Ndawi 35 - Ala Wone Peenok Peebi Mbanak

Wakwi iyo, tamban eereegerak wone Ndawi yi, Ndawut nen aret pereegerak.

¹ Kaliku ALA wae. It aap an tebenogo panuwok nduk wogwe yi, Kat nen it aret tebenogo piige, Ninom wim eeruwok nduk wogwe yi, Kinom aret wim eeke, Eeru o.

² Kat kanggeemu kolage, karin yikkolage, Eeppunuk, Pilak ari logomenggendik, An yeenggwa niri mok o.

³ “Kagap ndariyak an neebe aret agarik o,” Yinuk, ninikime yo'nege, Nawim nen mu'neren wogwe nogo Kawooluwak waganogo inaame nggwe yinogo mippege, Eeru o.

⁴ It an nooriyak mu'neren wogwe nogo inenggali ogwe, “Ineegin tebek yegerak kayik a!” yinuk, yogwe, Eeruwak o. Nendage maluk eerogo panuwok nduk wone mbanit nugwi nogo Iniki kobak a'nuk iniyokan yungguninuk nawak o.

⁵ Aliku ALA ayonggo malayikat nen mugogo nappiige kagak, Wiya nen iri'ngga ameneno wonok nage menggi kwak, Togop aret aruwak o.

⁶ Aliku ALA ayonggo malayikat nen muguren nage kagak, Tu it nogwe nogo apit age, eraabin age, Eeruwak o.

⁷ Towe yiluk yuwak nduk yum tugunogo pit nogwe, Wam yobok togon wambuwak nduk labu pugwi, Eeko mengga kwak, An pi'nabuwok nduk, Alom lek kagak togop eeppanegaarak me,

⁸ Aberak lek me aaninggin inoba kwi'nage, An nake yum tugunogo pit nagaarak nogo paga It aret yerek-perek eeginake, Ndi, nake nggween kabunogo pegaarak nogo, It aret yobok togon wambunuk ineebe lek eerogo pakwi, Eeruwak o.

⁹ Ti ogwe iinok, “Aliku ALA nen eekerak o,” yinuk, nale'nggen mbake, “At nen aret nagap ndakerak o,” mba'nuk, Niniki ale'nggen wunuk ari, Eerigin o.

¹⁰ It aakumi inomaawi ambik nen Inomaawi lek tebenak wonogwe nogo inooriyak eekwi me, Aliku ALA nen inagap ndake, Aap ineenggi lek tebenak wonogwe nogo Inamendek ndinggwi me, mugogo nappiige, Eeke menggerak me, Neebe-niniki abok aret nen, “Kaliku ALA wae. Kat kokwak ambi ta wonage? Lek aret o,” Yinuk, yoge logogin o.

¹¹ It aap inogogun worokot nen we piliret, “Ndogop eeke kogoorak o,” yuwok nduk, wogo nagaatik, Wone an neenggo'lek mendek neegwa'me waganggwi, “Yogop eekendak ndogop eekendak,” yo'nugwi,

¹² An obeelom eeppiinet nage minggirak nogo Onggo negen it nen maluk eeppanugwi, Eekwi paga Niniki abu aaninggin ndugu agan nage agarik o.

¹³ It nogo andi warak wonogwe iinok, Yum nibinik maluk mendek yippunuk niniki wakkolage, Nambe mage negen logonet inake tamban eeke, Eekirak o. Inake tamban eekirak nogo onggo yo'nega'lek yungguk togon noba ari wage kenok,

¹⁴ Noreeluk kwak, nawuluk kwak, “Andi eekerak o,” Yinuk, niniki puru agan nage minggi kwak agan nege, Aap ambi agalo kangge kenok, Iniki puru aago menggi kwak Niniki puru aago logonet nanep kumbunuk le ari, Eekirak kwe,

¹⁵ Aaninggin noba kwi'nage neego nagaatik, “Kayik a,” yinuk, inale'nggen nen kuwak eeri wogwe, An ugun wonage neegak, It aap an tebenogo paniyak nogo nen, “Ndogop eekendak o,” yo'niruwok nduk, An nowagam kuwak ari wogwe, Miyuk-meya eerogo panegak mban eekwi,

¹⁶ Aap maluk mendek eeko mengga kwak meek eerogo panugwi, An neenok, inanini nen ineyak nggilik maakwi, Eekaarak o.

¹⁷ Kaliku ALA wae. Kenegen neegendak kwe, Puk mban keegak, ne mande arigin o. It aap an maluk eerogo panugwi yi, It ineenggime nen nagap ndake, Singa kwak ineyak nggerembaninuk wonogwe me, Inambeme nen ndinogo wo'nake, Eeru o.

¹⁸ Ti eeke keenok, aakumi apit kuwak aago inenggaanom paga, “Wa!” yokkege, Aakumi abok kuwak eerak inenggela'me kendage tiyappege, Eerigin o.

¹⁹ Alom lek kagak, it ninom wim mbanak nen, “Op togon eeppogo a!” yinuk, iniki wogoppakwi, Alom lek kagak ineebi nombakwi nogo nen Maluk eeppanuwak nduk, inogobak tinggin yogwe, Eekwi iyo, Non mbanogo piyet o.

²⁰ It aap ti, aakumi inom iniki ambit lambunik logowok nduk, Agan nugwi lek o. Ata, it aakumi iname ugun wonogo menggaarak kwe, “Ndogop eekotak o,” yinuk, Inoone pilit lombok agan nugwi,

²¹ Inigen loolo eerogo pe'neego logonet, “Kat maluk eekendak ninigen abe nen keegoorak me, Kayik a!” Yinuk, mbelappanogo logonet, “Ha! Ha!” yo'nugwi, Eeko agaarik o.

²² Kaliku ALA wae. Ee'nabit nugwi nogo muk iigendak me, Koone lek puk wonage, Nogoba Ala wae. Kat keebe ndaanda wonage, Eeriyak mage o.

²³ Kat pilak ari logonet nawone mbanogo panege, Kat nogoba Ala aret me, naana'le mbangge, Eeru o.

^24-25 Kaliku nogoba Ala wae. Kat aakumi inawone abe mban mbangge menggendak me, It aap nogo nen, “Op togon eeppogo a!” yinuk yogwe, “Kayik a! Nit niniki mbakoorak nogo A'me nggelok yigi,” mbakwi, “Ninambeme abu yonggologo pogo o,” yinuk, yogwe, Eekwi iyo, Kat nawone liirogon mbanogo panege logot o.

²⁶ Aaninggin noba age neenok, “Op aret eeppogo a!” yinuk, iniki wogoppakwi nogo Inenggali ogwe, iniki kobak ogwe, Eeruwak o. Aaninggin noba kwi'nagaarak wonage neenok, It aap inale'nggen mbakwi nogo Yum yikkologo mengga kwak, inenggali eekkologwe, Inendage maluk eekkologwe, Eeruwak o.

²⁷ Aakumi nen, “Aap yi maluk eerulik abe, Yuwak lak, ao,” Mbakwi nogo Kaliku ALA togop ari keenok, Inale'nggen nen keekok piyanggogwe, “At ayeloman obeelom logowak nduk, Inikilom mbake Aliku ALA nogo Endage tiyappogo logowok o,” yinuk, Mondok-mondok aret yogwe, Eeko logowak o.

²⁸ Ndi, an perak, “Aliku ALA nen obeelom mban eeppiige menggerak o,” yinuk, ari, Ko'lu-kii'me kendage tiyappege, Eeke logokit o.