoba Ala wae. Keebe ndaanda wonage, Eeriyak mage o.

²² Kat nagap ndaka nogoba aret me, Mbet-mbet aret yeenggwa niri mok o.