Ndawi 30 - Ala Wone Peenok Peebi Mbanak

Agap ndareegerak kenok, “Wa,” yoreegerak wone Ala awi wuppunuk, inale'nggen nen tu paako logonet, ndawi wako logowak nduk, Ndawut nen ndawi yi aret pereegerak o.

¹ Kaliku ALA wae. It aap ninom wim mbanak nen nooppunuk, “Keyik a! Op wako,” yogwe iyo, nagap ndarogo panege, An abu tebenak wonage me, tiyappanege, Eekendak me, Kat kalut eeke agarik o.

² Kaliku nogoba Ala o. “Yeenggwa niru o,” yinuk, noone nggwok paga yokkigirak me, Neebe obeelom eerogo panege,

³ Kaliku ALA o. Kambunuk nogo menggam nen nippani wage, Kanggaatak nggween taambiigo menggam inenggela'me time wonage me, neenik eerogo panege, Eekendak o.

⁴ Kit Ala apuri ake leenak monggotak yi wae. Aliku ALA anep pogo logonet ndawi wakwi, At endage abu abe alik leenak me, tiyappugwi, Eeko logonip o.

⁵ Ne ambit mban at anini ninombake menggerak kwe, Ale'nggen nen obeelom eeppinanege ti perak, Eeppinanegak mban eeke kagak Kambi noorak kuli ari nagin o. Oonikiya le mban yogwe iigak O weerikit nduk eeke menggerak kwe, O weege kenok perak, inale'nggen mbako menggaarak.

⁶ An obeelom mban wonage logonet, “Niniki mondok-mondok nu'lek logogin o,” Yinuk, ari nagagirak o.

⁷ Kaliku ALA wae. Nabuwa nen obeelom eeppanege paga Puut nu'lek menggi kwak eerogo panegendak kwe, Kenete kumaappatinuk wonagandak paga perak, “Nonggop nduk wonaga,” yinuk, nagabiti mbakirak o.

⁸ Kaliku ALA o. Noone nggwok paga yokkege, “Nabuwa mbaru o,” yinuk, tamban eeke, Eeke logonet,

⁹ Namiya kilirogo panemenggaarak lek age, Kanggaatak nggween taambiigo menggam unggwi nage, Eeke neenok, Ti paga nano eekkoloorak nduk eeppaniyak mbaken? Liirubu nen kalut eeke, “Ala liirogon mban eeke menggerak o,” yinuk, kabok paganit nage, Eeriyak op mbaken? Lek aret me,

¹⁰ Kaliku ALA wae. An yokkege nogo karuk konembunuk nabuwa mbake, Ndi, Kaliku ALA o. An yeenggwa niri wage, Eeru o.

¹¹ Kat nen nale mbanogo paninuk Nale'nggen nen ndawi lubuk yikit nduk eerogo panege, Nayum nibinik maluk mendek yirik nogo nggoorogo paninuk, Nale'nggen mbarikit nduk, yum abe kwak yippanege, Eekendak me,

¹² Noone puk logogin lek o. Niniki paga nen kanep pege logonet, ndawi wake, Ndi, Kaliku nogoba Ala wae. An mondok-mondok, “Wa!” mban yokkege, Eeke logogin o.