Ndawi 34 - Ala Wone Peenok Peebi Mbanak

Obeelom eeppiige kenok, “Wa,” yoreegerak wone Abimelek nen Ndawut yelok kookwak Ndawut kumili negen a'nuk yori wage mbareegi, Abimelek nen, “Mbaganu o,” yoreegerak nage logonet, ndawi pereegerak yi o.

¹ An yi eyom ndi eyom abok aret Aliku ALA endage tiyappege, At alut eeriyak mban ee'nake,

² At Aliku ALA eeppanege paga An niniki ale'nggen mbake, Eeke minggirak o. Kit aakumi tebenak wonogwe nogo, Kinaruk konembunuk kinale'nggen mbakwi,

³ “Aliku ALA iya!” yinuk, ninom alut eekwi, Kit an ninom at endage tiyappugwi, Eeko logowok o.

⁴ An nen Aliku ALA yoge neenok onggo yo'nege, Nagabiti mbake neenok, nagabiti lek eerogo panege, Eekerak o.

⁵ It aakumi iniki at paga lunik menggaarak nogo Inenggali nen inetenggen puru aago wonogolik o. I'ndok nggi yogwe wonogo menggaarak.

⁶ At aap tebenak wonage nogo nen Aliku ALA yoge kenok, Aliku ALA nen at oone konengge, Aaninggin oba wonage nogo teeluk eerogo pege, Eereegerak o.

⁷ It Aliku ALA inagabiti mbako menggaarak ti, Aliku ALA ayonggo malayikat nen Awooliya yendok-wandok wuppiinok, inarum wonage, It inagap ndake, Eeke menggerak o.

⁸ Aliku ALA mondok obeelom aret menggerak kineenu arubagip nduk, ombat wakkaanip o. Ineebe op logowok nduk, abu'me ari unggwogwe nogo Inale'nggen aret mbako logogun o.

⁹ It aakumi Ala inagabiti mbako menggaarak nogo Inamendek ambi lek ti lek, abok aret wonage me, Kit at apuri ake leenak monggotak yi, At Aliku ALA kinagabiti mbako logonip o.

¹⁰ It singa nogo inambi abu nen Ineebe mbuuluk eeginabit unggwage menggerak kwe, It Aliku ALA mugurok nogo menggaarak perak, Inamendek obeelom ambi lek ti lek abok aret wonage menggerak.

¹¹ Kit an napuri yi wae. At Aliku ALA kinagabiti mbako logobagip nduk An mamunggiraagin me, an nowagam wogwe, Kit kinaruk liirogon aret konenggwi, Eeko logonip o.

¹² Kit kineenik logorak kinikilom mbakwi, “Nit obeelom aret wonogwe me, Li a'nuk kambuurak op aret,” mbakwi, Eekwi ti, Taamini nen togop mbako ogotik?

¹³ Togop aret mbakwi kiinok, Kinoone maluk mendek kinambe paga wunabi wogwe, Wone pilit kinamili irip paga wonok nugwi, Eekwi kiyo, Tum liirogon wakwi,

¹⁴ Ndi, maluk mendek mbo punuk, Obeelom mendek kenok mban eerit nugwi, “Nonggop agago niniki ambit lambunik logorak,” koonggwi, Abu koombunuk ti aret kinomaawirogon mugurok nogwe, Eeko logonip o.

¹⁵ Aap iniki abe koonak menggaarak nogo Aliku ALA enegen wogoren nege, Iniki puru yogo logonet yogwi iinok, at aruk liirogon konengge, Eeke menggerak kwe,

¹⁶ Aap maluk eeko menggaarak perak, Aakumi o nggween paga nen inoba aberak logokwak, Aliku ALA enggaawak omaawi paga Lek eerogo piige menggerak o.

¹⁷ It aap iniki abe koonak nogo nen inoone nggwok paga at yogwi iinok, Aliku ALA nen aruk konengge, Aaninggin inoba wonage nogo teeluk eerogo piige, Eeke menggerak o.

¹⁸ Aakumi iniki wakkologwe wonogwe iinok, Aliku ALA inom koorok aret wonage, Iniki aan mbele aago wonogwe iinok, at pilanogo piige, Eeke menggerak o.

¹⁹ It aakumi iniki abe koonak nogo Aaninggin-paaninggin ambik inoba aremenggerak kwe, Aliku ALA nen aaninggin nogo tayenogo piige,

²⁰ Inowak kalok ari kero, abok aret ndegeninake, Eeke menggerak me, Inowak ambiriluk ambi kalok yigin mondok lek o.

²¹ It maluk eeka nogo inomaluk ti'nen inoorogo piige, It aap iniki abe koonak ineebi inombakwi nogo Inobaalombok nen aaninggin inoba kwippakwi, Eeko menggaarak o.

²² At Aliku ALA nen, At ayeloman mini nogo wondet eerogo piige, Ndi, ineebe op logowok nduk abu'me ari unggwogwe nogo Aaninggin inoba kwippiiga'lek teppiige, Eeke menggerak o.